କେନ୍ଦ୍ରାପଡ଼ା ଅଫିସ,୪।୧୨: ସମ୍ଭାବ୍ୟ ବାତ୍ୟା ଜଓ୍ବାଦ ଶନିବାରରୁ କେନ୍ଦ୍ରାପଡ଼ା ଜିଲାରେ ପ୍ରଭାବ ପକାଇବ। ପାଣିପାଗ ବିଶେଷଜ୍ଞ ଓ ରାଜ୍ୟ ସ୍ବତନ୍ତ୍ର ରିଲିଫ କମିଶନରଙ୍କ ଏପରି ସୂଚନା ପରେ ଜିଲାବାସୀ ସମ୍ଭାବ୍ୟ ଜଓ୍ବାଦକୁ ନେଇ ଆତଙ୍କିତ ହୋଇଛନ୍ତି। ଖରିଫ ଫସଲ ଅମଳ ହୋଇ ନ ଥିବା ସମୟରେ ଏହି ଝଡ଼ ଆର୍ଥିକ ପରିସ୍ଥିତିକୁ ଆହୁରି ଦୁର୍ବଳ କରିବ ବୋଲି ଆକଳନ କରୁଛନ୍ତି। ସମ୍ଭାବ୍ୟ ବାତ୍ୟାକୁ ଦେଖି ଜିଲାର ୩୪୦୪ ବୋଟ ଓ ଟ୍ରଲର ତଟ ଅଞ୍ଚଳରେ ପହଞ୍ଚତ୍ଛନ୍ତି। ଅପରପକ୍ଷରେ ଜିଲା ପ୍ରଶାସନ ପକ୍ଷରୁ ଏହାର ମୁକାବିଲା ପାଇଁ ପ୍ରସ୍ତୁତିକୁ ଜୋରଦାର କରାଯାଇଛି। ପ୍ରତି ପଞ୍ଚାୟତରେ ସଚେତନତା ସୃଷ୍ଟି ସହ ଶୂନ୍ୟ ମରଣ ଯୋଜନାକୁ କାର୍ଯ୍ୟକାରୀ ପାଇଁ ଶନିବାରରୁ ଉପାନ୍ତ ଅଞ୍ଚଳରୁ ଲୋକଙ୍କୁ ନିରାପଦ ସ୍ଥାନକୁ ସ୍ଥାନାନ୍ତର ଓ ଥଇଥାନ କରାଯିବ ବୋଲି ପ୍ରସ୍ତୁତିରେ ଅଛନ୍ତି।
ସମ୍ଭାବ୍ୟ ବାତ୍ୟା ଜଓ୍ବାଦକୁ ନେଇ ମହାକାଳପଡ଼ାର ପ୍ରତାପ କୁମାର ତ୍ରିପାଠୀ କହିଛନ୍ତି, ଲଗାଣ ବର୍ଷା ଓ ପବନ ଜିଲାର ଆର୍ଥିକ ମେରୁଦଣ୍ଡ ଉପରେ ପାହାର ଦେବ। କ୍ଷେତରେ ଏବେ ଖରିଫ ଧାନ ଅମଳକୁ ଅପେକ୍ଷା କରିଛି। ସେହିପରି ଶୀତଦିନିଆ ପରିବା ସହ ଅନ୍ୟ ଫସଲର ଚାଷ ଆରମ୍ଭ ହୋଇଛି। ଗତ ୟାସ୍ ବାତ୍ୟା ଖରିଫ ଧାନ ଫସଲ ଆରମ୍ଭରେ ହୋଇଥିବାରୁ ଚାଷୀ ପ୍ରଭାବିତ ହୋଇଥିଲେ। ଅମଳ ସମୟରେ ସମ୍ଭାବ୍ୟ ବାତ୍ୟା ଚାଷୀଙ୍କ ଋଣ ଶୁଝିବା ଚିନ୍ତାର କାରଣ ହେବ। ରାଜନଗର ବ୍ଲକ ଡାଙ୍ଗମାଳର ଶ୍ରୀକାନ୍ତ ଦାସ କହିଛନ୍ତି, ସମୁଦ୍ର ତଟ ଅଞ୍ଚଳରେ ଥିବା ରାଜନଗର ଓ ମହାକାଳପଡ଼ାବାସୀ ଏଥିରେ ବିଶେଷ ଭାବେ କ୍ଷତିଗ୍ରସ୍ତ ହେବେ। ଏହି ସମ୍ଭାବ୍ୟ ବାତ୍ୟା ସମୟରେ ଅମାବାସ୍ୟା ତିଥି ରହିଥିବାରୁ ଜୁଆର ଅଧିକ ଉଚ୍ଚ ରହିବା ସମ୍ଭାବନା ଅଛି। ତଟ ବନ୍ଧଗୁଡିକ ଅନୂ୍ୟନ ୩ ମିଟର ପର୍ଯ୍ୟନ୍ତ ଜୁଆର ମାଡରୁ ରକ୍ଷା କରିପାରୁଛି। ଏହାଠୁ ଅଧିକ ଉଚ୍ଚରେ ଜୁଆର ଆସିଲେ ତଟ ଅଞ୍ଚଳ ସହ ଭିତରକନିକାର ବନ୍ୟ ଓ ସାମୁଦ୍ରିକ ପ୍ରାଣୀ ଉପରେ ବିପଦ ସୃଷ୍ଟି ହେବା ସମ୍ଭାବନା ଅଛି। ବାତ୍ୟା ପରବର୍ତ୍ତୀ ସମୟରେ ରାସ୍ତାଘାଟଠାରୁ ଆରମ୍ଭ କରି ପାନୀୟ ଜଳ, ଶିକ୍ଷା, ସ୍ବାସ୍ଥ୍ୟ, ବିଜୁଳି ଆଦି ଅତ୍ୟାବଶ୍ୟକ ସେବା ମିଳିବା କଷ୍ଟ ହେବ। ଏହାକୁ ଦୃଷ୍ଟିରେ ରଖି ଜିଲା ପ୍ରଶାସନ କାର୍ଯ୍ୟ କରିବା ଆବଶ୍ୟକ। ମହାକାଳପଡ଼ାର ଲକ୍ଷ୍ମୀଧର ସ୍ବାଇଁ କହିଛନ୍ତି, ବାତ୍ୟାର ଅଧିକ ପ୍ରଭାବ ଜିଲାରେ ପଡ଼ିଲେ ସ୍ବାସ୍ଥ୍ୟସେବା ବିପର୍ଯ୍ୟସ୍ତ ହେବ। ବୃଦ୍ଧା, ବୃଦ୍ଧ ଓ ପ୍ରସୂତିଙ୍କୁ ତୁରନ୍ତ ଚିହ୍ନଟ କରି ସ୍ଥାନାନ୍ତର କରିବା କଥା। ସେହିପରି ଜିଲାର ୨୦ ଆଲର୍ଟ ସେଣ୍ଟରରୁ ମାତ୍ର ୧୧ଟି ଏବେ କାର୍ଯ୍ୟକ୍ଷମ ଅଛି। ଅବଶିଷ୍ଟ ସଜାଡ଼ିବାକୁ ଜିଲା ପ୍ରଶାସନକୁ ବାରମ୍ବାର ଜଣାଇଲେ ମଧ୍ୟ ଏହାର ସୁଫଳ ମିଳୁନାହିଁ। ବାତ୍ୟା ସମ୍ପର୍କରେ ଜିଲା ଜରୁରିକାଳୀନ ଅଧିକାରୀ ହେମଲତା ବାହାଲିଆ କହିଛନ୍ତି, ମୁକାବିଲା ପାଇଁ ପ୍ରସ୍ତୁତିକୁ ଜୋରଦାର କରାଯାଇଛି। ଜିଲାକୁ ୩ଟି ଓଡ୍ରାଫ ଟିମ୍, ୨ଟି ଏନ୍ଡିଆର୍ଏଫ୍ ଟିମ୍ ଆସିବା ସହ ୧୪ଟି ଅଗ୍ନିଶମ ବାହିନୀ ଟିମ୍ ସଜାଗ ଅଛନ୍ତି। ବିପର୍ଯ୍ୟୟର ମୁକାବିଲା ପାଇଁ ପ୍ରତ୍ୟେକ ବ୍ଲକ ଅଞ୍ଚଳରେ ସ୍ବତନ୍ତ୍ର ଟିମ୍ ଗଠନ କରାଯାଇଛି। ଏହାକୁ ପ୍ରଶାସନିକ ଅଧିକାରୀମାନେ ତଦାରଖ କରୁଛନ୍ତି। ୪ ତାରିଖ ପୂର୍ବାହ୍ନରୁ ଚିହ୍ନଟ ଗ୍ରାମରୁ ଲୋକମାନଙ୍କୁ ସ୍ଥାନାନ୍ତର କରାଯିବ। ବାତ୍ୟା ଆଶ୍ରୟସ୍ଥଳକୁ ବାସ ଉପଯୋଗୀ କରାଯାଇଛି। ମୋଟ ୧୬୫ଟି ଆଲାସ୍କା ଲାଇଟ ସଂରକ୍ଷିତ ରହିଛି। ବାତ୍ୟା ଓ ପରବର୍ତ୍ତୀ ସମୟ ପାଇଁ ବିଭିନ୍ନ ଲାଇନ୍ ଡିପାର୍ଟମେଣ୍ଟକୁ ସଜାଗ କରାଯାଇଥିବା ସେ ପ୍ରକାଶ କରିଛନ୍ତି।
