ଟେକ୍ସାସ, ୫।୯: ବର୍ତ୍ତମାନ କରୋନା ସଙ୍କଟ ସମୟରେ ମାସ୍କ ଓ ସାନିଟାଇଜର ମଣିଷ ଜୀବନର ଏକ ଅଙ୍ଗ ପାଲଟି ଯାଇଛି। କିନ୍ତୁ ସାନିଟାଇଜର ସହିତ ଜଡ଼ିତ ଏକ ଘଟଣା ବିଷୟରେ ଜାଣିଲା ପରେ ଆପଣ ଏହାକୁ ସତର୍କତାର ସହିତ ବ୍ୟବହାର କରିବାକୁ ଗୁରୁତ୍ୱ ଦେବେ। ଆମେରିକାର ଟେକ୍ସାସ ସହରରେ ସାନିଟାଇଜର ଲାଗି ଜଣେ ମହିଳାଙ୍କୁ ଆଇସିୟୁରେ ଭର୍ତ୍ତି ହେବାକୁ ପଡ଼ିଛି। କେଟ୍ ଓ୍ବାଇଜ ନାମକ ଏହି ମହିଳାଜଣଙ୍କ ହାତକୁ ଜୀବାଣୁ ମୁକ୍ତ ରଖିବା ଲାଗି ସାନିଟାଇଜର ବୋଳିଥିଲେ। ଏହାପରେ ମହମବତୀ ଜଳାଇବା ଲାଗି ସେ ନିଆଁ ଲଗାଇଥିଲେ। କିନ୍ତୁ ପୂର୍ବରୁ ହାତରେ ଲାଗିଥିବା ସାନିଟାଇଜର ଯୋଗୁ ନିଆଁ ସଙ୍ଗେ ସଙ୍ଗେ ତାଙ୍କ ହାତ ସଂସ୍ପର୍ଶରେ ଆସି ଯାଇଥିଲା। ମାତ୍ର ୫ ସେକେଣ୍ଡ ମଧ୍ୟରେ କେଟ୍ଙ୍କ ହାତ ସମେତ ମୁହଁ, ଗୋଡ଼ ଓ ଶରୀରର ଅନ୍ୟ ଅଂଶ ନିଆଁରେ ପୋଡ଼ି ହୋଇଯାଇଥିଲା। ଏହାପରେ କେଟ୍ଙ୍କ ୨ ଝିଅ ମା’ଙ୍କୁ ବଞ୍ଚାଇବା ଲାଗି ପଡ଼ୋଶୀଙ୍କ ସହାୟତା ଲୋଡ଼ିଥିଲେ। କେଟ୍ ମଧ୍ୟ ଜୀବନ ବିକଳରେ ଶରୀରରୁ ଡ୍ରେସ କାଢ଼ି ପକାଇଥିଲେ। ପରେ ଗୁରୁତର ଅବସ୍ଥାରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। କେଟ୍ ବର୍ତ୍ତମାନ ଆଇସିୟୁରେର ରହିଛନ୍ତି।
