ବାରିପଦା ଅଫିସ,୨୭।୫: ବାତ୍ୟା ‘ୟାସ’ ପ୍ରଭାବରେ ମୟୂରଭଞ୍ଜ ଜିଲାରେ ବ୍ୟାପକ କ୍ଷୟକ୍ଷତି ହୋଇଥିବା ବେଳେ ଏବେ ବନ୍ୟା ଚିନ୍ତା ଘାରିଛି। ଶିମିଳିପାଳର ଆଭ୍ୟନ୍ତରୀଣ ଅଞ୍ଚଳରେ ଅତି ପ୍ରବଳ ବର୍ଷା ହୋଇଥିବା ଯୋଗୁ ଏଠାରୁ ବାହାରି ଥିବା ବୁଢ଼ାବଳଙ୍ଗ ଓ ଗଙ୍ଗାହାର ନଦୀର ଜଳସ୍ତର ଉପରମୁଣ୍ଡରେ ବୃଦ୍ଧି ପାଇବାରେ ଲାଗିଛି। ବନ୍ୟା ଆଶଙ୍କାକୁ ଦୃଷ୍ଟିରେ ରଖି ଜିଲା ପ୍ରଶାସନ ପକ୍ଷରୁ ନଦୀକୂଳିଆ ବାସିନ୍ଦାଙ୍କୁ ନିରାପଦ ସ୍ଥାନକୁ ସ୍ଥାନାନ୍ତର କରାଯିବା ପ୍ରକ୍ରିୟା ଜାରି ରହିଛି। ଏସ୍ଆର୍ସି ପ୍ରଦୀପ ଜେନାଙ୍କ ନିର୍ଦ୍ଦେଶ କ୍ରମେ ଜିଲାପାଳ ବିନୀତ ଭରଦ୍ୱାଜ ଓ ଏସ୍ପି ପରମାର ସ୍ମିଥ ପୁରୁଷୋତ୍ତମ ଦାସ ବାରିପଦାର ମଧୁବନ ଅଞ୍ଚଳର କଚ୍ଚା ଓ ଆଜବେଷ୍ଟସ ଘରେ ରହୁଥିବା ଲୋକମାନଙ୍କୁ ଆଶ୍ରୟସ୍ଥଳକୁ ସ୍ଥାନାନ୍ତର କରିଛନ୍ତି।
ଜିଲାର କୁସୁମୀ ବ୍ଲକ ଅଞ୍ଚଳରେ ମଙ୍ଗଳବାର ସର୍ବାଧିକ ୩୦୪ ମି.ମି. ବର୍ଷା ରେକର୍ଡ ହୋଇଥିବା ବେଳେ ଶାମାଖୁଣ୍ଟା ଓ ସାରସକଣା ବ୍ଲକରେ ସର୍ବନିମ୍ନ ୨୨ ମି.ମି. ବର୍ଷା ହୋଇଥିଲା। ବୁଧବାର ଯଶିପୁର ବ୍ଲକରେ ସର୍ବାଧିକ ୧୯୦ ମି.ମି., ବିଶୋଇରେ ୧୨୪ ମି.ମି., ଉଦଳାରେ ୧୧୦ ମି.ମି., ଶୁକ୍ରୁଳିରେ ୧୧୨ ମି.ମି., ବିଜାତଳାରେ ୧୦୮ ମି.ମି., ରରୁଆଁରେ ୧୦୫ ମି.ମି. ରେକର୍ଡ ହୋଇଥିବା ବେଳେ ବଡ଼ସାହି ଅଞ୍ଚଳରେ ସର୍ବନିମ୍ନ ୫ ମି.ମି. ବର୍ଷା ହୋଇଛି। ବୁଧବାର ସକାଳ ୬ରୁ ପୂର୍ବାହ୍ନ ୧୦ଟା ମଧ୍ୟରେ ଶିମିଳିପାଳ ଆଭ୍ୟନ୍ତରୀଣ ଅଞ୍ଚଳର ବିଭିନ୍ନ ସ୍ଥାନରେ ଅତି ପ୍ରବଳ ବର୍ଷା ହୋଇଥିବା ସୂଚନା ମିଳିଛି। ବରେହିପାଣି ଅଞ୍ଚଳରେ ୨୬୨ମି.ମି., ନଅଣା ସାଉଥରେ ୧୨୭ମି.ମି., ନଅଣା ନର୍ଥରେ ୨୪୪ମିମି, ପୋଡ଼ାଡ଼ିହାରେ ୧୫୩ମି.ମି., ଭଞ୍ଜବସାରେ ୩୦୨ମି.ମି., ଠାକୁରମୁଣ୍ଡା ୧୫୧ ମି.ମି. ଓ କେନ୍ଦୁମୁଣ୍ଡିରେ ୧୪୩ ମି.ମି. ବର୍ଷା ହୋଇଛି। ବୁଢ଼ାବଳଙ୍ଗ ନଦୀର ବିପଦ ସଙ୍କେତ ୩୦.୯୨ମିଟର ରହିଥିବା ବେଳେ ବୁଧବାର ସନ୍ଧ୍ୟା ସୁଦ୍ଧା ଏହାର ଜଳସ୍ତର ୨୩.୦୨ମିଟର ରହିଥିଲା। ଏହି ନଦୀର ଉଭୟ ପାର୍ଶ୍ୱରେ ଥିବା ବଡ଼ସାହି, ଗୋପବନ୍ଧୁନଗର, ବେତନଟୀ ବ୍ଲକ ଅଧୀନ ତଳିଆ ଅଞ୍ଚଳରେ ରହୁଥିବା ଲୋକମାନଙ୍କୁ ସ୍ଥାନାନ୍ତର କରିବା ପାଇଁ ବ୍ଲକ ପ୍ରଶାସନ ପକ୍ଷରୁ ଉଦ୍ୟମ ଜାରି ରହିଛି। ସମ୍ଭାବ୍ୟ ବିପଦକୁ ଏଡ଼ାଇବା ପାଇଁ ଏନ୍ଡିଆରଏଫ୍ ଏବଂ ଓଡ୍ରାଫ ଟିମ ସଜାଗ ହୋଇ ରହିଛନ୍ତି। ଜିଲାର ୨୬ଟି ବ୍ଳକ, ୨ଟି ପୌର ପରିଷଦ ଓ ୨ଟି ଏନ୍ଏସିର ୬୭ହଜାର ୯୮୦ଜଣ ଲୋକଙ୍କୁ ୪୨୨ଟି ସ୍ଥାନରେ ରନ୍ଧା ଖାଦ୍ୟ ଯୋଗାଇ ଦିଆଯାଇଛି ା
ସେହିପରି ବାତ୍ୟା ‘ୟାସ’ ପ୍ରଭାବରେ ବିଭିନ୍ନ ସ୍ଥାନରେ ବଡ଼ ବଡ଼ ଗଛ ଉପୁଡ଼ି ପଡ଼ିଥିବା ଦେଖିବାକୁ ମିଳିଛି। ବାରିପଦା ସହର, ରଙ୍ଗାମାଟିଆ, ଶୂନଗଡ଼ିଆ, ବେଲଗଡ଼ିଆ, ଚିପଟଅସ୍ତିଆ, ଅସ୍ତିଆ, ଡାକ୍ତରଖାନା ରାସ୍ତା, ଭଞ୍ଜପୁର ଆଦି ଅଞ୍ଚଳରେ ଗଛ ଉପୁଡ଼ି ରାସ୍ତାରେ ପଡ଼ିିଛି। ଅଗ୍ନିଶମ ବିଭାଗ ପକ୍ଷରୁ ଯୁଦ୍ଧକାଳୀନ ଭିତ୍ତିିରେ ତାହାକୁ ସଫା କରାଯାଉଥିବା ଦେଖିବାକୁ ମିଳିଛି।
