ବରଗଡ଼,୨୮।୭(ପ୍ରେମାନନ୍ଦ ଖମାରୀ):ଛୋଟ ପରିବାର, ସୁଖୀ ପରିବାର। ଏହି ଶ୍ଲୋଗାନ ଦେଇ ପରିବାର ନିୟୋଜନ ଅସ୍ତ୍ରୋପଚାର ପାଇଁ ପ୍ରୋତ୍ସାହିତ କରାଯାଉଛି। ଏହି ଅସ୍ତ୍ରୋପଚାର କେବଳ ଜନସଂଖ୍ୟା ନିୟନ୍ତ୍ରଣ ପାଇଁ ନୁହେଁ। ମା’ମାନଙ୍କ ସ୍ବାସ୍ଥ୍ୟ, ଶିଶୁର ପୃଷ୍ଟି ଏବଂ ପରିବାର ଆର୍ଥିକ ସ୍ଥିତିକୁ ସୁଦୃଢ଼ କରିବା ମଧ୍ୟ ପରିବାର ନିୟୋଜନ ଅସ୍ତ୍ରୋପଚାରର ଲକ୍ଷ୍ୟ। ତେବେ ଏଭଳି ଲକ୍ଷ୍ୟ ନେଇ ସରକାର ପରିବାର ନିୟୋଜନ ଅସ୍ତ୍ରୋପଚାର କାର୍ଯ୍ୟକ୍ରମ ହାତକୁ ନେଇଥିବାବେଳେ ବିଭିନ୍ନ ସମୟରେ ଏହା ବାଟବଣା ହୋଇ ପଡୁଥିବା ଅଭିଯୋଗ ହେଉଛି। ସୋମବାର ବରଗଡ଼ ସଦର ଥାନା ଅନ୍ତର୍ଗତ ନିଲେଶ୍ୱର ଗ୍ରାମର ଅଶୋକ ସାହୁ ଭଟଲି ଥାନାରେ ଏଭଳି ଏକ ଅଭିଯୋଗ କରି ଏତଲା ଦେଇଛନ୍ତି। ପରିବାର ନିୟୋଜନ ଅସ୍ତ୍ରୋପଚାରରେ ତ୍ରୁଟି ଯୋଗୁ ତାଙ୍କ ସ୍ତ୍ରୀ ବିଲାସିନୀଙ୍କ ମୃତ୍ୟୁ ହୋଇଥିବା ସେ ପୋଲିସରେ ଅଭିଯୋଗ କରିଛନ୍ତି।
ସେ ଥାନାରେ ଦେଇଥିବା ଏତଲାରେ ଉଲ୍ଲେଖ କରିଛନ୍ତି, ଗତ ୨୦ତାରିଖ ସ୍ଥାନୀୟ ଆଶା ତାଙ୍କ ସ୍ତ୍ରୀ ବିଲାସିନୀଙ୍କୁ ପରିବାର ନିୟୋଜନ ଅସ୍ତ୍ରୋପଚାର ପାଇଁ ଖେଦାପାଲିସ୍ଥିତ ଜିଲା ମୁଖ୍ୟ ଡାକ୍ତରଖାନାକୁ ଆଣିଥିଲେ। ସେହିଦିନ ବିଲାସିନୀଙ୍କ ପରିବାର ନିୟୋଜନ ଅସ୍ତ୍ରୋପଚାର କରାଯାଇଥିଲା ଏବଂ ଅସ୍ତ୍ରୋପଚାର ପରେ ତାଙ୍କୁ ଘରେ ଛାଡ଼ି ଦିଆଯାଇଥିଲା। ମାତ୍ର ରାତିରେ ବିଲାସିନୀଙ୍କୁ ବାନ୍ତି ହୋଇଥିଲା। ଫଳରେ ଗତ ୨୧ତାରିଖ ପୁଣି ତାଙ୍କୁ ଜିଲା ମୁଖ୍ୟ ଡାକ୍ତରଖାନାକୁ ସ୍ବାସ୍ଥ୍ୟ ପରୀକ୍ଷା ପାଇଁ ଅଣାଯାଇଥିଲା। ମାତ୍ର ସେଠାରେ ସେତେବେଳେ କାର୍ଯ୍ୟରତ ଡାକ୍ତର ତାଙ୍କୁ ଭୀମସାର୍, ବୁର୍ଲା ଡାକ୍ତରଖାନାକୁ ସ୍ଥାନାନ୍ତର କରିଥିଲେ। ବୁର୍ଲା ଡାକ୍ତରଖାନାରେ ସ୍ବାସ୍ଥ୍ୟ ପରୀକ୍ଷା ପରେ ବରଗଡ଼ ଜିଲା ମୁଖ୍ୟ ଡାକ୍ତରଖାନାରେ ହୋଇଥିବା ପରିବାର ନିୟୋଜନ ଅସ୍ତ୍ରୋପଚାରବେଳେ ବିଲାସିନୀଙ୍କ ଖାଦ୍ୟନଳୀକୁ କାଟି ଦିଆଯାଇ ଥିବା ଯୋଗୁ ପେଟ ଭିତରେ ଖାଦ୍ୟ ଜମି ରହୁଥିବାରୁ ତାଙ୍କ ସ୍ବାସ୍ଥ୍ୟାବସ୍ଥା ସଂକଟାପନ୍ନ ହୋଇ ପଡ଼ିଥିବା ଡାକ୍ତରମାନେ କହିଥିଲେ ଏବଂ ପୁଣି ଅସ୍ତ୍ରୋପଚାର କରି ଆଇସିୟୁରେ ତାଙ୍କୁ ଭର୍ତ୍ତି କରାଯାଇଥିଲା। ମାତ୍ର ଗତ ୨୩ତାରିଖ ଚିକିତ୍ସାଧୀନ ଅବସ୍ଥାରେ ବିଲାସିନୀଙ୍କ ମୃତ୍ୟୁ ହୋଇ ଯାଇଥିଲା ଅଭିଯୋଗ କରି ଏ ଦିଗରେ ବିହିତ କାର୍ଯ୍ୟାନୁଷ୍ଠାନ ନେବାକୁ ଅଶୋକ ପୋଲିସକୁ ଦେଇଥିବା ଏତଲାରେ ଉଲ୍ଲେଖ କରିଛନ୍ତି।
Dharitri – Odisha’s No.1 Odia Daily
