ଝରିଗାଁ, ୧୩।୭(କିଶୋର ଚନ୍ଦ୍ର ମଣ୍ଡଳ): ଜଙ୍ଗଲ ନଷ୍ଟ, ହିଂସ୍ରଜନ୍ତୁ ଏବେ ଗାଁ ମୁହାଁ। ଖାଦ୍ୟ ଅନ୍ବେଷଣରେ ଥିବା ମାଇ ଭାଲୁ ଏବେ ରକ୍ତମୁଖା l ଏହା ଦେଖିବାକୁ ମିଳିଛି ନବରଙ୍ଗପୁର ଜିଲା ଝରିଗାଁ ବ୍ଲକ କୁସୁମୀ ଗ୍ରାମରେ। କୁସୁମୀ ଗ୍ରାମର ଫଗନୁ ଗୌଡ (୩୦) ଏବଂ ତାଙ୍କ ଦୁଇ ସାଙ୍ଗ ସହ ଗାଁ ମଶାଣି ନିକଟରେ ଛେଳି ଚରାଇବାକୁ ଯାଇଥିଲେ। ଦିନ ପ୍ରାୟ ୨ଟା ସମୟରେ ଫଗନୁ ଏକ ଚାଖୁଣ୍ଡା ଗଛ ଛାଇରେ ବସିଥିଲେ l ସେହି ସମୟରେ ପଛପଟୁ ଏକ ମାଈ ଭାଲୁ ଆକ୍ରମଣ କରି ଫଗନୁଙ୍କୁ ରକ୍ତାକ୍ତ କରି ଥିଲେ l ଫଗନୁଙ୍କ ଚିତ୍କାର ଶୁଣି ତାଙ୍କ ଦୁଇ ସାଙ୍ଗ ଆସି ଦେଖିଲା ବେଳକୁ ଭାଲୁଟି ଫଗନୁର ମୁଣ୍ଡକୁ ତାଡିବାରେ ଲାଗିଛି l ଭୟରେ ଦୁଇଜଣ ସେଠାରୁ ଗାଁକୁ ଦୌଡି ପଳାଇ ଯାଇଥିଲେ। ଗାଁ ଲୋକଙ୍କୁ ଘଟଣା ସମ୍ପର୍କରେ ଜଣାଇଥିଲେ। ଗାଁ ଲୋକମାନେ ଆସି ସେଠାରେ ଦେଖିବା ବେଳକୁ ଫଗନୁ ମୃତ ହୋଇଯାଇ ଥିବା ସହ ସମସ୍ତ ଶରୀରକୁ କ୍ଷତ କରିଛି। ଖବର ପାଇ ଘଟଣାସ୍ଥଳେ ବନ ବିଭାଗର ଭାରପ୍ରାପ୍ତ ରେଞ୍ଜର ସୁଶାନ୍ତ ସିଂ, ଗାର୍ତ ସୁଶାନ୍ତ ମାଝୀ, ୱାଇଲ୍ଡ ଲାଇଫ ଟିମ ପହଞ୍ଚିଥିଲେ। ପରିବାର ଲୋକେ ଝରିଗାଁ ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ପହଞ୍ଚି ଶବ ଜବତ କରିଛି।
Dharitri – Odisha’s No.1 Odia Daily
