ନୂଆଦିଲ୍ଲୀ, ୧୧ା୪ (ପି.ଟି.)-୨୦୨୨ରେ ଭାରତରେ ହେବାକୁ ଥିବା ୧୭ବର୍ଷରୁ କମ୍ ମହିଳା ଫିଫା ବିଶ୍ୱକପ୍ ଏବଂ ଏଏଫ୍ସି ମହିଳା ଏସିଆନ କପ୍ ପାଇଁ ନିଯୁକ୍ତ ଟୁର୍ନାମେଣ୍ଟ ନିର୍ଦ୍ଦେଶକ ରୋମା ଖାନ୍ନା ବ୍ୟକ୍ତିଗତ କାରଣ ଦର୍ଶାଇ ଶନିବାର ତାଙ୍କ ପଦବୀରୁ ଇସ୍ତଫା ପ୍ରଦାନ କରିଛନ୍ତି। ୨୦୧୯ରେ ଭାରତ ୧୭ ବର୍ଷରୁ କମ୍ ବିଶ୍ୱକପ୍ ବିଡ୍ ହାସଲ କରିବାରେ ରୋମାଙ୍କର ବିଶେଷ ଭୂମିକା ରହିଥିଲା। ସ୍ଥାନୀୟ ଆୟୋଜକ କମିଟି ତାଙ୍କୁ ଟୁର୍ନାମେଣ୍ଟ ନିର୍ଦ୍ଦେଶକ ପଦବୀରେ ନିଯୁକ୍ତି ଦେଇଥିଲା। ପୁନଶ୍ଚ ତାଙ୍କ ପ୍ରଚେଷ୍ଟାରେ ଭାରତ ଏଏଫ୍ସି ମହିଳା ଏସିଆନ କପ୍ ବିଡ୍ ଜିତିପାରିଥିଲା। ଏହି ଟୁର୍ନାମେଣ୍ଟ ଆସନ୍ତାବର୍ଷ ଆୟୋଜନ ହେବାକୁ ଯାଉଛି। ଇସ୍ତଫା ଦେବା ପରେ ରୋମା ଏକ ବିବୃତିରେ କହିଛନ୍ତି ଏଆଇଏଫ୍ଏଫ୍ ଓ ଫିଫା ତାଙ୍କ ଉପରେ ଭରସା ରଖିଥିବାରୁ ସେ ଧନ୍ୟବାଦ ଦେବାକୁ ଚାହିଁବେ। ସର୍ବଭାରତୀୟ ଫୁଟ୍ବଲ ମହାସଂଘ (ଏଆଇଏଫ୍ଏଫ୍) ସାଧାରଣ ସମ୍ପାଦକ କୁଶାଲ ଦାସ କହିଛନ୍ତି, ଭାରତୀୟ ଫୁଟ୍ବଲର ବିକାଶରେ ରୋମାଙ୍କର ବହୁ ଅବଦାନ ରହିଛି। ରୋମା ଏଆଇଏଫ୍ଏଫ୍ ସହ ୧୦ ବର୍ଷ ହେଲା ଜଡ଼ିତ ଥିଲେ। ଦେଶରେ ଫୁଟ୍ବଲ ଖେଳ ପ୍ରସାର ଦିଗରେ ସେ ଅନେକ କାର୍ଯ୍ୟ କରିଛନ୍ତି।
