ପାଟନା,୧୬।୯: ବିହାର ବେଗୁସରାଇ ଜିଲା ଅଧୀନ ବରାଉଣୀ ତୈଳ ବିଶୋଧନାଗାରରେ ଗୁରୁବାର ବିସ୍ଫୋରଣ ଘଟି ୧୫ କର୍ମଚାରୀ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ୮ ଜଣଙ୍କ ଅବସ୍ଥା ସଙ୍କଟାପନ୍ନ ରହିଥିବା ଅଧିକାରୀ ଜଣକ ସୂଚନା ଦେଇଛନ୍ତି।
ଆହତମାନଙ୍କୁ ବରାଉଣୀ ବିଶୋଧନାଗାର ହସ୍ପିଟାଲ ଏବଂ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି। ରିଫାଇନାରିର ଗୋଟିଏ ସେକ୍ସନ ମାସେ ହେଲା ବନ୍ଦ ଥିଲା। ମଙ୍ଗଳବାର ତାହା କାର୍ଯ୍ୟକ୍ଷମ ହୋଇ ଦୁଇଦିନ ଠିକ୍ଠାକ୍ ଚାଲିବା ପରେ ଗୁରୁବାର ମଧ୍ୟାହ୍ନରେ ବିସ୍ଫୋରଣ ଘଟିଥିଲା ବୋଲି ରିଫାଇନାରିର ବରିଷ୍ଠ ଅଧିକାରୀ ଇ.ଡି. ଶୁକ୍ଳା କହିଛନ୍ତି। ଉକ୍ତ ସେକ୍ସନର ଉତ୍ପାଦନ ବନ୍ଦ କରିଦିଆଯିବା ସହ ଉଦ୍ଧାର କାର୍ଯ୍ୟ ଜାରି ରହିଛି।
