ବରଗଡ଼,୬।୧୨(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ଖରିଫ ଧାନ ସଂଗ୍ରହ ପ୍ରକ୍ରିୟା ଚାଲିଛି। ଏହି ପ୍ରକ୍ରିୟାକୁ ୮ଦିନ ବିତି ଯାଇଛି। ହେଲେ ଧାନବିକ୍ରି ସମସ୍ୟା ଏପର୍ଯ୍ୟନ୍ତ ଅସମାହିତ ରହିଛି। କେଉଁଠି ଟୋକନ ଏବଂ ଧାନ ଉଠାଣ ସମସ୍ୟା ଲାଗି ରହିଛି ତ ଆଉ କେଉଁଠାରେ ମଣ୍ଡି(ଧାନକ୍ରୟ କେନ୍ଦ୍ର) ସ୍ଥାନାନ୍ତରଣକୁ ନେଇ ଅସନ୍ତୋଷ ଦେଖାଯାଇଛି। ବରଗଡ଼ ନିୟନ୍ତ୍ରିତ ବଜାର କମିଟି(ଆର୍ଏମ୍ସି) ଅଧୀନ ଗାଇସୀମା ମଣ୍ଡିକୁ ନେଇ ଏଭଳି ସ୍ଥିତି ଉପୁଜିଛି। ଉକ୍ତ ମଣ୍ଡିକୁ ମାଲିପାଲି ସ୍ଥାନାନ୍ତର କରାଯାଇ ଥିବାରୁ ଗାଇସୀମା ଗ୍ରାମର ଚାଷୀଙ୍କ ମଧ୍ୟରେ ଅସନ୍ତୋଷ ତେଜି ଉଠିଛି। ଏହି କ୍ରମରେ ଶୁକ୍ରବାର ଉକ୍ତ ଗ୍ରାମର ଚାଷୀମାନେ ବରଗଡ଼ ନିୟନ୍ତ୍ରିତ ବଜାର କମିଟିର ଅଧ୍ୟକ୍ଷା ତଥା ଅତିରିକ୍ତ ଜିଲାପାଳ ମଧୁଛନ୍ଦା ସାହୁଙ୍କ କାର୍ଯ୍ୟାଳୟ ଆଗରେ ଧାରଣା ଦେଇଥିଲେ। ଅତିରିକ୍ତ ଜିଲାପାଳ ସାହୁ ଧାରଣାରତ ଚାଷୀମାନଙ୍କ ସହିତ ସେମାନଙ୍କ ଦାବି ନେଇ ଆଲୋଚନା କରିଥିଲେ ଏବଂ ନିୟନ୍ତ୍ରିତ ବଜାର କମିଟି ସମ୍ପାଦକ କ୍ଷେତ୍ର ପରିଦର୍ଶନ କଲା ପରେ ବିହିତ ପଦକ୍ଷେପ ନିଆଯିବ ବୋଲି ନିର୍ଭର ପ୍ରତିଶ୍ରୁତି ଦେଇଥିଲେ। ଏହାପରେ ଚାଷୀମାନେ ଧାରଣାରୁ ଉଠିଥିଲେ।
ସୂଚନା ଅନୁଯାୟୀ, ଧାନ ସଂଗ୍ରହ ପ୍ରକ୍ରିୟା ସମୟରେ ଗାଇସୀମା ଗ୍ରାମରେ ଧାନମଣ୍ଡି ପ୍ରତିବର୍ଷ ଖୋଲି ଆସୁଥିଲା। ୮ୱାର୍ଡ ବିଶିଷ୍ଟ ଉକ୍ତ ଗ୍ରାମର ଏହି ମଣ୍ଡିରେ ସାଧାରଣତଃ ଖରିଫ୍ରେ ୪୦ହଜାର ଏବଂ ରବିରେ ୩୫ହଜାର କୁଇଣ୍ଟାଲ ଧାନ ସଂଗୃହୀତ ହୋଇଥାଏ। ମାତ୍ର ଏଥର ତାହା ମାଲିପାଲି ଗ୍ରାମକୁ ସ୍ଥାନାନ୍ତର ହୋଇଛି ଏବଂ ଶୁକ୍ରବାର ସେଠାରେ ପୂଜାପାଠ ସହିତ ଧାନ ସଂଗ୍ରହ ପ୍ରକ୍ରିୟାର ଶୁଭାରମ୍ଭ ହୋଇଛି। ଏହା ଜାଣିବା ପରେ ଗାଇସୀମା ଗ୍ରାମର ଚାଷୀମାନେ ଅତିରିକ୍ତ ଜିଲାପାଳଙ୍କ କାର୍ଯ୍ୟାଳୟକୁ ଆସି ସେମାନଙ୍କ ଅସନ୍ତୋଷ ପ୍ରକାଶ କରିଥିଲେ।
ସେହିପରି ଗ୍ରାମର ଚାଷୀମାନଙ୍କ କ୍ଷେତ୍ରରେ ଟୋକନ ମଧ୍ୟ ଏକ ବଡ଼ ସମସ୍ୟା ପାଲଟିଛି। ଚାଷୀମାନେ ଦୀର୍ଘଦିନ ହେଲା ଧାନ ଅମଳ କରି କ୍ଷେତ, ଖଳାରେ ରଖିଛନ୍ତି। ମାତ୍ର ଏପର୍ଯ୍ୟନ୍ତ ସେମାନଙ୍କୁ ଟୋକନ ମିଳିପାରି ନାହିଁ। ଫଳରେ ଧାନବିକ୍ରିରୁ ସେମାନେ ଏପର୍ଯ୍ୟନ୍ତ ବଞ୍ଚିତ ରହି ବିଭିନ୍ନ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ କରିଛନ୍ତି। ଏ ଦିଗରେ ବିହିତ ପଦକ୍ଷେପ ନେବା ଦାବିରେ ଚାଷୀମାନେ ସମବାୟ ସମୂହ ଉପନିବନ୍ଧକ(ଡିଆରସିଏସ୍)ଙ୍କ ପାଖକୁ ଆସି ସେମାନଙ୍କ ଅଭିଯୋଗ ଜଣାଇଥିଲେ। ଚାଷୀନେତା ସୁରେଶ ନେକାଣ୍ଟି, ନିରଞ୍ଜନ ପ୍ରଧାନଙ୍କ ନେତୃତ୍ୱରେ ଚାଷୀମାନେ ଅତିରିକ୍ତ ଜିଲାପାଳ ଏବଂ ଡିଆରସିଏସ୍ଙ୍କ କାର୍ଯ୍ୟାଳୟକୁ ଆସିଥିଲେ।
Dharitri – Odisha’s No.1 Odia Daily
