ଦିଗପହଣ୍ଡି,୪ା୬(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ସିଦ୍ଧେଶ୍ୱର ଗ୍ରାମର କେ.ଜୟରାମ ଦୋରା ଏବଂ ରବୀନ୍ଦ୍ର ନାହାକ ଦୁଇ ପଡ଼ୋଶୀ। ଘର କାନ୍ଥରେ ଲୁଗା ଶୁଖାଇବାକୁ କେନ୍ଦ୍ରକରି ଉଭୟ ପରିବାର ମଧ୍ୟରେ ଦୀର୍ଘଦିନ ହେଲା ଶତ୍ରୁତା ଲାଗି ରହିଥିଲା। ବୁଧବାର ସକାଳେ ଜୟରାମଙ୍କ ମୁଣ୍ଡକୁ ରବୀନ୍ଦ୍ର ଏବଂ ତାଙ୍କ ପୁଅ କିଷାନଙ୍କ ଠେଙ୍ଗାରେ ମରଣାନ୍ତକ ଆକ୍ରମଣ କରି ହତ୍ୟା ଉଦ୍ୟମ କରିଥିଲେ। ମୁଣ୍ଡଫାଟି ରକ୍ତ ବାହାରିବାରୁ ପରିବାର ଲୋକେ ଜୟରାମଙ୍କୁ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ଚିକିତ୍ସା ହୋଇ ଫେରିବା ପରେ କେ. ଜୟରାମ ଦିଗପହଣ୍ଡି ଥାନାରେ ପହଞ୍ଚି ଏତଲା ଦେଇଥିଲେ। ଏତଲାକୁ ଭିତ୍ତିକରି ଆଇଆଇସି କିଶୋର କୁମାର ସାମଲ କେସ୍ ନଂ.୨୩୬/୨୬ରେ ବିଭିନ୍ନ ଦଫାରେ ମାମଲା ରୁଜୁ କରିଥିଲେ। ତଦନ୍ତକାରୀ ଅଧିକାରୀ ଏସ୍.ଆଇ ସୋଫିଆ ମିଶ୍ର ଗୁରୁବାର ପୂର୍ବାହ୍ନରେ ଉଭୟ ଅଭିଯୁକ୍ତ ବାପ-ପୁଅଙ୍କୁ ଗିରଫ କରି କୋର୍ଟ ଚାଲାଣ କରିଥିଲେ। ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତ ଦ୍ବୟଙ୍କୁ ଦିଗପହଣ୍ଡି ସବ୍ଜେଲ ହାଜତକୁ ପଠାଇ ଦିଆଯାଇଛି। ମରଣାନ୍ତକ ଆକ୍ରମଣ କରି ହତ୍ୟା ଉଦ୍ୟମ କରିଥିଲେ। ବୁଧବାର ସକାଳେ ଜୟରାମଙ୍କ ସ୍ତ୍ରୀ କେ. ରୋଷନି ଦୋରା ଉକ୍ତ କାନ୍ଥରେ ଏକ ପ୍ୟାଣ୍ଟ ଓ ଟି-ଶର୍ଟ ଶୁଖାଇଥିଲେ। ରବୀନ୍ଦ୍ରଙ୍କ ସ୍ତ୍ରୀ ସଂଯୁକ୍ତା ନାହାକ ଉକ୍ତ ପ୍ୟାଣ୍ଟ ଓ ଶର୍ଟକୁ କାନ୍ଥରୁ ବାହାର କରି ରାସ୍ତା ଉପରକୁ ଫୋପାଡ଼ି ଦେଇଥିଲେ। ରୋଷନି ଏହି ଘଟଣା ସଂଯୁକ୍ତାଙ୍କୁ ପଚାରିବାରୁ ସଂଯୁକ୍ତା ତାଙ୍କୁ ଆପତ୍ତିଜନକ ଭାଷାରେ ଗାଳି କରିଥିଲେ। ପରେ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇ ଧସ୍ତାଧସ୍ତିି ହୋଇଥିଲା। ପାଟିଶୁଣି ରବୀନ୍ଦ୍ର ଏବଂ ତାଙ୍କ ପୁଅ କିଷାନଙ୍କ ସମେତ ପଡ଼ୋଶୀ ଜୟରାମ ସେଠାରେ ପହଞ୍ଚିଥିଲେ। ଜୟରାମ ଉତ୍ତେଜିତ ହୋଇ ଏକ ଇଟାଖଣ୍ଡ ଫିଙ୍ଗିବାରୁ ସଂଯୁକ୍ତାଙ୍କ ଅଣ୍ଟାରେ ବାଜିଥିଲା। ଘଟଣା ଦେଖି ରବୀନ୍ଦ୍ର ଓ ତାଙ୍କ ପୁଅ କିଷାନ ଠେଙ୍ଗାରେ ଜୟରାମଙ୍କୁ ମରଣାନ୍ତକ ଆକ୍ରମଣ କରିଥିଲେ ବୋଲି ପ୍ରାଥମିକ ତଦନ୍ତରୁ ଜଣାପଡ଼ିଥିବା ତଦନ୍ତକାରୀ ଅଧିକାରୀ କହିଛନ୍ତି। ଘଟଣାକୁ ନେଇ ଦୁଇ ପଡ଼ୋଶୀ ପରିବାରଙ୍କ ମଧ୍ୟରେ ଚାପା ଉତ୍ତେଜନା ଲାଗି ରହିଛି।
