ପଟ୍ଟାମୁଣ୍ଡାଇ,୨ା୧୦ (କଳ୍ପତରୁ ନାୟକ):ଜଙ୍ଗଲ ଜମିରେ ରାଜନଗର ବିଧାୟକ ଧ୍ରୁବ ସାହୁ ହୋଟେଲ କରିଥିବା ନେଇ ପଟ୍ଟାମୁଣ୍ଡାଇ ମେଡିକାଲ ଛକ ଓ ରାଜନଗରରେ ସେପ୍ଟେମ୍ବର ୨୯ରେ କଂଗ୍ରେସ ପକ୍ଷରୁ ବିକ୍ଷୋଭ, କୁଶପୁତ୍ତଳିକା ଦାହ, ଖବରଦାତା ସମ୍ମିଳନୀ କରାଯାଇଥିଲା। ରବିବାର ବରିଷ୍ଠ ବିଜେଡି ନେତା ତଥା ଆଇନଜୀବୀ କ୍ଷୀରୋଦ ପ୍ରଧାନ ଏକ ପ୍ରେସ୍ ବିବୃତିରେ ଏହାର ଜବାବ ରଖିଛନ୍ତି। ସେ ରାଜନଗର କଂଗ୍ରେସ ଆଣିଥିବା ଅଭିଯୋଗକୁ ଖଣ୍ଡନ କରିବା ସଙ୍ଗେ କଂଗ୍ରେସର ବିଧାୟକ ସାହୁଙ୍କ ବିରୋଧରେ ଏକ କପୋଳ କଳ୍ପିତ ଓ ମନଗଢା କାହାଣୀ ରଚିଛି ବୋଲି କହିଛନ୍ତି। କଂଗ୍ରେସର ଅଭିଯୋଗରେ ସତ୍ୟତା ନାହିଁ ଏବଂ ଜଣେ ଜନପ୍ରିୟ ବିଧାୟକଙ୍କୁ ଜନତାଙ୍କ ସମ୍ମୁଖରେ ମିଥ୍ୟା ଆରୋପ କରି ତାଙ୍କ ଜନ ସମର୍ଥନକୁ ପ୍ରତିରୋଧ କରିବା ଏକ ଷଡଯନ୍ତ୍ର ଥିଲା। ବିଧାୟକଙ୍କ ନାମରେ ନେଇଥିବା ଯେଉଁ ଜମି ଉପରେ କଂଗ୍ରେସ ଅଭିଯୋଗ ଉଠାଇଛି ସେ ଅଞ୍ଚଳରେ ବିଧାୟକ ଧ୍ରୁବ ସାହୁ କିମ୍ବା ତାଙ୍କ ପରିବାରର କୌଣସି ସଦସ୍ୟ ନାମରେ ଜମି ନାହିଁ ବୋଲି ସେ ଦୃଢତାର ସହିତ କହିଛନ୍ତି। ଯଦି କଂଗ୍ରେସ ପାଖରେ ଏହାର ପ୍ରମାଣ ଅଛି ତାହା ହେଲେ ତାହାକୁ ସାର୍ବଜନିନ କରାଯାଉ ବୋଲି ସେ ଆହ୍ବାନ ଦେଇଛନ୍ତି। ବିଧାୟକ କୌଣସି ସ୍ଥାନରେ ଜଙ୍ଗଲ ଜମି ହେଉ କି ସରକାରୀ ଜମି ଦଖଲ କରିନାହାନ୍ତି ବୋଲି ସେ ଏହି ପ୍ରେସ ବିବୃତିରେ ସ୍ପଷ୍ଟ କରାଇଛନ୍ତି। କଂଗ୍ରେସ ଯେଉଁ ଅଞ୍ଚଳରେ ହୋଟେଲ କଥା କହୁଛି ସେହି ମୌଜା ବାଙ୍କୁଆଳରେ। ଜମି ଦଖଲରେ ଥିବା ବ୍ୟକ୍ତି ହେଲେ କମଳିନୀ କୁଅଁର, ଖଗେଶ୍ୱର କୁଅଁର, ଦୀନବନ୍ଧୁ କୁଅଁର, ନିରାକାର କୁଅଁର, ପ୍ରମିଳା କୁଅଁର, ସୁକାନ୍ତ କୁଅଁର, ଅଭୟ ଦଳାଇ, ଉର୍ମିଳା ଦଳାଇ, ଚିନା ଦଳାଇ, ନିର୍ମଳ ଦଳାଇ, ମୀନକେତନ ପାଢ଼ୀ, କେଶବାନନ୍ଦ ବେହେରା, ବାବାଜୀ ବେହେରା, ଭାଗୀରଥି ବେହେରା, ମଦନ ବେହେରା, ସୁଜାତା ରାଉତ, ସୂର୍ଯ୍ୟ ନାରାୟଣ ଲେଙ୍କା, ଦୁର୍ଯ୍ୟୋଧନ ସ୍ବାଇଁ, ବୃନ୍ଦାବନ ସ୍ବାଇଁ। ଏଠାରେ ପ୍ରଶ୍ନ ଉଠୁଛି ବିଧାୟକଙ୍କ ସମ୍ପୃକ୍ତି କେଉଁଠି ରହିଲା। ଯଦି କଂଗ୍ରେସ ଏହାର ସତ୍ୟତା ପ୍ରମାଣ ନ କରେ କାହିଁକି ତାଙ୍କ ବିରୋଧରେ ବିଧାୟକଙ୍କ ସମ୍ମାନହାନୀ ମକଦ୍ଦମା କରା ନ ଯିବ ତାହାର ଜବାବ ପଟ୍ଟାମୁଣ୍ଡାଇ-ରାଜନଗର କଂଗ୍ରେସ ଦେଉ ବୋଲି ସେ କହିଛନ୍ତି। ସେ ତାଙ୍କ ଅଭିଯୋଗରେ କହିଛନ୍ତି, ପଟ୍ଟାମୁଣ୍ଡାଇ ଅଞ୍ଚଳରେ ନୟନଜୋରି ଓ ସରକାରୀ ଜମି କଂଗ୍ରେସର କେତେଜଣ ପ୍ରଭାବଶାଳୀ ବ୍ୟକ୍ତିଙ୍କ କବଜାରେ ରହିଛି। ଏହା ମଧ୍ୟ ଅନୁସନ୍ଧାନ ସାପେକ୍ଷ। କଂଗ୍ରେସ ପ୍ରଥମେ ଆଇନକୁ ସମ୍ମାନ ଦେଇ ଜବରଦଖଲରେ ଥିବା ନଦୀ ଜମିକୁ ଜବରଦଖଲ ମୁକ୍ତ କରୁ ବୋଲି ବିଜେଡି ନଗର ସଭାପତି ଖଗେଶ୍ୱର ଲେଙ୍କା, ବ୍ଲକ ବିଜେଡି ସଭାପତି କିଶୋର ସାହୁ, ଯୁବବାହିନୀ ସମ୍ପାଦକ ଦିଲୀପ ସାହୁ, ପୂର୍ବତନ ପୌର ଉପାଧ୍ୟକ୍ଷ ସୁମନ୍ତ ପାତ୍ର, ବାପି ସାମଲ, ପିଣ୍ଟୁ ସେଠୀ ଓ ପୂର୍ବତନ କାଉନସିଲର ମଳୟ ମଲିକ ପ୍ରମୁଖ କଂଗ୍ରେସ ଉପରେ ବର୍ଷିବା ସହ କଂଗ୍ରେସ ଏଥିପାଇଁ କ୍ଷମା ପ୍ରାର୍ଥନା କରୁ, ନ ହେଲେ ଆଇନର ଆଶ୍ରୟ ନେବୁ ବୋଲି କହିଛନ୍ତି।
