ଲୋଇସିଂହା,୬।୯: ବଲାଙ୍ଗୀର ଜିଲା ଆଗଲପୁର ବ୍ଲକର କେତେକ ପଞ୍ଚାୟତର ଚାଷୀ ୨୦୨୦-୨୧ ପ୍ରଧାମନ୍ତ୍ରୀ ଫସଲ ବୀମା ସହାୟତା ପାଇବାରୁ ବଞ୍ଚିତ ହୋଇଛନ୍ତି l ଏହାର ପ୍ରତିବାଦରେ ଜୁଲାଇ ୨୬ରେ ଚାଷୀ ରାଜପଥ ଅବରୋଧ କରିଥିଲେ। ହେଲେ କୌଣସି ସୁଫଳ ମିଳି ନ ଥିଲା। ମଙ୍ଗଳବାର ପୁଣି ଲୋଇସିଂହା ଥାନା ଅନ୍ତର୍ଗତ ରୁଗୁଡ଼ିଖାଲଠାରେ ଆଗଲପୁର ବ୍ଲକ କୃଷକ ସଂଘ ସଭାପତି ରତ୍ନାକର ମିଶ୍ରଙ୍କ ଅଧ୍ୟକ୍ଷତାରେ ବଲାଙ୍ଗୀର-ବରଗଡ଼ ୨୬ ନମ୍ବର ଜାତୀୟ ରାଜପଥକୁ ଅବରୋଧ କରାଯାଇଛି। ଏଥିରେ ନୁନିଆପାଲି, ଝାରଣୀପାଲି ନଅଗା(ଖ), ବେନ୍ଦ୍ରା, ସଲେଭଟା, ପଟୁଆପାଲି ପଞ୍ଚାୟତର ଚାଷୀ ଏହି ଆନ୍ଦୋଳନରେ ସାମିଲ ହୋଇଛନ୍ତି । ଆନ୍ଦୋଳନରେ ଜିଲା କୃଷକ ମହାସଂଘ ସଭପତି ଜ୍ୟୋତି ପଧାନ, ସୌମେନ୍ଦ୍ର ପରିଚ୍ଛା, ବଲାଙ୍ଗୀର କୃଷକ ସଂଘର୍ଷ ସଙ୍ଘ ସଭାପତି ବିଭୂତି ମିଶ୍ର ସାମିଲ ହୋଇ କେନ୍ଦ୍ର ଓ ରାଜ୍ୟ ସରକାରଙ୍କୁ ତୀବ୍ର ସମାଲୋଚନା କରିଛନ୍ତି। ସକାଳ ୮ଟାରୁ ଆନ୍ଦୋଳନ ଜାରି ରହିଥିଲେ ବି ଜିଲା ପ୍ରଶାସନ ପକ୍ଷରୁ କେହି ଆଲୋଚନା ପାଇଁ ଆସି ନ ଥିବା ଜଣାପଡ଼ିଛି। ଏହାକୁ ନେଇ ବିକ୍ଷୋଭ ସ୍ଥଳରେ ଉତ୍ତେଜନା ପ୍ରକାଶ ପାଇଛି। ବିକ୍ଷୋଭକାରୀଙ୍କ ବିନା ଅନୁମତିରେ କୋସଲ ଯୁବ କମିଟି ସଦସ୍ୟ ବିକ୍ଷୋଭ ସ୍ଥଳରେ ନାରାବାଜି କରିଥିଲେ। ଏହାକୁ ନେଇ କୋସଲ ଯୁବ ସଦସ୍ୟ ଓ ଆନ୍ଦୋଳନକାରୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା।
