ଲୋଇସିଂହା,୧୩।୪(ସୁଶାନ୍ତ ବାରିକ): ସାଙ୍ଗମାନଙ୍କ ସହିତ ଯାତ୍ରା ଦେଖିଯିବା ହେଲା କାଳ। ଶୁକ୍ରବାର ରାତିରେ ବଲାଙ୍ଗୀର ଜିଲା ଲୋଇସିଂହା ଥାନା କୁଟେନପାଲି ନିକଟରେ ଏକ ଅଜଣା ଗାଡି ଧକ୍କାରେ ଜଣେ ଯୁବକଙ୍କ ମୃତ୍ୟୁ ଘଟିଛି। ମୃତ ଯୁବକ ହେଲେ ବଲାଙ୍ଗୀର ଜିଲା ଲୋଇସିଂହା ଥାନା ଅନ୍ତର୍ଗତ ଲୁହୁରାପାଲି ଗ୍ରାମର ସୁଶୀଲ ଧରୁଆ(୩୫) ା ଲୋଇସିଂହା ପୋଲିସ ମୃତଦେହ ଜବତ କରି ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ଏଣ୍ଡ ହସ୍ପିଟାଲରେ ବ୍ୟବଚ୍ଛେଦ କରାଇ ଶନିବାର ପରିବାର ଲୋକଙ୍କୁ ହସ୍ତାନ୍ତର କରିଛି। ସୁଶୀଲଙ୍କ ମୃତ୍ୟୁ ପରେ ସ୍ତ୍ରୀ ଗୀତାଞ୍ଜଳି ଏବଂ ୨ଝିଅ ରୁଜି(୧୨) ଓ ପ୍ରିତି (୮)ଅସହାୟ ହୋଇ ପଡିଛନ୍ତି। ଏନେଇ ଲୋଇସିଂହା ଥାନାରେ ଏକ ଦୁର୍ଘଟଣା ମାମଲା (ନଂ.୮୨।୨୦୨୬) ରୁଜୁକରି ପୋଲିସ ଅଧିକ ତଦନ୍ତ ଚଳାଇଛି। ସୁଶୀଲଙ୍କୁ ହତ୍ୟାକରି ଦୁର୍ଘଟଣାର ରୂପ ଦିଆଯାଉଥିବା ପରିବାର ଲୋକେ ଅଭିଯୋଗ କରିବା ପରେ ସୁଶୀଲଙ୍କ ମୃତ୍ୟୁ ହତ୍ୟା ନା ଆତ୍ମହତ୍ୟା ତାହା ତଦନ୍ତ ପରେ ଜଣାପଡ଼ିବ।
ସୂଚନା ଅନୁଯାୟୀ, ଲୋଇସିଂହା ଥାନା ଦୁମଦୁମି ଛକରେ ସମଲେଇ ମନ୍ଦିର ପ୍ରତିଷ୍ଠା ଉତ୍ସବ ଚାଲିଛି। ଶୁକ୍ରବାର ସନ୍ଧ୍ୟାରେ ସମ୍ବଲପୁରୀ ଅର୍କେଷ୍ଟ୍ରା ପ୍ରୋଗ୍ରାମ ରହିଥିଲା। ସୁଶୀଲ ଗ୍ରାମର ୫ରୁ ୬ ଜଣ ସାଙ୍ଗଙ୍କ ସହିତ ଅର୍କେଷ୍ଟ୍ରା ଦେଖିବାକୁ ଯାଇଥିଲେ। ରାତି ସାଢେ ୧୦ଟାବେଳେ ଯାତ୍ରା ପଡିଆଠାରୁ ଅଳ୍ପବାଟ ଲୋଇସିଂହା-ପଦ୍ମପୁର ରାସ୍ତା କୁଟେନପାଲି ନିକଟସ୍ଥ କଲର୍ଭଟ ନିକଟରେ ରାସ୍ତା ଉପରେ ଜଣେ ଯୁବକ ଗୁରୁତର ଅବସ୍ଥାରେ ପଡିଥିବା ଲୋଇସିଂହା ପୋଲିସକୁ ଖବର ମିଳିଥିଲା। ସେଠାରେ ଲୋଇସିଂହା ପୋଲିସ ପହଞ୍ଚତ୍ ଆମ୍ବୁଲାନ୍ସ ଡକାଇ ସୁଶୀଲଙ୍କୁ ଗୁରୁତର ଅବସ୍ଥାରେ ଲୋଇସିଂହା ଡାକ୍ତରଖାନାକୁ ଆଣିଥିଲା। ଅବସ୍ଥା ସଂକଟାପନ୍ନ ଥିବାରୁ ତାଙ୍କୁ ବଲାଙ୍ଗୀର ଭୀମ ଭୋଇ ମେଡିକାଲକୁ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ସୁଶୀଲଙ୍କୁ ମୃତ ଘୋଷଣା କରିଥିଲେ। ମୃତ ସୁଶୀଲଙ୍କ ବଡଭାଇ ଘନଶ୍ୟାମ କହିଛନ୍ତି, ଆମ୍ବୁଲାନ୍ସ କର୍ମଚାରୀଙ୍କଠାରୁ ସୂଚନା ପାଇ ଲୋଇସିଂହା ଡାକ୍ତରଖାନାରେ ପହଞ୍ଚତ୍ଥିଲେ। ତାଙ୍କ ଭାଇର ମୁଣ୍ଡରେ ଗଭୀର ଆଘାତ ଲାଗିଥିବା ଦେଖିବାକୁ ପାଇଥିଲେ। ଘଟଣାସ୍ଥଳରେ ତାଙ୍କ ଭାଇଙ୍କ ମୃତ୍ୟୁ ହୋଇଥିବା ସେ ସନ୍ଦେହ କରିଛନ୍ତି। ତାଙ୍କ ଭାଇକୁ ଯୋଜାନବଦ୍ଧ ଭାବେ ହତ୍ୟାକରି ରାସ୍ତା ଉପରେ ଫିଙ୍ଗି ଦେଇଥିବା ସେ ସନ୍ଦେହ କରିଛନ୍ତି। ଏହି ଘଟଣା ପରେ ସାଙ୍ଗରେ ଯାଇଥିବା ଯୁବକମାନେ କୁଆଡେ ଫେରାର ହୋଇଯାଇଛନ୍ତି। ଯାହାକି ସାଧାରଣରେ ରହସ୍ୟ ବଢାଇଛି। ଏସମ୍ପର୍କରେ ଆଇଆଇସି ସିପୋରାସରାୟ ଲୁଗୁନ କହନ୍ତି, ରାସ୍ତା ଉପରେ ଗୁରୁତର ଅବସ୍ଥାରେ ପଡି ରହିଥିଲେ, ଏଣୁ ରାସ୍ତା ପାରି ହେଉଥିବାବେଳେ କୌଣସି ଗାଡି ତାଙ୍କୁ ଧକ୍କା ଦେଇଥିବ ବୋଲି ସେ କହିଛନ୍ତି। ବ୍ୟବଚ୍ଛେଦ ରିପୋର୍ଟ ଆସିଲା ପରେ ସ୍ପଷ୍ଟ ହେବ ବୋଲି ଆଇଆଇସି ଲୁଗୁନ କହିଛନ୍ତି। ଲୋଇସିଂହା ପଟରେ ସୁଶୀଲଙ୍କ ଗାଁ ରହିଥିବାବେଳେ କୁଟେନପାଲି ପଟକୁ କାହିଁକି ସେ ଯାଇଥିଲେ ଏବଂ ସାଙ୍ଗରେ ଥିବା ଯୁବକମାନେ ସେତେବେଳେ କୁଆଡେ ଯାଇଥିଲେ ବୋଲି ପରିବାର ଲୋକେ ଅଭିଯୋଗ କରିଛନ୍ତି। ପ୍ରକାଶ ଥାଉକି, ଶୁକ୍ରବାର ଅର୍କେଷ୍ଟ୍ରା ଚାଲିଥିବାବେଳେ ଏକାଧିକ ଗଣ୍ଡଗୋଳ ଘଟିଥିବା ସାଧାରଣରେ ଆଲୋଚନା ହେଉଛି। ସୁଜିଆ ଅଞ୍ଚଳର ଜଣେ ଯୁବକଙ୍କୁ ନିର୍ଧୁମ ମାଡ ମରାଯାଇଥିବା ଆଲୋଚନା ହେଉଛି। ମୁଣ୍ଡ ପଛପଟେ ଆଘାତ ଲାଗିଥିବାରୁ ଆକ୍ରମଣକାରୀଙ୍କ ମାଡରେ ସୁଶୀଲଙ୍କ ମୃତ୍ୟୁ ହୋଇଥିବା ପରିବାର ଲୋକେ ସନ୍ଦେହ କରୁଛନ୍ତି। ପୋଲିସ ପକ୍ଷରୁ ଅଧିକ ତଦନ୍ତ ହେଲା ପରେ ରହସ୍ୟର ପରଦା ହଟିବ ବୋଲି ସାଧାରଣରେ ମତପ୍ରକାଶ ପାଉଛି।
