ନୂଆଦିଲ୍ଲୀ,୨।୮: ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତ ଆତ୍ମହତ୍ୟା ମାମଲା ଭିନ୍ନ ମୋଡ଼ ନେଉଥିବାବେଳେ ସୁଶାନ୍ତଙ୍କ ଭଉଣୀ ଶ୍ୱେତା ସିଂ କୀର୍ତ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ହସ୍ତକ୍ଷେପ ଲୋଡ଼ିଛନ୍ତି। ଶନିବାର ସେ ପ୍ରଧାନମନ୍ତ୍ରୀଙ୍କୁ ଏକ ଖୋଲାଚିଠି ଲେଖି ଏଥିରେ ସହଯୋଗ କରିବାକୁ ଅନୁରୋଧ କରିଛନ୍ତି। ସେ ଦର୍ଶାଇଛନ୍ତି ଯେ, ସୁଶାନ୍ତଙ୍କ ବଲିଉଡ୍ରେ କେହି ଗଡ୍ଫାଦର ନ ଥିଲେ। ଏଥିସହ ଶ୍ୱେତା ନିଜ ଫେସ୍ବୁକ ଆକାଉଣ୍ଟରେ ଲେଖିଛନ୍ତି, ସୁଶାନ୍ତଙ୍କ ଭଉଣୀ ହିସାବରେ ସମସ୍ତ ମାମଲାର ଖୁବ୍ଶୀଘ୍ର ସ୍କାନ କରିବା ଲାଗି ଅନୁରୋଧ କରୁଛି। ଭାରତୀୟ ନ୍ୟାୟପାଳିକା ଉପରେ ଯଥେଷ୍ଟ ବିଶ୍ୱାସ ରହିଛି। ଯେକୌଣସି ମତେ ଆମକୁ ନ୍ୟାୟ ଦରକାର।
ପ୍ରଧାନମନ୍ତ୍ରୀଙ୍କୁ ଦେଇଥିବା ଚିଠିରେ ଶ୍ୱେତା ଦର୍ଶାଇଛନ୍ତି ଯେ, ଆମେ ଏକ ସାଧାରଣ ସରଳ ପରିବାରରୁ ଆସିଛୁ। ବଲିଉଡ୍କୁ ଆସିବା ପୂର୍ବରୁ ସୁଶାନ୍ତଙ୍କ କେହି ଗଡ୍ଫାଦର ନ ଥିଲେ। ଏବେ ବି କେହି ସେଭଳି ଆମ ପରିବାର ପଛରେ ନାହାନ୍ତି। ମାମଲାର ସମସ୍ତ ଦିଗ ଯେପରି ଠିକ୍ଭାବେ ଚାଲିବ ସେଥିଲାଗି ଦୃଷ୍ଟିଦେବାକୁ ଅନୁରୋଧ। ତଥ୍ୟରେ ଜାଲିଆତି କରାଯିବାର ଆଶଙ୍କା ରହିଛି। ଫେସ୍ବୁକ ପୋଷ୍ଟ ପରେ ପ୍ରଧାନମନ୍ତ୍ରୀଙ୍କୁ ଶ୍ୱେତା ଏଭଳି ଚିଠି ଲେଖି ସହଯୋଗ ଲାଗି ଅନୁରୋଧ କରିଛନ୍ତି।
