ପିପିଲି,୩୦।୫(ସ୍ବ.ପ୍ର.): ପିପିଲି ପୌରାଞ୍ଚଳ ୧୪ୱାର୍ଡ ସୁଲତାନନଗର ଗ୍ରାମର ଏକ ଘର ନିକଟରେ ଶନିବାର ମୃତଦେହ ପୋତିବା ନିମନ୍ତେ ଏକ କବର ଖୋଳିବାକୁ ନେଇ ଉତ୍ତେଜନା ଦେଖାଦେଇଛି। ଏକ ନିର୍ଦ୍ଦିଷ୍ଟ ସମ୍ପ୍ରଦାୟର ଜଣେ ବୃଦ୍ଧାଙ୍କ ମୃତଦେହକୁ ପୋତିବା ପାଇଁ ଅନ୍ୟ ସମ୍ପ୍ରଦାୟ ଲୋକଙ୍କ ଘର ନିକଟରେ କବର ଖୋଳାଯାଉଥିବାରୁ ଏଭଳି ପରିସ୍ଥିତି ଉପୁଜିଥିଲା। ଖବରପାଇ ଘଟଣାସ୍ଥଳରେ ପିପିିଲି ଥାନାଧିକାରୀ ଅଭିମନ୍ୟୁ ନାୟକ ପହଞ୍ଚତ୍ ଲୋକମାନଙ୍କୁ ବୁଝାଶୁଝା କରିବା ପରେ ପରିସ୍ଥିତି ଶାନ୍ତ ପଡ଼ିଛି। ସୂଚନା ଅନୁଯାୟୀ, ସୁଲତାନ ନଗର ଗ୍ରାମର ସେକ ଆସାଦୁନ ନବିଙ୍କ ମାଆଙ୍କ ଦେହ ଶନିବାର ସକାଳୁ ହଠାତ୍ ଖରାପ ହେବାରୁ ପରିବାର ଲୋକେ ତାଙ୍କୁ ସ୍ଥାନୀୟ ଚିକିତ୍ସାଳୟକୁ ନେଇଥିଲେ, କିନ୍ତୁ ସେଠାରେ ତାଙ୍କର ମୃତ୍ୟୁ ଘଟିଥିଲା। ପରେ ତାଙ୍କ ମୃତଦେହକୁ ଗ୍ରାମର କବର ସ୍ଥାନକୁ ନେବା ପରିବର୍ତ୍ତେ ଓଡ଼ିଆ ହରଜନ ବସ୍ତି ଘର ନିକଟରେ ପୋତିବା ପାଇଁ ସମ୍ପର୍କୀୟମାନେ କବର ପାଇଁ ଗାତ ଖୋଳିଥିଲେ। ଏହାକୁ ସ୍ଥାନୀୟ ଲୋକେ ବିରୋଧ କରିବାରୁ ଉଭୟଙ୍କ ମଧ୍ୟରେ କଥା କଟାକଟି ହୋଇ ଉତ୍ତେଜନା ଦେଖାଦେଇଥିଲା। ହରିଜନ ବସ୍ତିବାସିନ୍ଦାଙ୍କ କହିବା ମୁତାବକ, ସେଠାରେ ଶହେରୁ ଊର୍ଦ୍ଧ୍ୱ ଲୋକ ଓ ପିଲାଛୁଆଙ୍କୁ ନେଇ ଦୀର୍ଘଦିନ ହେବା ଚଳିଆସୁଛୁ। ସେମାନଙ୍କ କବର ସ୍ଥାନ ଥିବାବେଳେ ଆମ ଘର ନିକଟରେ କାହିଁକି କବର କରାଯାଉଛି। ଏଠାରେ କବର କଲେ ଆମ ପିଲାଛୁଆ ଡରିବେ ଓ ନାନା ଅସୁବିଧା ସୃଷ୍ଟି ହେବ ବୋଲି ବସ୍ତି ପକ୍ଷରୁ ଶାନ୍ତିଲତା ବେହେରା ଓ ଅନ୍ୟମାନେ ଅଭିଯୋଗ କରିଥିଲେ। ଅନ୍ୟପଟେ ମୃତକଙ୍କ ପୁଅ ସେକ ଆସାଦୁନ ନବି କହିଛନ୍ତି, ଏହି ଜାଗାଟି ଆମର। ଏଠାରେ ମାଆଙ୍କ ମୃତଦେହ ପୋତାହେଲେ ଆମ ପାଇଁ ଶୁଭ ହେବ। ପରେ ପୋଲିସ ପହଞ୍ଚତ୍ ଘଟଣାର ସମାଧାନ କରିଥିବା ବେଳେ ଅଭିଯୋଗକାରୀ ଶାନ୍ତିଲତା ବେହେରା ଓ ତାଙ୍କ ସମ୍ପର୍କୀୟମାନେ ଏଥିରେ ସନ୍ତୁଷ୍ଟ ନ ହୋଇ ଥାନାର ଦ୍ୱାରସ୍ଥ ହୋଇଛନ୍ତି।
