ନୟାଗଡ଼,୧୨।୫(ଲୋକନାଥ ମିଶ୍ର)ନୟାଗଡ଼ ଜିଲାରେ ମହାନଦୀରେ ବେଆଇନ ବାଲିଘାଟକୁ ଅନୁକମ୍ପା ଦେଖାଇ ନୟାଗଡ଼ ଜିଲା ପ୍ରଶାସନ ସନ୍ଦେହ ଘେରକୁ ଆସିଛି । କେତେଜଣ ସରକାରୀ ଅଧିକାରୀ ଓ କର୍ମଚାରୀଙ୍କ ଅନୁକମ୍ପା ଯୋଗୁ ସରକାର ଅନେକ କୋଟି ଟଙ୍କାର ରାଜସ୍ବ ହରାଉଛନ୍ତି। ମହାନଦୀର ମାଧପୁର ବାଲିଘାଟକୁ ଛାଡିଦେଲେ ଅନ୍ୟ କୌଣସି ବାଲିଘାଟ ନିଲାମ ଦିଆଯାଇ ନ ଥିବା ବେଳେ ପ୍ରତ୍ୟହ ବେଆଇନ ଭାବେ ବାଲି ଚୋରା ଚାଲାଣ ଚାଲିଛି ।ପ୍ରଶାସନ ପକ୍ଷରୁ ଚଢ଼ାଉ କି ଧରପଗଡ ନ ଥିବାରୁ ଅବାଧରେ ବାଲି ଚାଲାଣ ଚାଲିଛି ।
ସରକାରୀ ରିପୋର୍ଟ କହୁଛି କେବଳ ମାଧପୁରରେ ବାଲିଘାଟ ହେଉଛି । କିନ୍ତୁ ଗ୍ରାଉଣ୍ଡ ଜିରୋ ରିପୋର୍ଟ ଦେଖିଲେ ଗଣିଆ ତହସିଲର କେନ୍ଦୁପଲ୍ଲୀ, ୱାଲିପୁର, ପୂର୍ଣ୍ଣଚନ୍ଦ୍ରପୁର ମହାନଦୀର ବାଲି ଘାଟରୁ ବାଲି ଉଠୁଛି । କିନ୍ତୁ ଏହି ବାଲିଘାଟ ନିଲାମ ଦିଆ ନ ଯାଇ ବାଲି ଉଠିବା ପ୍ରଶ୍ନବାଚୀ ସୃଷ୍ଟି କରିଛି । କେତେଜଣ ଲୋକ ଏହି ଘାଟକୁ ବାଲି ନିଲାମ ନେଇଛନ୍ତି ଦର୍ଶାଇ ଭଲ ଟଙ୍କା ରୋଜଗାର କରୁଛନ୍ତି । ସେହିପରି ଖଣ୍ଡପଡ଼ା ତହସିଲର ସିଦ୍ଧାମୂଳା ବାଲିଘାଟରୁ ପୁଣି ବାଲ ଉଠୁଛି । ପୂର୍ବରୁ ଏ ବାଲି ଘାଟ ନିଲାମ ହେଉଥିଲା । ପରେ କିନ୍ତୁ ନିଲାମ ବନ୍ଦ ରହିଛି । ହେଲେ ବାଲି ଚୋରା ଚାଲାଣ ରୋକା ଯାଇ ପାରିୁନି । ସିଦ୍ଧାମୂଳା ବାଲିଘାଟରୁ ଓଡ଼ଗଁା, ଖଣ୍ଡପଡ଼ା, ନୟାଗଡ଼, ରଣପୁର ଅଞ୍ଚଳକୁ ବାଲି ଚୋରା ଚାଲାଣ ହେଉଛି ବୋଲି ଅଭିଯୋଗ ହେଉଛି । ଅନ୍ୟପକ୍ଷେ ସିଦ୍ଧାମୂଳାଠାରୁ କିଛି ବାଟ ପରେ କଟକ ଜିଲାର ବୈଦେଶ୍ୱର ବାଲି ଘାଟ ରହିଛି । ଏହା ପୁଣି ବେଆଇନ ବୋଲି କୁହାଯାଉଛି। ଏଠାରୁ ବାଲି ଖୋର୍ଦ୍ଧ, ବାଲୁଗଁା, ଟାଙ୍ଗି, ଚାନ୍ଦପୁର, ଭୁବନେଶ୍ୱର ଯାଉଛି । ସରକାର ରାଜସ୍ବ ହରାଉଥିଲେ ମଧ୍ୟ ମହାନଦୀରେ ଏକାଧିକ ବାଲି ଘାଟ କରି ବେଆଇନ ଭାବେ ବାଲି ବୁହା ଚାଲିଛି। ଜିଲାରେ କୋଠା ଘର ଓ ସରକାରୀ କାର୍ଯ୍ୟାଳୟର ନିର୍ମାଣ କାର୍ଯ୍ୟ ବଢ଼ି ଚାଲିଥିବାରୁ ଅନେକ ନଦୀ ଓ ନାଳରେ ବାଲି ସଙ୍କଟ ଦେଖା ଦେଲାଣି। ପୁଣି ବନ୍ୟା ଆଗଭଳି ଆଉ ହେଉ ନାହିଁ । ଯଦ୍ୱାରା ନଦୀରେ ବାଲି ଆସୁନି । କୋଚିତ ବନ୍ୟା ଲୋକଙ୍କ ଗୃହ ନିର୍ମାଣ ପାଇଁ ଆବଶ୍ୟକତା ବାଲିକୁ ପୂରଣ କରି ପାରୁ ନାହିଁ । ଜିଲା ମଧ୍ୟ ଦେଇ ଯାଇଥିବା ମହାନଦୀ ଏହି ଆବଶ୍ୟକତାକୁ ପୂର୍ଣ୍ଣ କରୁଛି ।
ଏନେଇ ପରିବେଶବିତ୍ ବିଭୂତି ଭୂଷଣ ଦାଶ କୁହନ୍ତି, ବାଲି ଘାଟ ନିଲାମକୁ କଡାକଡି କରିବା ଦରକାର । ବାଲିଘାଟ ନିଲାମ କଡାକଡି ହେଉ ନ ଥିବାରୁ ଚୋରା ଚାଲାଣ ବଢ଼ୁଛି । ବାଲି ବ୍ୟବସାୟୀମାନେ ସରକାରଙ୍କୁ ରାଜସ୍ବ ନ ଦେଇ ହାତଗୁଞ୍ଜା ଦେଇ କାରବାର ଚଲାଉଛନ୍ତି । ବାଲିଘାଟ ନିଲାମ ହେଲେ ଗୃହ ନିର୍ମାଣକାରୀଙ୍କ ପାଇଁ କୌଣସି ଅସୁବିଧା ନାହିଁ, ବରଂ ବାଲି ପାଇବାରେ ସ୍ବଚ୍ଛତା ଆସିବ ବୋଲି କହିଛନ୍ତି । ଅନ୍ୟପକ୍ଷେ ପ୍ରଶାସନ ବେଆଇନ ବାଲିଘାଟ ପ୍ରୀତିକୁ ଛାଡି ଚଢ଼ାଉ, ଧରପଗଡକୁ ତ୍ୱରାନ୍ବିତ କରିବା ଦରକାର ବୋଲି କହିଛନ୍ତି । ପରିବେଶବିତ୍ ଓ ସାମାଜିକକର୍ମୀ ସ୍ବାମୀ ହରି ଶରଣ ମହାରାଜ କୁହନ୍ତି, ନିର୍ମାଣ କାର୍ଯ୍ୟ ବଢ଼ି ଚାଲିଛି । ବାଲିର ଆବଶ୍ୟତା ମଧ୍ୟ ବଢ଼ୁଛି। ତେବେ ବାଲିଘାଟ ନିଲାମ କରାଯାଉ ନ ଥିବାରୁ ସରକାର ଅନେକ କୋଟି ଟଙ୍କା ହରାଇ ଚାଲିଛନ୍ତି । କିଛି ହାତଗୁଞ୍ଜା ନେଇ ଚଢ଼ାଉ କରା ନ ଯିବା ଖରାପ ବାର୍ତ୍ତା ଯାଉଛି । ପ୍ରଶାସନ ପକ୍ଷରୁ ଚଢ଼ାଉ କରାଯିବା ଦରକାର । ନିର୍ବାଚନ ସମୟରେ ବେଶି ବାଲି ଚୋରା ଚାଲାଣ ହେଉଛି ବୋଲି ବିଭିନ୍ନ ମହଲରୁ ଅଭିଯୋଗ ହୋଇଛି ା
