କୋରାପୁଟ,୨୨ା୯(ସ୍ବ.ପ୍ର.): ମାଛକୁଣ୍ଡ ଅଞ୍ଚଳରୁ ବିପୁଳ ପରିମାଣର ମାଓବାଦୀ ବିସ୍ଫୋରକ ସାମଗ୍ରୀ ସମେତ ନଗଦ ଟଙ୍କା ଜବତ ହୋଇଛି। କୋରାପୁଟ ପୋଲିସକୁ ମାଓବାଦୀ ମୁକାବିଲା କ୍ଷେତ୍ରରେ ଏକ ବଡ଼ଧରଣର ସଫଳତା ମିଳିଛି।
ସୂଚନାନୁଯାୟୀ ଏସ୍ଓଜି ଓ ଡିଭିଏଫ୍ ପକ୍ଷରୁ କୋରାପୁଟ ଜିଲା ମାଛକୁଣ୍ଡ ଥାନା ଅନ୍ତର୍ଗତ ସିନ୍ଧିପୁଟ ଜଙ୍ଗଲରେ ମିଳିତ ଆଣ୍ଟି ନକ୍ସଲ ଅପରେଶନ ବେଳେ ନଗଦ ଟଙ୍କା ଓ ମାଓବାଦୀ ବିସ୍ଫୋରକ ସାମଗ୍ରୀ ଜବତ ହୋଇଛି। ଏହି ଅପରେଶନରେ ନଗଦ ୭୦ ହଜାର ଟଙ୍କା, ୧୭ ମିଟର କର୍ଡେକ୍ସ ତାର, ୩୧ଟି ଜେଲେଟିନ୍ ଷ୍ଟିକ୍, ୧୧ଟି ଇଲେକ୍ଟ୍ରିକ ଡିଟୋନେଟର, ଗୋଟାଏ ତାର ବଣ୍ଡଲ, ୨ଟି ଟିଫିନ ବମ୍, ଗୋଟାଏ ପ୍ରେସର କୁକର ବମ୍ ଓ ଗୋଟାଏ ଟେଷ୍ଟିଂ ପିନ୍ ଜବତ ହୋଇଛି ବୋଲି ଏନେଇ ଏସ୍ପି ବରୁଣ ଗୁଣ୍ଠୁପାଲି ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ମାଓବାଦୀଙ୍କ ଗତିବିଧି ଉପରେ ନଜର ରହିଛି ତା’ ସହିତ ଏସ୍ଓଜି ଓ ଡିଭିଏଫ୍ ପକ୍ଷରୁ ଜୋରଦାର ଆଣ୍ଟି ନକ୍ସଲ ଅପରେଶନ ଜାରି ରହିଛି। କିଛି ଦିନ ତଳେ ଶତାଧିକ ମାଓବାଦୀ ସମର୍ଥକ ପୋଲିସ ଓ ବିସ୍ଏଫ୍ଙ୍କ ନିକଟରେ ଆତ୍ମସମର୍ପଣ କରିଥିଲେ। ଏହାକୁ ଟାର୍ଗେଟ କରି ଏକ ବଡ଼ଧରଣର ଦୁର୍ଘଟଣା ଘଟାଇଥିବା ପାଇଁ ଯୋଜନା କରୁଥିଲେ ବୋଲି ଅନୁମାନ କରାଯାଇଛି। ଏ ନେଇ ତଦନ୍ତ ଜାରି ରହିଛି ବୋଲି ଏସ୍ପି ବରୁଣ ଗୁଣ୍ଠୁପାଲି ସୂଚନା ଦେଇଛନ୍ତି।
