ସୋରଡ଼ା,୧୫ା୧(ଡି.ଏନ୍.ଏ.): ଗଞ୍ଜାମ ଜିଲା ସୋରଡ଼ା ବ୍ଲକ ନୂଆଁଗଡ଼ ଗ୍ରାମର ଜିତେନ୍ଦ୍ର ଦାସଙ୍କ ଫେସ୍ବୁକ୍କୁ ଆଇଆଇସି ପ୍ରଭାତ ସାହୁଙ୍କ ନାଁରେ ମେସେଜ ଆସିଥିଲା ଯେ, ବୁଧବାର ମୋର ଜଣେ ସାଙ୍ଗ ସିଆର୍ପିଏଫ୍ରେ କାର୍ଯ୍ୟ କରୁଛି ତା’ର ବଦଳି ହୋଇଯାଇଛି। ତେଣୁ ଭୁବନେଶ୍ବରରେ ଥିବା ସମସ୍ତ ଆସବାବପତ୍ର ବିକ୍ରି କରିଦେବ ଯଥା ଫ୍ରିଜ,କୁଲର,କମ୍ପ୍ୟୁଟର,ସୋଫା ଇତ୍ୟାଦି। ତୁମେ କିଣିବାକୁ ଚାହୁଁଚ ଯଦି ଚେଷ୍ଟା କର। ଗୁରୁବାର ଜିତେନ୍ଦ୍ରଙ୍କୁ ଆଇଆଇସିଙ୍କ ଫଟୋ ଥିବା ହ୍ବାଟ୍ସଆପ୍ ନମ୍ବରରେ ପୁଣି ମେସେଜ ଆସିଲା ଯେ, ସେ ମୋର ସାଙ୍ଗ ବୋଲି। ଏହା ପରେ ଜିତେନ୍ଦ୍ରଙ୍କ ବିଶ୍ବାସ ବଢ଼ିଗଲା। ଅନ୍ୟ ଏକ ନମ୍ବରରେ କ୍ୟୁଆର୍ କୋଡ ଆସିଲା। ୬୧୦୦୦ ଦେବାକୁ କହିବାରୁ ଜିତେନ୍ଦ୍ର ଦେଇଦେଲେ। ପରେ ଜାଣିଲେ ଏହା ଏକ ଫ୍ରଡ୍ ବୋଲି । ସଙ୍ଗେ ସଙ୍ଗେ ବ୍ୟାଙ୍କକୁ ଖବର ଦେଲେ ଓ ଆଇଆଇସିଙ୍କୁ ମଧ୍ୟ ଜଣାଇଦେଲେ। ଥାନାଧିକାରୀଙ୍କ ନାମରେ ଫେକ୍ ଫେସ୍ବୁକ୍ ଆକାଉଣ୍ଟ ଖୋଲି ୭ ଦିନ ହେଲା ଫ୍ରେଣ୍ଡ ରିକ୍ୱେଷ୍ଟ ମେସେଜ ଆସୁଛ। ତାହା ସମ୍ପୂର୍ଣ୍ଣ ଫେକ୍ ବୋଲି ଜଣାପଡ଼ିଛି। କେହି ଅସାମାଜିକ ମନ୍ଦ ଉଦେଶ୍ୟ ରଖି ଏପରି କରୁଥିବା ଜଣାପଡ଼ିଛି। ସାଧାରଣତଃ ପୋଲିସ ଅଧିକାରୀଙ୍କ ତରଫରୁ ସାମାଜିକ ଗଣମାଧ୍ୟମରେ ଫ୍ରେଣ୍ଡ ରିକ୍ୱେଷ୍ଟ ଆସିଲେ ସମସ୍ତେ ଟିକେ ଖୁସି ହୁଅନ୍ତି ଓ ଗ୍ରହଣ ମଧ୍ୟ କରନ୍ତି। ତେବେ ୨ ଦିନ ହେଲା ଏଠାରେ ଯୁବକମାନଙ୍କୁ କବିସୂର୍ଯ୍ୟନଗର ଆଇଆଇସି ପ୍ରଭାତ ସାହୁଙ୍କ ଫେସ୍ବୁକ୍କୁ ଫ୍ରେଣ୍ଡ ରିକ୍ୱେଷ୍ଟ ଅନୁରୋଧ ଆସିବାରେ ଲାଗିଛି। ମଙ୍ଗଳବାର ସକାଳ ୭ ଟାରେ ରଞ୍ଜନ ସାହୁଙ୍କୁ ମେସେଜ ଆସିଥିଲା। ସେ ଗ୍ରହଣ କରିଥିଲେ। ଆଇଆଇସି ଫ୍ରେଣ୍ଡ ରିକ୍ୱେଷ୍ଟ ପଠାଇଥିବାରୁ ଖୁସି ବ୍ୟକ୍ତ କରିଥିଲେ। ତେବେ ଖୋଦ୍ ଆଇଆଇସି ନିଜ ଫେସ୍ବୁକ୍ରେ ରବିବାର ମଧ୍ୟାହ୍ନରେ ପୋଷ୍ଟ କରି ଜଣାଇଛନ୍ତି ଯେ, ମୋ ନାଁରେ କିଏ ଜଣେ ଫେକ୍ ଆକାଉଣ୍ଟ ଖୋଲି ଏପରି କରୁଛି। ସେଥିରେ ସୋରଡ଼ା ଅଞ୍ଚଳର ୫ ଜଣ ଓ କବିସୂର୍ଯ୍ୟନଗର ଜଣେ ଅନୁରୋଧ ଗ୍ରହଣ ମଧ୍ୟ କରିସାରିଲେଣି। ସୟଦ ଓ୍ବାସିମଙ୍କୁ ମଧ୍ୟ ମେସେଜ ଆସିଥିବା ଜଣାପଡ଼ିଛି। ତେବେ ଆଇଆଇସିଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ମୁଁ କାହାକୁ ଏପରି ମେସେଜ ପଠାଇ ନାହିଁ କି ମୋର ଏହି ଆକାଉଣ୍ଟ ନାହିଁ।ଏହି ଫେକ ଆକାଉଣ୍ଟ ବିଷୟରେ ଉପରିସ୍ଥ ଅଧିକାରୀଙ୍କୁ ଜଣାଇଦେଇଛି। ଏପରି ଯିଏ କରିଛି ଓ କରିବାକୁ ଉଦ୍ୟମ କରୁଥିବା ବ୍ୟକ୍ତି ବିଶେଷଙ୍କ ଉପରେ ଖୋଳତାଡ଼ ଆରମ୍ଭ ହେଉଛି। କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।
ସୂଚନାଯୋଗ୍ୟ, ଶ୍ରୀ ସାହୁ ସୋରଡ଼ା ଥାନାରେ ପୂର୍ବରୁ ଆଇଆଇସି ଥିଲେ। ସେହି ସମୟରେ ସମସ୍ତଙ୍କ ସହ ଖୁବ୍ ଭଲ ସମ୍ପର୍କ ସୃଷ୍ଟି କରିଥିଲେ। ଏଠାରେ ସମସ୍ତେ ତାଙ୍କୁ ଭଲ ପାଉଥିଲେ। ତେଣୁ ସୋରଡ଼ା ଅଞ୍ଚଳର ଜନସାଧାରଣଙ୍କୁ ହିଁ ତାଙ୍କ ନାମରେ ମେସେଜ ଆସୁଥିବାର ଅନୁମାନ କରାଯାଉଛି। ଏଠାରେ ଉକ୍ତ ଫେକ୍ ଆକାଉଣ୍ଟରେ ଏଠାକାର ଓକିଲ,ଖବରଦାତା,ସରକାରୀ କର୍ମଚାରୀ,ବ୍ୟବସାୟୀ ମଧ୍ୟ ଯୋଡ଼ି ହୋଇଛନ୍ତି। ଜିତେନ୍ଦ୍ର ସୋରଡ଼ା ଆମ ପୋଲିସ ସମିତିର ସଦସ୍ୟ ଅଟନ୍ତି। ୯୮୩୨୨୩୮୮୮୫ ଓ ୬୨୯୫୬୮୫୯୨୮ ନମ୍ବରରୁ ତାଙ୍କ ନିକଟକୁ ମେସେଜ୍ ଆସିଥିବା ଜିତେନ୍ଦ୍ର କହିଛନ୍ତି।
