ତିହିଡି଼,୨୦।୩(ସଞ୍ଜିତ ବଳ):ତିହିଡି଼ ବ୍ଲକ ଅଧୀନ ଚାରିତରଫ ସମବାୟ ସମିତି ମଣ୍ଡିରେ ୮ହଜାର କୁଇଣ୍ଟାଲରୁ ଅଧିକ ଧାନ ପଡ଼ି ରହିଛି l ମିଲରଙ୍କ ଅସହଯୋଗରୁ ଏହି ଧାନ ପଡ଼ି ରହିଥିବାରୁ ଚାଷୀଙ୍କ ପୁଞ୍ଜିଭୂତ ଅସନ୍ତୋଷ ଆନ୍ଦୋଳନର ରୂପ ନେଇଛି l ସମିତି ଅଧୀନ ଚାଷୀମାନେ ଶୁକ୍ରବାର ସକାଳେ ଧାନବସ୍ତା ରଖି ଭଦ୍ରକ -ଚାନ୍ଦବାଲି ରାଜ୍ୟ ରାଜପଥକୁ ଅବରୋଧ କରିଛନ୍ତି l ସମିତି ପରିଚାଳନା କମିଟି ସଭାପତି ବସନ୍ତ ନାୟକ ଓ କର୍ମକର୍ତ୍ତାଙ୍କ ସମେତ ଚାଷୀମାନେ ଏହି ଆନ୍ଦୋଳନରେ ସାମିଲ ହୋଇଛନ୍ତି l ତେବେ ରାସ୍ତା ଅବରୋଧ ହେବାର ୪ଘଣ୍ଟା ପରେ ତହସିଲଦାର ଜୟଦ୍ରଥ ଆଚାର୍ଯ୍ୟ ଓ ବ୍ଲକ ଯୋଗାଣ ନିରୀକ୍ଷକ ପ୍ରୀତିଶ ସାମଲ ରାସ୍ତାରୋକୋସ୍ଥଳରେ ପହଞ୍ଚି ଚାଷୀମାନଙ୍କ ସହ ଆଲୋଚନା କରିଥିଲେ। ଚାଷୀ ନେତା ମୁକ୍ତିକାନ୍ତ ନାୟକ ଓ ରାଜନଗର ପଞ୍ଚାୟତ ସରପଞ୍ଚଙ୍କ ପ୍ରତିନିଧି ଆନନ୍ଦ ଚନ୍ଦ୍ର ପାଣି ଦର୍ଶାଇଥିଲେ ଯେ, ମଣ୍ଡିରୁ ବିଗତ ୧୫ଦିନ ମଧ୍ୟରେ ମିଲର ଧାନ ଉଠାଇ ନାହାନ୍ତି l ଯାହାଫଳରେ ଚାଷୀ ଧାନ ବିକି ବି ପ୍ରାପ୍ୟ ପାଇ ପାରୁନାହାନ୍ତି l ଧାନ ବସ୍ତା ଖରା କାକରରେ ପଡ଼ି ରହିଥିଲେ ମଧ୍ୟ ମିଲରମାନେ ଏଥିପ୍ରତି ଦୃଷ୍ଟି ନ ଦେବା ପରିତାପର ବିଷୟ ହୋଇଛି l
ଅନ୍ୟମାନଙ୍କ ମଧ୍ୟରେ ପୀରହାଟ ଥାନା ଆଇଆଇସି ରୋଜାଲିନ ବେହେରା, ସମିତି ସମ୍ପାଦକ ମନୋରଞ୍ଜନ ବଳ, ପୂର୍ବତନ ସରପଞ୍ଚ ସୁଦର୍ଶନ ବିଶ୍ୱାଳ, ପୂର୍ବତନ ସମିତି ସମ୍ପାଦକ ସୁଦର୍ଶନ ସ୍ବାଇଁ, ବିଚିତ୍ର ବଳ, ସନ୍ଥ ଚରଣ ବିଶ୍ୱାଳ ପ୍ରମୁଖ ଆଲୋଚନାରେ ଅଂଶ ଗ୍ରହଣ କରିଥିଲେ। ତହସିଲଦାର ଆଚାର୍ଯ୍ୟ ଶୁକ୍ରବାର ୨ଟି ଓ ଅନ୍ୟଦିନରେ ଗୋଟିଏ ବଡ଼ ଟ୍ରକ ସହାୟତାରେ ଧାନବସ୍ତା ଉଠାଇବା ବ୍ୟବସ୍ଥା କରାଯିବ ବୋଲି ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା l
