ବ୍ରହ୍ମପୁର,୨୩।୧୧(ସୁବାସ ଚନ୍ଦ୍ର ପାଢ଼ୀ): ବ୍ରହ୍ମପୁର ସଦର ଥାନା ପୋଲିସ ପଦରବାଲି ଛକରୁ ଜଣେ ନକଲି ପୋଲିସ କନ୍ଷ୍ଟେବଲଙ୍କୁ ରବିବାର ଗିରଫ କରିଛି। ସେ ହେଲେ ନାରାୟଣପୁର ଗ୍ରାମର କେଦାରନାଥ ସ୍ବାଇଁ ଓରଫ ମନୋଜ କୁମାର ସ୍ବାଇଁ (୩୭)। ତାଙ୍କଠାରୁ ପୋଲିସ ପୋଷାକ, ଖେଳନା ବନ୍ଧୁକ, ଜୋତା, ବେଲ୍ଟ, ପୋଲିସ ଲାଠି, ମନୋଜ କୁମାର ସ୍ବାଇଁ ଲେଖାଥିବା ପୋଲିସ ନେମ୍ ପ୍ଲେଟ, ପୋଲିସ ପୋଷାକରେ ଥିବା ବେଳେ ଉଠାଯାଇଥିବା ୨ଟି ଫଟୋ ସହ ଅନ୍ୟାନ୍ୟ ସାମଗ୍ରୀ ଜବତ ହୋଇଛି । ଏନେଇ ପୋଲିସ ଏକ ମାମଲା(ନଂ.୫୧୮/୨୫) ରୁଜୁ କରି ଅଭିଯୁକ୍ତ ମନୋଜଙ୍କୁ କୋର୍ଟ ଚାଲାଣ କରାଯାଇଛି ।
ଖବରରୁ ଜଣାପଡିଛି, ରବିବାର ସକାଳ ୯ଟାରେ ପଦରବାଲି ଛକ ୧୭ ନଂ. ରାଜ୍ୟ ରାଜପଥ ଉପରେ ଜଣେ ପୋଲିସ କନ୍ଷ୍ଟେବଲ ଗାଡିମୋଟର ଯାଞ୍ଚ କରି ଚାଳକଙ୍କଠାରୁ ଟଙ୍କା ଆଦାୟ କରୁଥିବା ସଦର ଥାନାକୁ ଖବର ମିଳିଥିଲା । ସଦର ଥାନା ଏଏସ୍ଆଇ ଡିପି ପଟ୍ଟନାୟକ ଓ ତାଙ୍କ ଟିମ୍ ଘଟଣାର ସତ୍ୟାସତ୍ୟ ଜାଣିବା ପାଇଁ ତୁରନ୍ତ ପଦରବାଲି ଛକରେ ପହଞ୍ଚି ଥିଲେ। ପୋଲିସ ଗାଡ଼ି ଆସିବା ଦେଖି ସେଠାରେ ପୋଲିସ ପୋଷାକ ପିନ୍ଧି ଛିଡା ହୋଇଥିବା ମନୋଜ ଦୌଡି ପଳାଇବାକୁ ଉଦ୍ୟମ କରିଥିଲେ।
ହେଲେ ପୋଲିସ କର୍ମଚାରୀମାନେ ତାଙ୍କୁ କାବୁ କରି ନେଇଥିଲେ। ପଚରାଉଚରା ପରେ ଅଭିଯୁକ୍ତ ମନୋଜଙ୍କ ଘର ନାରାୟଣପୁରରେ ହୋଇଥିବା ବେଳେ ସେ ଲାଠିରେ ଏକ ଭଡାଘର ନେଇ ପରିବାରସହ ରହୁଥିବା ଜଣାପଡିଛି। ପରେ ପୋଲିସ ଲାଠିସ୍ଥିତ ମନୋଜଙ୍କ ଭଡାଘରେ ଚଢାଉ କରିଥିଲା। ଚଢାଉ ବେଳେ ଘରୁ ଉପରୋକ୍ତ ସାମଗ୍ରୀ ଜବତ ହୋଇଥିଲା। ମନୋଜ ଘର ମାଲିକଙ୍କୁ ପୋଲିସ କନ୍ଷ୍ଟେବଲ ବୋଲି କହି ଘରଭଡା ନେଇଥିଲେ। ହେଲେ ୧୦ ମାସ ହେଲା ଭଡା ଟଙ୍କା ଦେଇନାହାନ୍ତି। ସେ ପୋଲିସ ପୋଷାକ ପିନ୍ଧି କନ୍ଷ୍ଟେବଲ ବୋଲି କହି ବିଭିନ୍ନ ଜିଲାକୁ ମାଗଣାରେ ବସ୍ ଓ ଟ୍ରେନ ଯୋଗେ ଯିବାଆସିବା କରୁଥିବା ପଚରାଉଚରା ବେଳେ କହିଛନ୍ତି।
