ନୂଆଦିଲ୍ଲୀ, ୧୩ା୩(ପି.ଟି.)- କୋଭିଡ୍ ପାଇଁ ଏକବର୍ଷ ପରେ ରିଙ୍ଗ୍ଙ୍କୁ ପ୍ରତ୍ୟାବର୍ତ୍ତନ କରିବେ ଭାରତର ପ୍ରଫେସନାଲ ବକ୍ସର ବିଜେନ୍ଦର ସିଂ। ଚଳିତ ମାସ ୧୯ରେ ଏକ ସୁପର ମିଡ୍ଲଓ୍ବେଟ୍ (୭୬କେଜି) ମୁକାବିଲାରେ ସେ ରୁଷିଆର ଆର୍ତ୍ତିସ ଲୋପସାନ୍ଙ୍କୁ ଭେଟିବେ। ଏହି ଲଢେଇ ଗୋଆର ପଣଜୀସ୍ଥିତ ମାଜେଷ୍ଟି ପ୍ରାଇଡ୍ କ୍ୟାସିନୋଶିପ୍ ରୁଫ୍ଟପ୍ରେ ହେବ। ପୂର୍ବତନ ରାଜ୍ୟଗୋଷ୍ଠୀ କ୍ରୀଡ଼ା ବ୍ରୋଞ୍ଜ ବିଜେତା ଜୟ ଭଗଓ୍ବାନ ବର୍ତ୍ତମାନ ବିଜେନ୍ଦରଙ୍କୁ ଟ୍ରେନିଂରେ ସହାୟତା କରୁଛନ୍ତି। ଏହାଛଡ଼ା ଭାରତୀୟ ବକ୍ସର ତାଙ୍କ ବ୍ରିଟିଶ ଟ୍ରେନର ଲି’ ବିୟର୍ଡଙ୍କ ସହିତ ଅନ୍ଲାଇନ୍ ଯୋଗାଯୋଗରେ ରହିଛନ୍ତି। ୨୬ ବର୍ଷୀୟ ଲୋସାନ ଏପର୍ଯ୍ୟନ୍ତ ୬ଟି ପ୍ରଫେସନାଲ ବାଉଟ୍ରେ ଲଢେଇ କରିଛନ୍ତି। ଦୁଇ ନକ୍ ଆଉଟ ସମେତ ସେ ୪ଟିରେ ବିଜୟ ହାସଲ କରିଛନ୍ତି। ଶେଷ ଥର ସେ ୨୦୨୦ ଡିସେମ୍ବରରେ ନିଜ ଦେଶର ୟୁସୁପ୍ ମାଗୋମେଦ୍ବେକୋଭଙ୍କ ସହ ମୁକାବିଲା କରିଥିଲେ। ଏଥିରେ ସେ ଟେକ୍ନିକାଲ ନକ୍ଆଉଟରେ ବିଜୟୀ ହୋଇଥିଲେ। ଅନ୍ୟପକ୍ଷରେ ବିଜେନ୍ଦର ତାଙ୍କ ପ୍ରଫେସନାଲ କ୍ୟାରିୟରରେ ଏପର୍ଯ୍ୟନ୍ତ ଅପରାଜିତ ରହିଛନ୍ତି। ସେ ୧୨ଟି ଯାକ ମୁକାବିଲାରେ ବିଜୟ ଲାଭ କରିଥିବାବେଳେ ତନ୍ମଧ୍ୟରେ ୮ଟି ନକ୍ଆଉଟ ରହିଛି। ୨୦୦୮ ବେଜିଂ ଅଲିମ୍ପିକ୍ସ ବ୍ରୋଞ୍ଜ ପଦକ ବିଜେତା ୨୦୧୯ ନଭେମ୍ବରରେ ଦୁବାଇରେ ଘାନାର ପୂର୍ବତନ ରାଜ୍ୟଗୋଷ୍ଠୀ ଚାମ୍ପିୟନ ଚାଲର୍ସ ଆଡାମୁଙ୍କୁ ପରାସ୍ତ କରି ତାଙ୍କ ୧୨ତମ କ୍ରମାଗତ ବିଜୟ ହାସଲ କରିଥିଲେ।
