କଲମ୍ବୋ, ୫।୬ : ଶ୍ରୀଲଙ୍କା ସ୍ବାଧୀନତା ପରଠାରୁ ସବୁଠୁ ବଡ ଅର୍ଥନୈତିକ ସଙ୍କଟ ଦେଇ ଗତି କରୁଛି। ମୁଦ୍ରାସ୍ଫୀତି ଏକ ରେକର୍ଡ ସ୍ତରରେ ପହଞ୍ଚିଛି। ଜନସାଧାରଣ ବଞ୍ଚିବା ପାଇଁ ଅତ୍ୟାବଶ୍ୟକ ସାମଗ୍ରୀ ମଧ୍ୟ ପାଇବାକୁ ସକ୍ଷମ ହୋଇପାରୁ ନାହାନ୍ତି। ଦେଶରେ ଇନ୍ଧନ ଏବଂ ଔଷଧ ଭଳି ମୌଳିକ ଜିନିଷର ଅଭାବ ରହିଛି। ଦେଶର ଅବସ୍ଥା ଏତେ ଖରାପ ହୋଇଛି ଯେ ଗରିବ ପରିବାରର ପୁରୁଷ ଓ ମହିଳାଙ୍କ ପାଇଁ ପରିବାରର ପ୍ରତିପୋଷଣ ଏକ ଆହ୍ବାନ ପାଲଟିଛି।
ଅର୍ଥ ଏବଂ ଚାକିରୀ ଅଭାବରୁ ଅନେକ ପରିବାରର ମହିଳା, ଯୁବତୀ ଏବଂ ବାଳିକାମାନେ ବାଧ୍ୟ ହୋଇ ଦେହ ବ୍ୟବସାୟ କରୁଛନ୍ତି। ପେଟ ଭୋକ ପାଇଁ ଏବଂ ପରିବାର ପୋଷଣ ଲାଗି ଏଭଳି କରିବାକୁ ସେମାନେ ବାଧ୍ୟ ହେଉଛନ୍ତି।
ଏକ ରିପୋର୍ଟ ଅନୁଯାୟୀ, ଜାନୁୟାରୀ ୨୦୨୨ ପରଠାରୁ ଶ୍ରୀଲଙ୍କାରେ ଦେହ ବ୍ୟବସାୟ ୩୦ ପ୍ରତିଶତ ପର୍ଯ୍ୟନ୍ତ ବୃଦ୍ଧି ଘଟିଛି। ଦେହ ବ୍ୟବସାୟରେ ବହୁ ସ୍କୁଲଛାତ୍ରୀ ମଧ୍ୟ ସାମିଲ ଅଛନ୍ତିି। ଲୋକଙ୍କ ଏପରି ଖରାପ ଅବସ୍ଥା ପାଇଁ ସରକାରଙ୍କ ନୀତ ଦାୟୀ ବୋଲି ଅଭିଯୋଗ ହେଉଛି।
ଏହା ଦ୍ୱାରା ଦେଶରେ ଆଗାମୀ ଦିନରେ ଏଡସ୍ ମହାମାରୀ ସଂକ୍ରମଣର ଆଶଙ୍କା ବୃଦ୍ଧି ପାଇବାରେ ଲାଗିଛି। ରିପୋର୍ଟ ଅନୁଯାୟୀ, ବର୍ତ୍ତମାନ ସ୍ପା ନାମରେ ଶ୍ରୀଲଙ୍କାରେ ଦେହ ବ୍ୟବସାୟ ଦ୍ରୁତ ଗତିରେ ବଢ଼ିବାରେ ଲାଗିଛି। ଦେଶର ପ୍ରାୟ ୪୦ ହଜାର ଯୁବତୀ ସ୍ପାରେ କାମ କରୁଛନ୍ତି। ସେଥିମଧ୍ୟରୁ ଅଧାରୁ ଅଧିକ ରାଜଧାନୀ କଲମ୍ବୋରେ କାମ କରୁଛନ୍ତି। ରାଜଧାନୀର ପୋଶ ଅଞ୍ଚଳରେ ଏପରି ଅନେକ ମସାଜ କେନ୍ଦ୍ର ଅଛି ଯେଉଁଠାରେ ଦେହ ବ୍ୟବସାୟ ୨୪ ଘଣ୍ଟା ଚାଲିଛି ବୋଲି ରିପୋର୍ଟରେ ପ୍ରକାଶ ପାଇଛି।
