ପାରାଦୀପ, ୨୫।୨(ଶରତ ରାଉତ)ପାରାଦୀପ ବନ୍ଦର ପିଆଇସିଟି (ପାରାଦୀପ ଇଣ୍ଟରନ୍ୟାଶନାନାଲ କାର୍ଗୋ ଟର୍ମିନାଲ)ବର୍ଥରେ ୨୦୨୩ ନଭେମ୍ବର ୩୦ରେ ଏମ୍ଭି ଦେବୀ ନାମକ ଜାହାଜରୁ କଷ୍ଟମ ବିଭାଗ ୨୨ ପ୍ୟାକେଟ୍ କୋକେନ୍ ଜବତ କରିଥିଲା। ଏହାର ବଜାର ମୂଲ୍ୟ ୨୨୦ କୋଟି ଟଙ୍କା ହେବ ବୋଲି କୁହାଯାଇଛି। ସେବେଠାରୁ ଉକ୍ତ ଜାହାଜକୁ ବିଭାଗ ପକ୍ଷରୁ ଅଟକ ରଖାଯାଇଛି। ଏହାମଧ୍ୟରେ ଥିବା ୨୧ ଭିଏଟ୍ନାମ ନାବିକଙ୍କ ଭାଗ୍ୟ ଏବେ ଅନିଶ୍ଚିତତା ମଧ୍ୟରେ ରହିଛି।
ଏହି ଜାହାଜ ଇଣ୍ଡୋନେସିଆରୁ ପାରାଦୀପ ଆସିଥିଲା। ଇତିମଧ୍ୟରେ ୮୬ ଦିନ ଅତିକ୍ରାନ୍ତ ହେଲାଣି। କିନ୍ତୁ କୋକେନ ମିଳିବା ଘଟଣାରେ କାହାର ସମ୍ପୃକ୍ତି ଥିଲା କିମ୍ବା ଏହା କିପରି ଓ କେମିତି ଜାହାଜର କ୍ରେନ କ୍ୟାବିନ ଭିତରକୁ ଗଲା ତାହା ଅସ୍ପଷ୍ଟ ରହିଛି। ଏହା ମଧ୍ୟରେ ଜାହାଜ ନ୍ୟାୟିକ ବ୍ୟବସ୍ଥାରେ ଛନ୍ଦି ହୋଇଗଲାଣି। ଯଥା କୁଜଙ୍ଗ ପ୍ରଥମଶ୍ରେଣୀ ଜିଲା ଦୌରାଜଜଙ୍କ କୋର୍ଟରେ ଜାହାଜ ମୁକୁଳାଇବା ପାଇଁ ଆବେଦନ ହୋଇଥିଲା। କୋର୍ଟ ଏହାର ଶୁଣାଣି କରି ୧୧୦ କୋଟି ଟଙ୍କା ଜମା କଲେ ଜାହାଜ ମୁକୁଳାଇ ପାରିବେ ବୋଲି କହିଥିଲେ। ଗତ ଶୁକ୍ରବାର ଜାହାଜର ବର୍ଥିଂ ବାବଦ ପ୍ରାପ୍ୟ ୭ କୋଟି ୯୫ ଲକ୍ଷ ୪୭ ହଜାର ୧୭୦ ଟଙ୍କା ଦେବା ପାଇଁ ପିଆଇସିଟି କମ୍ପାନୀ ଓଡ଼ିଶା ହାଇକୋର୍ଟରେ ଆବେଦନ କରିଛି। ଏହି ଆବେଦନ ଉପରେ ହାଇକୋର୍ଟ ଜାହାଜ ଆରେଷ୍ଟ ପାଇଁ ଶୁଣାଣି କରିଛନ୍ତି। ଏସବୁ ମଧ୍ୟରେ ଜାହାଜରେ ଥିବା ୨୧ ଜଣ ଭିଏଟନାମ ନାଗରିକଙ୍କ ସମ୍ପର୍କରେ କୌଣସି ଉଲ୍ଲେଖ ନାହିଁ। ସେମାନଙ୍କୁ ଏପର୍ଯ୍ୟନ୍ତ କଷ୍ଟମ୍ସ ବିଭାଗ ଅଭିଯୁକ୍ତଭାବେ ଦର୍ଶାଇ ନାହାନ୍ତି, କିମ୍ବା ଗିରଫ କରିନାହାନ୍ତି। ଏବେ ସମ୍ପୃକ୍ତ ଦେବୀ ଜାହାଜ ସମୁଦ୍ରର ଆଙ୍କରେଜ ଏରିଆରେ ଅଛି। ତା’ମଧ୍ୟରେ ଏହି ନାବିକମାନେ ଅଛନ୍ତି। ଗତ ଜାନୁଆରୀରେ ଜଣେ ନାବିକ ମାନସିକ ଅବସାଦ ଯୋଗୁ ପାଣିକୁ ଖସି ଆହତ ହୋଇଥିଲେ। ଏବେ ଜାହାଜ ମୁକୁଳାଇବା ଓ ପିଆଇସିଟି କ୍ଷତିପୂରଣ ପାଇଁ କୋର୍ଟରେ ଆଶ୍ରୟ ନେଇଛନ୍ତି। କିନ୍ତୁ ନାବିକଙ୍କ ପାଇଁ ଦୁଇଟି ଯାକ ଆବେଦନରେ କିଛି ଦର୍ଶାଯାଇ ନାହିଁ। ଯେଉଁ ପିଆଇସିଟି କମ୍ପାନୀ ଅର୍ଥ ପାଇଁ ଆବେଦନ କରିଛନ୍ତି ସେହି କମ୍ପାନୀ ଜାହାଜ ମାଲିକ ଏଜେଣ୍ଟ ହୋଇ ନାବିକଙ୍କ ଖାଇବା ଖର୍ଚ୍ଚ ବହନ କରୁଛନ୍ତି। ସମଗ୍ର ଘଟଣାରେ କଷ୍ଟମ୍ସ ଓ ପିଆଇସିଟି କମ୍ପାନୀ ନୀରବତା ଅବଲମ୍ବନ କରୁଛନ୍ତି। ହାଇକୋର୍ଟ ଘଟଣା ସମ୍ପର୍କରେ ପିଆଇସିଟି କମ୍ପାନୀ ମାନବସମ୍ବଳ ଅଧିକାରୀ ଶାରଦା ନାୟକଙ୍କୁ ପଚାରିଲେ କହିଥିଲେ, ଆମ କମ୍ପାନୀ କୌଣସି ଘଟଣାରେ ସମ୍ପୃକ୍ତ ନାହିଁ କି କୋର୍ଟରେ ଆଶ୍ରୟ ନେଇନାହାନ୍ତି। କୋର୍ଟ ମାମଲା ହୋଇଥିବା ବାବଦରେ ପଚାରିଲେ କହିଥିଲେ ଆଉ କିଏ କରିଥିବ ମୁଁ ଜାଣିନାହିଁ ବୋଲି ପ୍ରକାଶ କରିଛନ୍ତି। ଏ ପ୍ରସଙ୍ଗରେ କଷ୍ଟମ୍ସ ବିଭାଗର ପ୍ରତିକ୍ରିୟା ମିଳିନାହିଁ। ଏପରି ସ୍ଥିତିରେ ଜାହାଜ ମୁକୁଳିବାର ସମୟ ଲମ୍ବା ହୋଇପାରେ। ସେପର୍ଯ୍ୟନ୍ତ ନାବିକଙ୍କ ସହ ଜାହାଜ ସେମିତି ପାଣିରେ ରହିବ। ଏଥିପାଇଁ ଭାରତୀୟ ଓ ଅନ୍ତର୍ଜାତୀୟ ଆଇନଗତ ପ୍ରକ୍ରିୟା ଆରମ୍ଭ ହୋଇଛି।
