ପଦ୍ମପୁର, ୪ା୮(ପ୍ରଦୀପ୍ତ ଦାଶ):କୃଷି କାର୍ଯ୍ୟରେ ବ୍ୟବହୃତ ବିଭିନ୍ନ ସାମଗ୍ରୀର ଅହେତୁକ ଦରବୃଦ୍ଧି ଏବଂ ସରକାରୀ ପ୍ରକ୍ରିୟାର ଜଟିଳତା ଯୋଗୁ ଅଞ୍ଚଳର ଚାଷୀମାନେ ଗୁରୁତର ସମସ୍ୟାର ସମ୍ମୁଖୀନ ହେଉଛନ୍ତି। ଚାଷ ପାଇଁ ଆବଶ୍ୟକ ମଜୁରି, ସାର, କୀଟନାଶକ, ଡିଜେଲ ଓ ଟ୍ରାକ୍ଟର ଭଡ଼ାରେ ଲଗାତର ବୃଦ୍ଧି ହେଉଥିବାବେଳେ ଧାନର ଉଚିତ ମୂଲ୍ୟ ନ ମିଳିବାରୁ ଚାଷୀଙ୍କ ଆର୍ଥିକ ସ୍ଥିତି ଦିନକୁ ଦିନ ସଙ୍କଟାପନ୍ନ ହେଉଛି।
ଚାଷୀମାନଙ୍କ କହିବା ଅନୁସାରେ, ବର୍ଷକୁ ବର୍ଷ ଚାଷ ଖର୍ଚ୍ଚ ବଢ଼ି ଚାଲିଥିବାବେଳେ ସେହି ଅନୁପାତରେ ଫସଲର ମୂଲ୍ୟ ବୃଦ୍ଧି ପାଉନାହିଁ। ସାର ଯୋଗାଣରେ ଅନିୟମିତତା ଓ କଳାବଜାର, କୀଟନାଶକର ଅଧିକ ଦର, ମଜୁରି ବୃଦ୍ଧି ଏବଂ ଡିଜେଲ ମୂଲ୍ୟ ବୃଦ୍ଧି ଚାଷକୁ ଅଧିକ ବ୍ୟୟବହୁଳ କରିଦେଇଛି। ଏହା ସହିତ ଟ୍ରାକ୍ଟର ଭଡ଼ା ବୃଦ୍ଧି ପାଇଥିବାରୁ ଅନେକ କ୍ଷୁଦ୍ର ଓ ମଧ୍ୟମ ଚାଷୀ ଚାଷ କାମରୁ ଦୂରେଇ ଯିବାକୁ ବାଧ୍ୟ ହେଉଛନ୍ତି। ଅନ୍ୟପକ୍ଷରେ ଜମି ପଞ୍ଜୀକରଣ ପାଇଁ ବିଭିନ୍ନ କାଗଜପତ୍ର ସଂଗ୍ରହ ଓ ସରକାରୀ କାର୍ଯ୍ୟାଳୟକୁ ବାରମ୍ବାର ଦୌଡ଼ିବାକୁ ପଡୁଥିବାରୁ ଚାଷୀମାନେ ଅସନ୍ତୋଷ ପ୍ରକାଶ କରିଛନ୍ତି। ଏହା ଦ୍ୱାରା ଚାଷୀଙ୍କ ସମୟ ଓ ଅର୍ଥ ଉଭୟର ଅପଚୟ ହେଉଥିବାବେଳେ ଏହି ପ୍ରକ୍ରିୟାକୁ ସରଳ କରିବା ଆବଶ୍ୟକ। ବର୍ତ୍ତମାନର ପରିସ୍ଥିତିରେ ଶିକ୍ଷିତ ଯୁବବର୍ଗ ଚାଷ ପ୍ରତି ଆଗ୍ରହ ହରାଉଛନ୍ତି। ସାର ଯୋଗାଣ, ଜମି ପଞ୍ଜୀକରଣ ଏବଂ ଧାନ ବିକ୍ରି ସମ୍ବନ୍ଧୀୟ ନିୟମାବଳୀକୁ ସରଳୀକରଣ କରିବା ସହିତ ଚାଷୀଙ୍କ ବାସ୍ତବ ସମସ୍ୟା ବୁଝି ନୀତି ପ୍ରଣୟନ କରିବାକୁ ଦାବି ହେଉଛି।
ଏମାନେ କୁହନ୍ତି
ବିକ୍ରି ହୋଇପାରୁନି ଅମଳ ଧାନ
ଚାଷୀର ସମସ୍ତ ଅମଳ ଧାନ ବିକ୍ରି ହୋଇପାରୁନାହିଁ, ଜମି ତୁଳନାରେ ଟୋକନ କମ ଆସୁଛି, ତେଣୁ ବହୁତ ଚାଷୀ ଏମ୍ଏସ୍ପି ପାଇବାରୁ ବଞ୍ଚତ୍ତ ହେଇଛନ୍ତି। ଅନ୍ୟପକ୍ଷରେ କୃଷିକ୍ଷେତ୍ରରେ ଲାଗୁଥିବା ଶ୍ରମିକର ମୂଲ୍ୟ ବଢୁଛି, ବିହନ ଓ ସାରର ଅହେତୁକ ଦର ବୃଦ୍ଧି, ସବସିଡି ଅଙ୍କ କମିବା, ତୈଳ ଦର ବୃଦ୍ଧି ପ୍ରଭୃତି ଯୋଗୁ ଚାଷରେ ଖର୍ଚ୍ଚ ବୃଦ୍ଧି ହେଉଛି। ପ୍ରକୃତରେ ଦେଖିବାକୁ ଗଲେ ଶେଷରେ ଚାଷୀ ହାତରେ ଏକ ବିରାଟ ଶୂନ ରହୁଛି ।
-ଅଜିତ କୁମାର ଶତପଥୀ, ଆଇନପରାମର୍ଶ ଦାତା,
ରାଜବୋଡାସମ୍ବର କୃଷକ ସଙ୍ଗଠନ,ପଦ୍ମପୁର
ଚାଷୀଙ୍କ ସମସ୍ୟା ବୁଝି ସରକାର ପଦକ୍ଷେପ ନିଅନ୍ତୁ
କୃଷି ସମ୍ବନ୍ଧୀୟ ନୀତି ଓ ନିୟମକୁ ସମୟୋପଯୋଗୀ ଭାବେ ପରିବର୍ତ୍ତନ କରାଯାଉ ଏବଂ ସରକାର ଗ୍ରାମାଞ୍ଚଳକୁ ଆସି ଚାଷୀଙ୍କ ବାସ୍ତବ ସମସ୍ୟା ବୁଝି ଚାଷ ସମ୍ବନ୍ଧୀୟ ପଦକ୍ଷେପ ଗ୍ରହଣ କରନ୍ତୁ। ତେବେ ଯାଇ କୃଷି କ୍ଷେତ୍ରର ଉନ୍ନତି ସହ ଚାଷୀମାନେ ମଧ୍ୟ ପ୍ରକୃତ ଲାଭ ପାଇପାରିବେ।
-ପ୍ରବୀଣ ଦାଶ, ଚାଷୀ, ଦର୍ଲିଗୁଡ଼ା, ପଦ୍ମପୁର
ଖର୍ଚ୍ଚ ବଢୁଛି, ଆୟ ବଢୁନାହିଁ
ଚାଷ କରିବା ଦିନକୁ ଦିନ କଷ୍ଟକର ହୋଇପଡୁଛି। ଚାଷ ଖର୍ଚ୍ଚ ବଢୁଛି, କିନ୍ତୁ ସେହି ଅନୁପାତରେ ଆୟ ବଢୁନାହିଁ। ସାର ଯୋଗାଣ, ଜମି ପଞ୍ଜୀକରଣ ଓ ଧାନ ବିକ୍ରି ଭଳି ସରକାରୀ ପ୍ରକ୍ରିୟା ଅତ୍ୟନ୍ତ ଜଟିଳ ହୋଇପଡ଼ିଛି। ଏହି ସବୁ କାରଣରୁ ଶିକ୍ଷିତ ଯୁବବର୍ଗ କୃଷି ପ୍ରତି ଆଗ୍ରହ ହରାଉଛନ୍ତି।
-କୈଳାଶ ବାରିକ, ଯୁବଚାଷୀ, ଲମ୍ବରଜୁନା,ପଦ୍ମପୁର
Dharitri – Odisha’s No.1 Odia Daily
