(ସୁଧୀର କୁମାର ପରିଡ଼ା)
କାମାକ୍ଷାନଗର, ୧୪।୬
ରଜ ମହୋତ୍ସବ ପାଇଁ ଉତ୍ସବମୁଖର ହୋଇଉଠିଛି ଢେଙ୍କାନାଳ ଜିଲା କାମାକ୍ଷାନଗର। ବ୍ଲକର ଆଳତୁମା, ବାଙ୍ଗୁରା, ମାଳପୁରାରେ ଜାକଜମକର ସହ ଏହି ମହୋତ୍ସବ ପାଳନ କରାଯାଉଛି। ୩ଦିନ ଧରି ଆୟୋଜିତ ହେବାକୁ ଥିବା ଏହି କାର୍ଯ୍ୟକ୍ରମରେ ପାରମ୍ପରିକ ନୃତ୍ୟ, ସ୍ଥାନୀୟ କଳାକାରଙ୍କ ପ୍ରତିଭା ପ୍ରଦର୍ଶନ, ପିଠା ପ୍ରଦର୍ଶନୀ, ରଙ୍ଗୋଲି, କବାଡ଼ି ପ୍ରତିଯୋଗିତା ପ୍ରମୁଖ ଆକର୍ଷଣ ସାଜିବ। ଏହାକୁ ଶୃଙ୍ଖଳିତ କରିବା ପାଇଁ ରଜ ମହୋତ୍ସବ କମିଟି ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି।
କାମାକ୍ଷାନଗର ବ୍ଲକ ଆଳତୁମା ଗ୍ରାମ ନିକଟ ରାମିଆଳ ନଦୀକୂଳରେ ଆୟୋଜିତ ରଜ ମହୋତ୍ସବ ଚଳିତ ଥର ୧୫ବର୍ଷରେ ପଦାର୍ପଣ କରିଛି। ଜିଲାର ଅନ୍ୟତମ ଆକର୍ଷଣ ସାଜିଥିବା ଏହି କାର୍ଯ୍ୟକ୍ରମକୁ ସ୍ମୃତିମଧୁର କରିବା ପାଇଁ ଆୟୋଜକ କମିଟି ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ପାରମ୍ପରିକ ଦୋଳି ବନ୍ଧାଯିବା ସହ ତୋଟାରେ ଥିବା ଗଛକୁ ରଙ୍ଗବେରଙ୍ଗ ଚିତ୍ରରେ ଚିତ୍ରିତ କରାଯାଇଛି। ଜନମାନସରୁ ହଜିଯିବାକୁ ବସିଥିବା ପାଟ ଶଗଡ଼ର ପ୍ରତିକୃତି ପ୍ରଦର୍ଶିତ ହେଉଛି। ବୁଧବାର ପହିଲି ରଜଠାରୁ ଆରମ୍ଭ କରି ୩ଦିନ ଯାଏ ସକାଳ ୭ଟାରୁ ରାତି ୧୦ଟା ଯାଏ ବିଭିନ୍ନ କାର୍ଯ୍ୟକ୍ରମ ପର୍ଯ୍ୟାୟକ୍ରମେ ଆୟୋଜିତ ହେବ। ଏଥିପୂର୍ବରୁ ଚୟନ ହୋଇଥିବା ଅଞ୍ଚଳର ପ୍ରତିଭାବାନ୍ ପ୍ରତିଯୋଗୀ ମଞ୍ଚରେ ସେମାନଙ୍କ ପ୍ରତିଭା ପ୍ରଦର୍ଶନ କରିବେ। କଣ୍ଢେଇ ନୃତ୍ୟ, ପଶୁ ନୃତ୍ୟ, ଗୋଟିପୁଅ ନୃତ୍ୟ, ଯୋଡ଼ିଶଙ୍ଖ ପରିବେଷଣ କରାଯିବ। ରଙ୍ଗୋଲି, ଝୋଟିଚିତା, ପିଠା ପ୍ରତିଯୋଗିତା ଅନୁଷ୍ଠିତ ହେବ। ଏଥିସହ ପାରମ୍ପରିକ ଖାଦ୍ୟ, ପାନୀୟ ବ୍ୟବସ୍ଥା ମଧ୍ୟ କରାଯାଇଛି।
ସେହିପରି ବାଙ୍ଗୁରାରେ ୪ର୍ଥ ରଜ ମହୋତ୍ସବ ଲାଗି ପ୍ରସ୍ତୁତି ଶେଷ ହୋଇଛି। ଗ୍ରାମର କେତେଜଣ ଉତ୍ସାହୀ ଯୁବକଙ୍କ ଦ୍ୱାରା ସାଧାରଣ ଭାବେ ଆରମ୍ଭ ହୋଇଥିବା ଏହି ପର୍ବରେ ଏବେ ଗ୍ରାମବାସୀ ସକ୍ରିୟ ଭାବେ ଅଂଶଗ୍ରହଣ କରୁଛନ୍ତି। ଗ୍ରାମ ଆମ୍ବତୋଟାରେ ୭ ପ୍ରକାର ଦୋଳି ବନ୍ଧାଯାଇଛି। ଅଞ୍ଚଳର ପ୍ରତିଷ୍ଠିତ କଳାକାରଙ୍କୁ ନେଇ ସାଂସ୍କୃତିକ କାର୍ଯ୍ୟକ୍ରମ ସହ ବିଭିନ୍ନ ପ୍ରତିଯୋଗିତାର ଆୟୋଜନ କରାଯିବ ବୋଲି ନିଷ୍ପତ୍ତି ହୋଇଛି।
ଅନୁରୂପ ଭାବେ ଜାତୀୟ ରାଜପଥ ୫୩ ନିକଟବର୍ତ୍ତୀ ବାଇସିଙ୍ଗା ପଞ୍ଚାୟତ ମାଳପୁରାରେ ୨ୟ ରଜ ମହୋତ୍ସବକୁ ନେଇ ବେଶ୍ ଉତ୍ସାହ ଦେଖାଦେଇଛି। ଏହି ଉପଲକ୍ଷେ ଗ୍ରାମର ପ୍ରତିଭାବାନ ବ୍ୟକ୍ତି, ଛାତ୍ରୀଛାତ୍ର ଓ କ୍ରୀଡ଼ାବିତ୍ଙ୍କୁ ସମ୍ବର୍ଦ୍ଧିତ କରାଯିବ। ଯୁବତୀଯୁବକ, ଛୋଟ ପିଲାଙ୍କୁ ନେଇ ପ୍ରତିଯୋଗିତା ଆୟୋଜନ କରାଯିବ। ଲୁଚି ଯାଉଥିବା ପାରମ୍ପରିକ ନୃତ୍ୟ ଦାସକାଠିଆ, ଗୋଟିପୁଅ ନୃତ୍ୟ ପରିବେଷଣ କରାଯିବ ବୋଲି ଆୟୋଜକ କମିଟି ପକ୍ଷରୁ ସୂଚନା ଦିଅଯାଇଛି।
