ଭଞ୍ଜନଗର,୮।୨(ବାବୁଲା ପ୍ରଧାନ): ଦେଶରେ ହୁ ହୁ ହୋଇ ଜନସଂଖ୍ୟା ବଢ଼ିବାରେ ଲାଗିଛି । ଜନସଂଖ୍ୟା ବୃଦ୍ଧି ଯୋଗୁଁ ଲୋକେ ବଞ୍ଚିବା ପାଇଁ ବିଭିନ୍ନ ଆବଶ୍ୟକତା ବଢୁଛି । ଏହାଦ୍ବାରା ବିଶେଷ ଭାବେ ଜଙ୍ଗଲର ପ୍ରାକୃତିକ ସମ୍ପଦ କ୍ଷତି ହେଉଛି। ଜଙ୍ଗଲ କ୍ଷୟ ଯୋଗୁଁ ଜଙ୍ଗଲରେ ବସବାସ କରୁଥିବା ବନ୍ୟପ୍ରାଣୀ ବିପଦରେ ପଡ଼ୁଛନ୍ତି । ଏହି ସମୟରେ ଖାଦ୍ୟ ଅନ୍ୱେଷଣରେ ବନ୍ୟପ୍ରାଣୀ ଆଜି ଗାଁ ମୁହାଁ ହୋଇ ଚାଷୀଙ୍କ ଫସଲ କ୍ଷତି କରୁଛି । ଘରଦ୍ୱାର ଭାଙ୍ଗୁଛି। ଏହି ସମୟରେ ମଣିଷ ଓ ବନ୍ୟପ୍ରାଣୀ ମଧ୍ୟରେ ଲଢେ଼ଇ ହେଉଛି। ଏଥିରେ ଉଭୟ ପକ୍ଷ କ୍ଷତି ଶହୁଛନ୍ତି।
ଏହିଭଳି ପରିସ୍ଥିତିରେ ଫସଲ କ୍ଷତିକୁ ଦେଖି ବିଭିନ୍ନ ସମୟରେ ଚାଷୀମାନେ ଚାଷ କାର୍ଯ୍ୟରୁ ଦୂରେଇ ରହିବା ପାଇଁ ନିଷ୍ପତ୍ତି ନେଉଛନ୍ତି । ଭଞ୍ଜନଗର ଘୁମୁସର ଉତ୍ତର ବନଖଣ୍ଡର ଅନେକ ସ୍ଥାନରେ ବନ୍ୟପ୍ରାଣୀ ବିଶେଷ କରି ହାତୀ, ବାରାହା ଚାଷୀଙ୍କ ଫସଲ କ୍ଷତି କରୁଛନ୍ତି । ଗତ ଶୁକ୍ରବାର ଏକ ମାଈ ହାତୀ ଏହି ବନଖଣ୍ଡ ଘୋଡ଼ାଦାଣ୍ଡିର ଚାଷୀ ଚୈତନ୍ୟ ଗୁଟାଜିଙ୍କ ବଗିଚାରେ ପଶି ଏକାଧିକ ନଡ଼ିଆ ଗଛ ନଷ୍ଟ କରିଛି । ଚୈତନ୍ୟ ନଡ଼ିଆ ଗଛ ଗୁଡିକୁ ପ୍ରାୟ ୭ ବର୍ଷ ତଳେ ଲଗାଇଥିଲେ। ବର୍ତ୍ତମାନ ନଡ଼ିଆ ଫସଲ ଅମଳ ଆରମ୍ଭ ହୋଇଥିବା ବେଳେ ହାତୀ ପଶି ୧୦ ମିନିଟ ରେ ଏକାଧିକ ଗଛକୁ ନଷ୍ଟ କରିଦେଇଛନ୍ତି। ବିଗତ କିଛି ବର୍ଷ ହେବ ଏହିଭଳି ବାରମ୍ବାର ହାତୀ ଉକ୍ତ ବଗିଚାରେ ପଶି ଫସଲ କ୍ଷତି କରୁଛନ୍ତି ।
ଗୋଟିଏ ଗଛକୁ ବଡ କରିବା ପାଇଁ ୫ ରୁ ୭ ବର୍ଷ ଲାଗୁଥିବା ବେଳେ ହାତୀ କିଛି ମିନିଟ ମଧ୍ୟରେ ଫସଲକୁ ନଷ୍ଟ କରିଦେଉଛି । ଫଳରେ ଚାଷୀଙ୍କ ସ୍ବପ୍ନ ସ୍ବପ୍ନରେ ହିଁ ରହିଯାଉଛି । ତେଣୁ ଅନେକ ଚାଷୀ ଚାଷ କାର୍ଯ୍ୟରୁ ଦୂରେଇ ରହିବା ପାଇଁ ଚିନ୍ତା କରୁଛନ୍ତି । ଯାହାକି ଚିନ୍ତାଜନକ ବିଷୟ ପାଲଟିଛି । ଏଥିପ୍ରତି ସରକାର ଦୃଷ୍ଟି ଦେଇ ସ୍ଵତନ୍ତ୍ର କିଛି ପଦକ୍ଷେପ ନେବାକୁ ଦାବୀ ହୋଇଛି ।
