ନୂଆଦିଲ୍ଲୀ, ୨।୧୦: ଦେଶରେ ପ୍ରତିଦିନ ଲକ୍ଷ ଲକ୍ଷ ଲୋକ ହାଇୱେ ଓ ଏକ୍ସପ୍ରେସେୱରେ ଯାତ୍ରା କରୁଛନ୍ତି। ଏଥିପାଇଁ ସେମାନଙ୍କୁ ଟୋଲ ଦେବାକୁ ପଡ଼ିଥାଏ। ଟୋଲ ବ୍ୟବସ୍ଥାକୁ ନେଇ ସରକାର ସମୟ ସମୟରେ ବିଭିନ୍ନ ନିୟମରେ ପରିବର୍ତ୍ତନ କରୁଛନ୍ତି। ଏହି କ୍ରମରେ ଦିବ୍ୟାଙ୍ଗଜନଙ୍କ ପାଇଁ ଜାରି ହେଉଥିବା ଟୋଲ ଛାଡ଼ ଫାଷ୍ଟଟ୍ୟାଗ ନିୟମରେ ବଡ଼ ପରିବର୍ତ୍ତନ କରିଛି କେନ୍ଦ୍ରୀୟ ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟ। ନୂଆ ସଂଶୋଧିତ ନିୟମ ଆଜିଠାରୁ ଲାଗୁ ହୋଇଛି।
ଏହି ପରିବର୍ତ୍ତନର ମୁଖ୍ୟ ଉଦ୍ଦେଶ୍ୟ ଦିବ୍ୟାଙ୍ଗଜନଙ୍କ ପାଇଁ ଟୋଲ ପ୍ଲାଜା ଦେଇ ଯିବା ପ୍ରକ୍ରିୟାକୁ ଅଧିକ ସହଜ ଓ ଝଞ୍ଜଟମୁକ୍ତ କରିବା। ପୂର୍ବରୁ ଦିବ୍ୟାଙ୍ଗଜନଙ୍କ ପାଇଁ ଜାରି ହେଉଥିବା ଟୋଲ ମୁକ୍ତ ଫାଷ୍ଟଟ୍ୟାଗ ପ୍ରତିବର୍ଷ ନବୀକରଣ କରିବାକୁ ପଡ଼ୁଥିଲା। ଏଣିକି ଏହି ପ୍ରକ୍ରିୟାରୁ ଲାଭାର୍ଥୀଙ୍କୁ ବାରମ୍ବାର ମୁକ୍ତି ମିଳିବ। ମନ୍ତ୍ରଣାଳୟର ନୂଆ ନିର୍ଦ୍ଦେଶାବଳୀ ଅନୁସାରେ, ଏଣିକି ଦିବ୍ୟାଙ୍ଗଜନଙ୍କ ଫାଷ୍ଟ୍ୟାଗ୍ର ବୈଧତା ଦିବ୍ୟାଙ୍ଗତାର ପ୍ରତିଶତ ଆଧାରରେ ନିର୍ଦ୍ଧାରିତ ହେବ।
୭୦%ରୁ ୧୦୦% ଦିବ୍ୟାଙ୍ଗତା: ଏହି ବର୍ଗର ଯୋଗ୍ୟ ବ୍ୟକ୍ତିଙ୍କୁ ମିଳୁଥିବା ଛାଡ଼ ଫାଷ୍ଟଟ୍ୟାଗ ବୈଧତା ୫ ବର୍ଷ ରହିବ।
୪୦%ରୁ ଅଧିକ କିନ୍ତୁ ୭୦%ରୁ କମ ଦିବ୍ୟାଙ୍ଗତା: ଏହି ବର୍ଗର ଯୋଗ୍ୟ ବ୍ୟକ୍ତିଙ୍କ ଫାଷ୍ଟଟ୍ୟାଗ ବୈଧତା ୩ ବର୍ଷ ରହିବ।
ପୁରୁଣା ନିୟମ ଅନୁସାରେ ଦିବ୍ୟାଙ୍ଗଜନଙ୍କୁ ନିଜର ଛାଡ଼ ଫାଷ୍ଟଟ୍ୟାଗ ଜାରି ରଖିବା ପାଇଁ ପ୍ରତିବର୍ଷ ନୂଆ ଆବେଦନ କରିବାକୁ ପଡ଼ୁଥିଲା। ଏହା ଯୋଗୁ ଅନେକ କାଗଜପତ୍ର କାମ ସହ ସମୟ ମଧ୍ୟ ନଷ୍ଟ ହେଉଥିଲା।
ନୂଆ ନିୟମ ଅନୁସାରେ ୩ କିମ୍ବା ୫ ବର୍ଷର ଦୀର୍ଘ ବୈଧତା ମିଳିବା ଫଳରେ ପ୍ରତିବର୍ଷ ନବୀକରଣ କରିବାର ଆବଶ୍ୟକତା ରହିବ ନାହିଁ। ବୈଧତା ସମୟ ସରିବା ପରେ ଆବଶ୍ୟକ ଦସ୍ତାବିଜ ସହ ଅନଲାଇନ କିମ୍ବା ଅଫଲାଇନରେ ନବୀକରଣ ପାଇଁ ଆବେଦନ କରିବାକୁ ପଡ଼ିବ।
ସଡ଼କ ପରିବହନ ମନ୍ତ୍ରଣାଳୟ ସ୍ପଷ୍ଟ କରିଛି ଯେ, ସରକାରଙ୍କ ଦ୍ୱାରା ମାନ୍ୟତାପ୍ରାପ୍ତ ଦିବ୍ୟାଙ୍ଗତା ପ୍ରମାଣପତ୍ର ଥିବା ଯୋଗ୍ୟ ବ୍ୟକ୍ତିଙ୍କୁ ହିଁ ଏହି ଛାଡ଼ ଫାଷ୍ଟଟ୍ୟାଗ ମିଳିବ। ଏହା ସହିତ ଗାଡ଼ିଟି ଦିବ୍ୟାଙ୍ଗଜନଙ୍କ ନାମରେ ପଞ୍ଜୀକୃତ ହୋଇଥିବା କିମ୍ବା ତାଙ୍କ ବ୍ୟବହାର ପାଇଁ ସ୍ବତନ୍ତ୍ର ଭାବେ ପଞ୍ଜୀକୃତ ହୋଇଥିବା ଆବଶ୍ୟକ।
ଟୋଲ ଛାଡ଼ର ସୁବିଧା କେବଳ ସେହି ଗାଡ଼ିକୁ ମିଳିବ, ଯେଉଁଥିରେ ଏହି ସ୍ବତନ୍ତ୍ର ଫାଷ୍ଟଟ୍ୟାଗ ଲାଗିଥିବ। କୌଣସି ଅଯୋଗ୍ୟ ବ୍ୟକ୍ତି ଏହାର ଦୁରୁପଯୋଗ କରୁଥିବା ଧରାପଡ଼ିଲେ, ଫାଷ୍ଟଟ୍ୟାଗ ତୁରନ୍ତ ବ୍ଲାକ୍ଲିଷ୍ଟ କରାଯାଇପାରେ।
