କେନ୍ଦ୍ରାପଡ଼ା ଅଫିସ, ୨୦ା୭: ଦୁଇବର୍ଷ ଧରି କରୋନା ସଂକ୍ରମଣ ଭୟରେ ଲୋକେ ବହୁ କଷ୍ଟରେ ଜୀବନ ଜୀବିକା ନିର୍ବାହ କରୁଥିବା ବେଳେ ଏବେ କେନ୍ଦ୍ରାପଡ଼ା ଜିଲାରେ ଚର୍ମରୋଗର ଭୟ ଦେଖା ଦେଇଛି। ଏହି କାରଣରୁ କେନ୍ଦ୍ରାପଡ଼ା ବ୍ଲକ ମାଗୁରଗଣ୍ଡ ପାଟଣା ମୁଣ୍ଡାସାହିରେ ରହୁଥିବା ୪୨ ଆଦିବାସୀ ପରିବାର ଏକ ପ୍ରକାର ସାମାଜିକ ବାସନ୍ଦରେ ଅଛନ୍ତି।
ଏ ସମ୍ପର୍କରେ ମୁଣ୍ଡାସାହିର କନକ ଗାଗରାଇ କହିଛନ୍ତି, ଏହି ଗ୍ରାମର ରବି ସିନ୍ଧୁଙ୍କ ପୁଅ ଲାଲୁ ବାଙ୍ଗାଲୋରର ଏକ ରଡ୍ ମିଲିଂରେ କାର୍ଯ୍ୟ କରୁଥିଲେ। ଜୁନ ୨୦ତାରିଖରେ ସେଠାରୁ ଫେରିବା ପରେ ଘରେ ପେଟ ଯନ୍ତ୍ରଣା ଦେଖା ଦେଇଥିଲା। ଏଥିସହ ଦେହରେ କାଛୁ କୁଣ୍ଡିଆ ରୋଗ ପରି ଚର୍ମରୋଗ ଦେଖାଦେଇଥିଲା। ପରିବାର ଲୋକେ ଲାଲୁଙ୍କ ଚିକିତ୍ସା ପାଇଁ ପ୍ରଥମେ ଜିଲା ମୁଖ୍ୟ ଚିକିତ୍ସାଳୟରେ ଓ ପରେ କଟକ ବଡ ମେଡିକାଲକୁ ନେଇଥିଲେ। ଏହାସତ୍ତ୍ୱେ ତାଙ୍କର ମୃତ୍ୟୁ ହୋଇଥିଲା। ଲାଲୁଙ୍କ ପରିବାରରେ ମା’, ବାପା, ସ୍ତ୍ରୀ, ଭଉଣୀ ଓ ଗୋଟିଏ ଛୋଟ ଝିଅ ଅଛନ୍ତି। ଏହି ସଦସ୍ୟଙ୍କ ଦେହରେ ବଡବଡ ବ୍ରଣ ଭଳି ଚର୍ମରୋଗ ଦେଖାଦେଇଛି। ଫଳରେ ସ୍ଥାନୀୟ ଅଞ୍ଚଳରେ ମୁଣ୍ଡାସାହିରେ ଚର୍ମରୋଗକୁ ନେଇ ବିଭିନ୍ନ ଆଲୋଚନା ଜୋର ଧରିଛି। ଗ୍ରାମର ସୁରେଶ ହେମ୍ବ୍ରମ କହିଛନ୍ତି, ଚର୍ମରୋଗକୁ ଗଁାର କେତେଜଣ ଲୋକ ମଙ୍କିପକ୍ସ ବୋଲି କହି ଭୟଭୀତ କରାଉଛନ୍ତି। ଏହା ମୁଣ୍ଡାସାହିର ୪୨ ଆଦିବାସୀ ପରିବାରଙ୍କ ପାଇଁ ବିପଦ ସାଜିଛି। ଆଖପାଖରେ କେହି କାମ ଦେବାକୁ ଅମଙ୍ଗ ହେଉଛନ୍ତି। ରାସ୍ତାରେ ଗଲେ ମଧ୍ୟ ଚିହ୍ନା ଲୋକ ଆଡେଇ ଯାଉଛନ୍ତି। ମଜୁରି ନ ମିଳିବା ସହ ଏବେ ସ୍ଥାନୀୟ ଅଞ୍ଚଳରୁ ରାଶନ, ପାଣି ଆଣିବା ବନ୍ଦ ହୋଇଛି। ଏକ ପ୍ରକାର ଦୁର୍ବିଷହ ଜୀବନ ବିତାଉଥିବା ସେ ପ୍ରକାଶ କରିଛନ୍ତି। ଗ୍ରାମର ନବ ଚାତରା କହିଛନ୍ତି, ଏହି ଗ୍ରାମରେ ୩୦୦ରୁ ୪୦୦ ଲୋକ ରହୁଛନ୍ତି। ଗୋଟିଏ ନଳକୂପକୁ ସମସ୍ତେ ବ୍ୟବହାର କରନ୍ତି। ବିବାହଠାରୁ ଶୁଦ୍ଧିକ୍ରିୟା ପର୍ଯ୍ୟନ୍ତ ଏଠାରେ ଥିବା କେନାଲକୁ ବ୍ୟବହାର କରାଯାଉଛି। ତେବେ କେଉଁ କାରଣ ଯୋଗୁ ଏହି ଚର୍ମରୋଗ ହେଉଛି, ତାହା ଜଣାପଡୁନାହିଁ। ଏହି ଗ୍ରାମର ଛାତ୍ରୀଛାତ୍ର କହିଛନ୍ତି, ରୋଗକୁ ନେଇ ପ୍ରଚାର ହେବା ପରେ ସ୍କୁଲ ଯିବା ବନ୍ଦ ହୋଇଛି। ସ୍କୁଲର ଶିକ୍ଷକମାନେ ରୋଗ ଭଲ ହେବା ପରେ ଆସିବାକୁ କହୁଛନ୍ତି। ସ୍କୁଲରେ ମୁଣ୍ଡାସାହିର ୨୦ରୁ ଅଧିକ ଶିକ୍ଷାର୍ଥୀ ଅଛନ୍ତି। ଏ ସମ୍ପର୍କରେ ଜିଲାପାଳ ଅମୃତ ଋତୁରାଜଙ୍କୁ ପଚାରିବାରେ ଜିଲାରେ ମଙ୍କିପକ୍ସ ନେଇ କୌଣସି ଭୟର ବାତାବରଣ ନାହିଁ। ମୁଣ୍ଡାସାହିକୁ ଦୁଇଜଣିଆ ମେଡ଼ିକାଲ ଟିମ ଯାଇ ରୋଗ ସମ୍ପର୍କରେ ପରାମର୍ଶ ଦେବା ସହ ଔଷଧ ଦେଇ ଆସିଛନ୍ତି ବୋଲି ସେ କହିଛନ୍ତି।
