ଭୁବନେଶ୍ୱର, ୧୨।୧୦(କ୍ରୀଡ଼ା ପ୍ରତିନିଧି): କଳିଙ୍ଗ ଷ୍ଟାଡିୟମରେ ମଙ୍ଗଳବାର ଆରମ୍ଭ ହୋଇଛି ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ୍। ଭାରତ ଏହାର ପ୍ରଥମ ମ୍ୟାଚରେ ଉଚ୍ଚ ର଼୍ୟାଙ୍କ୍ପ୍ରାପ୍ତ ଆମେରିକା ସମକକ୍ଷ ପ୍ରଦର୍ଶନ କରିପାରିନାହିଁ। ଆମେରିକା ଗୋଲ ବର୍ଷା କରି ଘରୋଇ ଦଳକୁ ୮-୦ ଗୋଲରେ ପରାସ୍ତ କରିଛି। ଫଳରେ ନିଜର ଡେବ୍ୟୁ ମ୍ୟାଚ ଭାରତ ପାଇଁ ଦୁଃସ୍ବପ୍ନ ସଦୃଶ ହୋଇଛି। ପ୍ରଥମାର୍ଦ୍ଧ ଶେଷସୁଦ୍ଧା ଆମେରିକା ୫-୦ ଗୋଲରେ ଅଗ୍ରଣୀ ରହି ଭାରତକୁ ବ୍ୟାକ୍ଫୁଟ୍କୁ ଠେଲି ଦେଇଥିଲା। ଏଥିରୁ ଭାରତ ଆଉ ମୁକୁଳିପାରି ନ ଥିଲା। ସବୁ ବିଭାଗରେ ଆମେରିକା ଭଲ ଖେଳିଥିଲା। ବଲ୍କୁ ୭୮ ପ୍ରତିଶତ ନିଜ ନିୟନ୍ତ୍ରଣରେ ରଖିଥିଲା ଏହି ଦଳ। ଭାରତ ପକ୍ଷରୁ ମାତ୍ର ୨ଟି ଶଟ୍ ଟାର୍ଗେଟ କରାଯାଇଥିବାବେଳେ ଆମେରିକା ୩୦ଟି ଶଟ୍ ଭାରତୀୟ ଗୋଲପୋଷ୍ଟକୁ ମାରିଥିଲା। ଏଥିରୁ ୭ଟିକୁ ଗୋଲରେ ପରିଣତ କରିଥିଲା। ଭାରତ ମାତ୍ର ଗୋଟିଏ କର୍ନର ପାଇଥିବାବେଳେ ଆମେରିକା ୧୧ କର୍ନର ପାଇ ଆଗରେ ରହିଥିଲା। ଶଟ୍ ଆକୁରେସିି ଦୃଷ୍ଟିରୁ ଭାରତର ଆକ୍ରମଣ ୦ ପ୍ରତିଶତ ଥିବାବେଳେ ଆମେରିକା ୪୬ ପ୍ରତିଶତ ଆକ୍ରମଣାତ୍ମକ ଆଭିମୁଖ୍ୟ ଅବଲମ୍ବନ କରିଥିଲା। କୌଣସି ଦଳର ଖେଳାଳି ୟେଲୋ କିମ୍ବା ରେଡ୍ କାର୍ଡ ପାଇ ନ ଥିଲେ।
ଆମେରିକା ପକ୍ଷରୁୁ ଗୋଲ ସ୍କୋରିଂର ଧାରା ଆରମ୍ଭ କରିଥିଲେ ମେଲିନା ରେବିମ୍ବାସ। ମ୍ୟାଚର ୯ମ ମିନିଟରେ ସେ ଜ୍ୟାକସନଙ୍କଠାରୁ ପାଇଥିବା ପାସ୍କୁ ଗୋଲରେ ପରିଣତ କରି ଆମେରିକାକୁ ୧-୦ରେ ଅଗ୍ରଣୀ କରାଇଥିଲେ। ୧୫ତମ ମିିନିଟରେ ଦ୍ୱିତୀୟ ଗୋଲ ଦେଇଥିଲେ ଚାର୍ଲୋଟି କୋଲେର। ସେ ମଧ୍ୟ ଜ୍ୟାକସନଙ୍କଠାରୁ ପାଇଥିବା ପାସ୍ର ସଦ୍ବ୍ୟବହାର କରିଥିଲେ। ୨୩ତମ ମିନିଟରେ ଓନ୍ୟେକା ଗାମେରୋ ଏବଂ ୩୧ତମ ମିନିଟରେ ମେଲିନା ବ୍ୟକ୍ତିଗତ ଦ୍ୱିତୀୟ ଏବଂ ଦଳ ପକ୍ଷରୁ ୪ର୍ଥ ଗୋଲ ସ୍କୋର କରିଥିଲେ। ୩୯ତମ ମିନିଟରେ ଜିସେଲେ ଥମ୍ପସନ ଗୋଲ ଦେଇ ପ୍ରଥମାର୍ଦ୍ଧ ଶେଷସୁଦ୍ଧା ଆମେରିକାର ଅଗ୍ରଣୀ ବ୍ୟବଧାନକୁ ୫-୦ରେ ପହଞ୍ଚାଇ ଦେଇଥିଲେ। ପଟ ପରିବର୍ତ୍ତନ ହୋଇଥିଲେ ହେଁ ଭାରତର ଭାଗ୍ୟ ବଦଳି ନ ଥିଲା। ଆମେରିକାର ଆଧିପତ୍ୟ ଅବ୍ୟାହତ ରହିଥିଲା। ୫୧ତମ ମିନିଟରେ ଭାରତୀୟ ବଂଶୋଦ୍ଭବ ମିଆ ଭୂତାଙ୍କଠାରୁ ପାସ୍ ପାଇ ଇମ୍ରି ଦଳ ପକ୍ଷରୁ ୬ଷ୍ଠ ଗୋଲଟି ସ୍କୋର କରିଥିଲେ। ଏତିକିରେ ଭାରତର ଦୁର୍ଦ୍ଦଶା ସରି ନ ଥିଲା। ୫୯ତମ ମିନିଟରେ ଭାରତର କାଜଲ ଗୋଲ ଏରିଆ ମଧ୍ୟରେ ଫାଉଲ କରି ବସିବାରୁ ଆମେରିକାକୁ ପେନାଲ୍ଟି ଶୁଟ୍ ସୁଯୋଗ ମିିଳିିଥିଲା। ଟେଲର ସୁଆରେଜ ଏହାକୁ ଗୋଲରେ ପରିଣତ କରିବାରେ କୌଣସି ଭୁଲ କରି ନ ଥିଲେ। ଏହାପରେ ଆସିଥିଲା ଭାରତୀୟ ବଂଶୋଦ୍ଭବ ମିଆ ଭୂତାଙ୍କ ପାଳିି। ସେ କୋଲେରଙ୍କଠାରୁ ପାଇଥିବା ପାସ୍କୁ ଗୋଲକରି ୬୨ତମ ମିନିଟରେ ଆମେରିକାର ଅଗ୍ରଣୀକୁ ୮-୦ରେ ପହଞ୍ଚାଇ ଦେଇଥିଲେ। ମାନସିକ ସ୍ତରରେ ଭାଙ୍ଗିି ପଡ଼ିବା ସହ ଭାରତୀୟ ଖେଳାଳିମାନେ କ୍ଳାନ୍ତ ହୋଇ ଯାଇଥିଲେ ହେଁ ଅବଶିଷ୍ଟ ସମୟ ଗୋଲ ବରଣରୁ ନିଜକୁ ବଞ୍ଚାଇବାରେ ସକ୍ଷମ ହୋଇଥିଲେ। ଏଠାରେ ବିଜୟ ଫଳରେ ଆମେରିକା ପୂରା ୩ ପଏଣ୍ଟ ପାଇ ଅଭିଯାନ ଆରମ୍ଭ କରିଛି। ଭାରତ ଏହାର ପରବର୍ତ୍ତୀ ମ୍ୟାଚରେ ଶୁକ୍ରବାର ମରକ୍କୋକୁ ଭେଟିବ। ଗୋଆର ମାର୍ଗାଓରେ ଅନୁଷ୍ଠିତ ଗ୍ରୁପ୍ ‘ବି’ର ଅନ୍ୟ ଏକ ମ୍ୟାଚରେ ଜର୍ମାନୀ ୨-୧ ଗୋଲରେ ନାଇଜେରିଆକୁ ପରାସ୍ତ କରିଛି।
