ଅତାବିରା/ଗୋଡ଼ଭଗା , ୧୯ା୧୨(ଯୁଧିଷ୍ଠିର ମହାପାତ୍ର/ସୁରେଶ ଦାସ):ଧାନର ଅଭାବୀ ବିକ୍ରି ସହ ୪ ଦଫା ଦାବି ନେଇ ରାଜ୍ୟ କୃଷକ ସଂଗଠନ ଗତ ୯ ତାରିଖ ଏନ୍ଏଚ୍ ୫୩ ଗୋଡ଼ଭଗାଠାରେ ୩ଘଣ୍ଟା ଧରି ଧାନ ରଖି ଆନ୍ଦୋଳନ କରିଥିଲା। ପ୍ରଶାସନ ପକ୍ଷରୁ ଉପଜିଲାପାଳ ପ୍ରସନ୍ନ କୁମାର ପାଣ୍ଡେ, ଜିଲା ମୁଖ୍ୟ ଯୋଗାଣ ଅଧିକାରୀ ବିଭୁ ପ୍ରସନ୍ନ ଆଚାର୍ଯ୍ୟ, ଏସିଏସ୍ଓ ବ୍ୟୋମକେଶ ମାଝୀ ଓ ମିଲର୍ ସଂଘର ରାଜ୍ୟ ସମ୍ପାଦକ ନିତେଶ ବଂଶଲ ଯୋଗ ଦେଇଥିଲେ। ଦୀର୍ଘ ସମୟ ଧରି ଆନ୍ଦୋଳନକାରୀଙ୍କ ସହ ଆଲୋଚନା ହୋଇଥିଲା। ଅତାବିରା ନିୟନ୍ତ୍ରିତ ବଜାର କମିଟି ଅଧୀନ ସମସ୍ତ ଚାଷୀଙ୍କ ଟୋକନ ୨୦ ତାରିଖ ମଧ୍ୟରେ ଆସିବା ବ୍ୟବସ୍ଥା କରିବା, ଜାନୁଆରୀ ୧୫ ତାରିଖ ସୁଦ୍ଧା ଧାନ କିଣାବିକା ସରିବା ବ୍ୟବସ୍ଥା କରିବା, ପଞ୍ଜୀକରଣ କରିଥିବା ସମସ୍ତ ଜମିର ଟୋକନ ତୁରନ୍ତ ଜେନେରେଟ କରିବା, କ୍ବାଲିଟି ଟେଷ୍ଟ ମାର୍କେଟ ପଏଣ୍ଟରେ ଆରଏମ୍ସି ଓ ପ୍ୟାକ୍ସ କର୍ମଚାରୀଙ୍କ ଉପସ୍ଥିତିରେ ନିର୍ଦ୍ଧାରଣ କରିବା ପାଇଁ ପ୍ରଶାସନ ପକ୍ଷରୁ ଲିଖିତ ପ୍ରତିଶ୍ରୁତି ଦେଇଥିଲେ। ବିଗତ ଫସଲରେ କ୍ୱାଲିଟି ନାଁରେ ପ୍ୟାକେଟ ପିଛା ୧ କେଜିରୁ ୫ କେଜି ପର୍ଯ୍ୟନ୍ତ ଅଧିକାଂଶ ମିଲର କାଟିବାରୁ ଚାଷୀମାନେ ବହୁ କ୍ଷତି ସହୁଥିବାରୁ କୁଇଣ୍ଟାଲ ପ୍ରତି ସର୍ବାଧିକ ୧ କେଜି କଟ୍ନିଛଟ୍ନୀରେ ସୀମିତ ରଖିବାକୁ ତ୍ରିପାକ୍ଷିକ ଆଲୋଚନା ଅଣଔପଚାରିକ ଭାବେ ସହମତି ପ୍ରକାଶ ପାଇଥିଲା। ସମସ୍ତ ଟୋକନ ଜେନେରେଟ ହେବାର ପ୍ରତିଶ୍ରୁତିକୁ ଆଉ ୨ ଦିନ ଅଛି। ମାତ୍ର ୩୦ରୁ ୪୦ ପ୍ରତିଶତ ଟୋକନ ଆସିଛି। ବାକି ଏ ପର୍ଯ୍ୟନ୍ତ ଆସି ନାହିଁ। ଆଗାମୀ ଦୁଇ ଦିନ ମଧ୍ୟରେ ସମସ୍ତ ଟୋକନ ନ ଆସିଲେ କୃଷକ ସଂଗଠନ ବଡ଼ ଧରଣରେ ଆନ୍ଦୋଳନ କରିବାକୁ ଚେତାବନୀ ଦେଇଛି। ସମ୍ଭାବ୍ୟ ଆନ୍ଦୋଳନର ସମର୍ଥନ ପାଇଁ ଗୁରୁବାର ଅପରାହ୍ନରେ ସ୍ଥାନୀୟ ଅଗ୍ରସେନ ଭବନରେ ରେଂଗାଲିକେମ୍ପ, ଅତାବିରା ଓ ଗୋଡ଼ଭଗା ଅଞ୍ଚଳର ବିଭିନ୍ନ ସାମାଜିକ ସଂଗଠନର କର୍ମକର୍ତ୍ତାକୁ ନେଇ ସଂଗଠନ ସଭାପତି ବୀରେନ୍ଦ୍ର କରଙ୍କ ସଭାପତିତ୍ୱରେ ଏକ ବୈଠକ ବସିଥିଲା। ଏଥିରେ ଅତାବିରା ବଣିକ ସଂଘ, ଗୋଡ଼ଭଗା ନାଗରିକ କମିଟି, ଅବସରପ୍ରାପ୍ତ ସୈନିକ ସଂଘ, ଓକିଲ ସଂଘ, ବଜରଙ୍ଗ ଦଳ, ଆପ୍ ଦଳ ସମେତ ବହୁ ସଂଗଠନ ଓ ଚାଷୀ ଯୋଗ ଦେଇଥିଲେ। ପରେ ଏକ ଖବରଦାତା ସମ୍ମିଳନୀରେ ସଂଗଠନ ସଭାପତି କରଙ୍କ ସମେତ ସମ୍ପାଦକ ସୁରେଶ କର୍ଣ୍ଣ, ବୁଦ୍ଧଦେବ ନନ୍ଦ, ବି ପାପା ରାଓ, ଏସ ସୂର୍ଯ୍ୟନାରାୟଣ, ଭି ସତ୍ୟ ବାବୁଙ୍କ ଉପସ୍ଥିତିରେ ସାମ୍ବାଦିକ ସମ୍ମିଳନୀ ହୋଇଥିଲା। ୨୮ ତାରିଖରୁ ମଣ୍ଡୀ ଖୋଲିଥିଲେ ସୁଦ୍ଧା ସମସ୍ତ ଟୋକନ ଆସି ନାହିଁ। ଫଳରେ ମଣ୍ଡିଗୁଡ଼ିକରେ ଧାନ ପାହାଡ଼ ଭଳି ଭର୍ତ୍ତି ହୋଇଗଲାଣି। ଆଉ ଧାନ ରଖିବା ପାଇଁ ସ୍ଥାନ ନାହିଁ। ଚାଷୀ ମଣ୍ଡିରେ ଦିନରାତି ଜଗି ରହିଯାଉଛି। ମିଲରମାନେ ଆସୁ ନାହାନ୍ତି। ଧାନ ସଂଗ୍ରହ ମନ୍ଥର ଗତିରେ ଚାଲିଛି। କଟ୍ନୀଛଟ୍ନୀ ବହୁମାତ୍ରାରେ ବଢ଼ିବାରେ ଲାଗିଲାଣି। ଚାଷୀ ଶୋଷିତ ହୋଇ ତଳିତଳାନ୍ତ ହେବାକୁ ଯାଉଛନ୍ତି। ଧାନର ଗମ୍ଭୀର ପରିସ୍ଥିତିକୁ ନେଇ ଅତାବିରା ବ୍ଲକର ବିଭିନ୍ନ ସଙ୍ଗଠନକୁ ସମର୍ଥନ ଲୋଡ଼ାଯାଇଥିଲା। ପାଖାପାଖି ୧୨/୧୪ ଜଣ ସାମାଜିକ ସଂଘ ଯୋଗ ଦେଇ ଚାଷୀ ଆନ୍ଦୋଳନକୁ ସମର୍ଥନ ଜଣାଇବା ସହ ବିଭିନ୍ନ ପ୍ରସ୍ତାବମାନ ଦେଇଥିଲେ। ବିଗତ ଦିନରେ ରାସ୍ତାରୋକୋ ହୋଇଛି। ବିଗତ ଦିନରେ ଟୋକନ ଉଡ଼ିଯାଉଥିବାରୁ ୧୮ ଦିନ ଧରି ସମସ୍ତ ଅଫିସରେ ଧାନ ପୂରାଇ ସରକାରୀ କଳ ଅଚଳ କରାଯାଇଥିଲା। ସମସ୍ତ ଦୋକାନ ବଜାର ବନ୍ଦ ରହିଥିଲା। ବର୍ତ୍ତମାନ ଟୋକନ ସମସ୍ୟା, ଧାନ ସଂଗ୍ରହରେ ଉଚିତ ପଦକ୍ଷେପ ନ ନେଲେ ୨୦ ତାରିଖ ପରେ ଯେ କେଣସି ମୁହୂର୍ତ୍ତରେ କୌଣସି ପ୍ରକାର ଆନ୍ଦୋଳନ ଗ୍ରହଣ କରାଯିବ। ୧୯ ତାରିଖରେ ସମ୍ବଲପୁର ଆନ୍ଦୋଳନକୁ ଓ ରାଜ୍ୟ କୃଷକ ସଂଗଠନ ଅତାବିରା ସମର୍ଥନ ଜଣାଇଥିବା କର ସୂଚନା ଦେଇଥିଲେ।
Dharitri – Odisha’s No.1 Odia Daily
