ନୂଆଦିଲ୍ଲୀ,୨୧।୪: ସୋମବାର ସୁପ୍ରିମକୋର୍ଟ ହିଂସାଗ୍ରସ୍ତ ପଶ୍ଚିମବଙ୍ଗରେ ରାଷ୍ଟ୍ରପତି ଶାସନ ଲାଗୁ କରିବାକୁ ଦାବି କରୁଥିବା ଏକ ଆବେଦନ ଶୁଣାଣି କରୁଥିବା ବେଳେ ଭାଜପା ନେତାମାନଙ୍କର ଦ୍ୱାରା ନ୍ୟାୟିକ ଅତିକ୍ରମଣ ଅଭିଯୋଗ ଉପରେ ମନ୍ତବ୍ୟ ଦେଇଛନ୍ତି।
ଦୁଇଟି ଗୁରୁତ୍ୱପୂର୍ଣ୍ଣ ନିର୍ଣ୍ଣୟ – ରାଜ୍ୟପାଳମାନଙ୍କ ଦ୍ୱାରା ପଠାଯାଇଥିବା ବିଲ୍ଗୁଡ଼ିକ ଉପରେ ରାଷ୍ଟ୍ରପତିଙ୍କୁ ନିଷ୍ପତ୍ତି ନେବା ପାଇଁ ସମୟସୀମା ନିର୍ଦ୍ଧାରଣ ଏବଂ ସଂଶୋଧିତ ଓକଫ ଆଇନର କେତେକ ଧାରାକୁ ସ୍ଥଗିତ ରଖିବା ପ୍ରସଙ୍ଗରେ ଭାଜପା ନେତାମାନଙ୍କ ସମାଲୋଚନାର ସମ୍ମୁଖୀନ ହୋଇଛି ସର୍ବୋଚ୍ଚ ନ୍ୟାୟାଳୟ।
ପଶ୍ଚିମବଙ୍ଗରେ ରାଷ୍ଟ୍ରପତି ଶାସନ ଏବଂ ଅର୍ଦ୍ଧସାମରିକ ବାହିନୀ ମୁତୟନ ଦାବି କରୁଥିବା ଆବେଦନ ଶୁଣାଣି ବେଳେ, ଜଷ୍ଟିସ ବି.ଆର. ଗଭାଇ ଏବଂ ଅଗଷ୍ଟିନ ଜର୍ଜ ମସିହଙ୍କ ବେଞ୍ଚ କହିଛନ୍ତି, “ଆପଣ ଚାହୁଁଛନ୍ତି କି ଆମେ ରାଷ୍ଟ୍ରପତିଙ୍କୁ ଏହା ଲାଗୁ କରିବାକୁ ରିଟ୍ ଅଫ୍ ମାଣ୍ଡାମସ ଜାରି କରୁ? ଯେତେବେଳେ, ଆମେ କାର୍ଯ୍ୟନିର୍ବାହୀ (କ୍ଷେତ୍ର)ରେ ଅତିକ୍ରମଣ ଅଭିଯୋଗର ସମ୍ମୁଖୀନ ହେଉଛୁ।”
ଏହି ମନ୍ତବ୍ୟ ଗୁରୁତ୍ୱପୂର୍ଣ୍ଣ କାରଣ ଜଷ୍ଟିସ ବି.ଆର. ଗଭାଇ, ଯିଏ ଆଗାମୀ ମାସରେ ମୁଖ୍ୟ ବିଚାରପତି ଭାବେ ଦାୟିତ୍ୱ ଗ୍ରହଣ କରିବେ, ସମ୍ଭବତଃ ଓକଫ ଆଇନ ବିରୋଧରେ ଆବେଦନଗୁଡ଼ିକ ସହ ମୁକାବିଲା କରିବେ।
ଏହା ପୂର୍ବରୁ ଚଳିତ ମାସରେ, ସୁପ୍ରିମକୋର୍ଟ ଆର୍ଟିକଲ ୧୪୨ ଅଧୀନରେ ଅସାଧାରଣ କ୍ଷମତା ପ୍ରୟୋଗ କରି ତାମିଲନାଡୁର ୧୦ଟି ବିଲ୍କୁ ପାସ କରିଛି, ଯେଗୁଡ଼ିକ ରାଜ୍ୟପାଳଙ୍କ ନିକଟରେ ବହୁ ସମୟ ଧରି ଅଟକି ରହିଥିଲା। ଏହା ମଧ୍ୟ ପ୍ରଥମ ଥର ପାଇଁ ନିର୍ଦ୍ଦେଶ ଦେଇଛି ଯେ ରାଜ୍ୟପାଳମାନଙ୍କ ଦ୍ୱାରା ପ୍ରେରିତ ବିଲ୍ଗୁଡ଼ିକ ଉପରେ ରାଷ୍ଟ୍ରପତି ତିନି ମାସ ମଧ୍ୟରେ ନିଷ୍ପତ୍ତି ନେବେ।
