ଭୁବନେଶ୍ବର,୧୬ା୧୨(ବ୍ୟୁରୋ):ପଦ୍ମପୁର ଉପନିର୍ବାଚନ ଦାୟିତ୍ୱରେ ଥିବା ନେତାମାନଙ୍କୁ ନବୀନ ନିବାସରୁ ଗୁରୁବାର ପୂର୍ବାହ୍ନ ୧୧ଟା ସୁଦ୍ଧା ପହଞ୍ଚିବା ପାଇଁ ଡକରା ମିଳିଥିଲା। ଡକରା ପାଇ ଦାୟିତ୍ୱରେ ଥିବା ସମସ୍ତ ନେତା ଯାଇ ନବୀନ ନିବାସରେ ପହଞ୍ଚିଥିଲେ। ଏହାସହ ଯେଉଁମାନେ ପର୍ଯ୍ୟବେକ୍ଷକ ଭାବେ ଦାୟିତ୍ୱ ପାଇଥିଲେ ସମସ୍ତଙ୍କୁ ଫଳାଫଳ ସମ୍ପର୍କିତ ରିପୋର୍ଟ ନେଇ ଆସିବାକୁ କୁହାଯାଇଥିଲା। ସେହି ଅନୁଯାୟୀ ନିର୍ବାଚନମଣ୍ଡଳୀଠାରୁ ଆରମ୍ଭ କରି ବ୍ଲକ ଏବଂ ଜୋନ୍ ଓ ପଞ୍ଚାୟତ ଦାୟିତ୍ୱରେ ଥିବା ନେତାମାନେ ନିଜ ରିପୋର୍ଟକୁ ସାଙ୍ଗରେ ଧରି ଯାଇ ପହ଼ଞ୍ଚି ଯାଇଥିଲେ। ଏହାପରେ ସମସ୍ତ ନେତାଙ୍କୁ ନେଇ ଜୋନ୍ଓ୍ବାରି ପଦ୍ମପୁରରେ ହୋଇଥିବା ଫଳାଫଳର ସମୀକ୍ଷା କରାଯାଇଥିଲା। କେଉଁ ପଞ୍ଚାୟତରେ କେତେ ରେଜଲ୍ଟ ହୋଇଛି, କେଉଁଠାରେ ଖରାପ ହେଇଛି ଏବଂ କୋଉଁଠାରେ ଦଳର ଭଲ ପ୍ରଦର୍ଶନ ହୋଇଛି ସବୁର ତର୍ଜମା କରାଯାଇଥିଲା। ଏହାପରେ କେଉଁ ନେତାମାନେ ଦାୟିତ୍ୱରେ ଥିବା ପଞ୍ଚାୟତରେ କ’ଣ ସବୁ ପ୍ରତିଶ୍ରୁତି ଦେଇ ଫେରିଛନ୍ତି ସେକଥା ମଧ୍ୟ ଜଣାଇଥିଲେ। ସେହି ପ୍ରତିଶ୍ରୁତି ଯେପରି ତୁରନ୍ତ ଏବଂ ଯଥା ଢଙ୍ଗରେ ପାଳନ ହେବ ସେନେଇ ସେମାନଙ୍କୁ ଗୁରୁତ୍ୱ ଦେବା ଲାଗି କୁହାଯାଇଥିଲା। ଏହାସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆସନ୍ତା ମାସରେ ପଦ୍ମପୁର ଯିବା ଉପରେ ମଧ୍ୟ ଆଲୋଚନା ହୋଇଥିଲା।
ସେହିପରି ଜୋନ୍ଓ୍ବାରି ନେତାମାନଙ୍କୁ ଡାକି ପଦ୍ମ୍ପୁର ଉପନିର୍ବାଚନରେ କାମ କରିବା ସମୟରେ କ’ଣ ସବୁ ସେମାନଙ୍କ ଅନୁଭୂତି ରହିଲା ସେନେଇ ମଧ୍ୟ ପଚରାଯାଇଛି। ରାଜ୍ୟ ସରକାର ଆଣିଥିବା ଯୋଜନା ସବୁ ମଧ୍ୟରୁ କେଉଁଗୁଡିକ ଲୋକମାନଙ୍କ ଦ୍ୱାରା ବିଶେଷ ଆଦୃତ ହେଉଛି ,କେଉଁ ଯୋଜନାକୁ ହିତାଧିକାରୀମାନେ ଭଲ ପାଉନାହାନ୍ତି ସେନେଇ ପଞ୍ଚାୟତସ୍ତରରେ ଦାୟିତ୍ୱରେ ଥିବା ନେତାମାନଙ୍କୁ ପଚରାଯାଇଥିଲା। ଏହାସହ ଭାଜପା, ରାଷ୍ଟ୍ରୀୟ ସ୍ବୟଂ ସେବକ, ବିଶ୍ୱ ହିନ୍ଦୁ ପରିଷଦ ବାଲାଙ୍କ ଭୂମିକା କିପରି ରହୁଛି ସେନେଇ ମଧ୍ୟ ମତାମତ ନିଆଯାଇଥିଲା। ଏହାସହ ଅନ୍ୟ କେଉଁ ଯୋଜନା କଲେ ଲୋକଙ୍କ ଦ୍ୱାରା ଆଦୃତ ହୋଇପାରିବ ସେକଥା ମଧ୍ୟ ପଚରାଯାଇଥିଲା। ତେବେ ଆସନ୍ତା ଜାନୁୟାରୀରେ ମୁଖ୍ୟମନ୍ତ୍ରୀ ପଦ୍ମପୁର ନିର୍ବାଚନମଣ୍ଡଳୀର ସମସ୍ତଙ୍କୁ ଧନ୍ୟବାଦ ଦେବାକୁ ଯିବେ। ଏହା ପୂର୍ବରୁ ପଞ୍ଚାୟତସ୍ତରରେ ନେତାମାନେ ଯାହାସବୁ ପ୍ରତିଶ୍ରୁତି ଦେଇଛନ୍ତି ସେସବୁର ପ୍ରୋଜେକ୍ଟ ରିପୋର୍ଟ ପ୍ରସ୍ତୁତ କରି କିପରି ତୃଣମୂଳସ୍ତରରେ କାମ ହେବ ସେନେଇ କାମ ଆରମ୍ଭ କରିଦେବାକୁ ସରକାରୀ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି। ମୁଖ୍ୟମନ୍ତ୍ରୀ ଯେବେ ପଦ୍ମପୁର ଯିବେ ସେହି କାର୍ଯ୍ୟାଦେଶ ବଣ୍ଟାଯିବ ବୋଲି ଦଳର ଜଣେ ବରିଷ୍ଠ ନେତା ସୂଚନା ଦେଇଛନ୍ତି। ତେବେ ବୈଠକ ଶେଷରେ ସବୁ ନେତାଙ୍କୁ ଜଗନ୍ନାଥଙ୍କ ମହାପ୍ରସାଦ ବଣ୍ଟାଯାଇଥିଲା। ତେବେ ବୈଠକ ଶେଷରେ ଗଣମାଧ୍ୟମକୁ ସୂଚନା ଦେଇ ପ୍ରସନ୍ନ ଆଚାର୍ଯ୍ୟ କହିଛନ୍ତି, ମୁଖ୍ୟମନ୍ତ୍ରୀ ପଦ୍ମପୁର ଗସ୍ତ କରିବେ। କିନ୍ତୁ ମୁଖ୍ୟମନ୍ତ୍ରୀ କେବେ ଯିବେ ତା’ର ତାରିଖ ନିର୍ଦ୍ଧାରଣ ହୋଇନାହିଁ ବୋଲି ସେ କହିଛନ୍ତି।
