ଦିଗପହଣ୍ଡି,୧୯।୮(ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ପଦ୍ମପୁର ଗ୍ରାମ ନିକଟ ଦୁର୍ଗମ ଜଙ୍ଗଲରେ ବୁଧବାର ଦିଗପହଣ୍ଡି ଓ ଚିକିଟି ଅବକାରୀ ବିଭାଗ ପକ୍ଷରୁ ମିଳିତ ଚଢାଉ କରାଯାଇଥିଲା । ତେବେ ପ୍ରାୟ ୮ ହଜାର ୮୦୦ ଲିଟର ମଦ ପୋଚ ଓ ପ୍ରାୟ ୫ ଶହ ଲିଟର ମଦ ନଷ୍ଟ କରାଯିବା ସହ ୫୮୩ ଲିଟର ରନ୍ଧା ଦେଶୀମଦ ଓ ମଦ ରନ୍ଧା ସରଞ୍ଜାମ ଜବତ କରାଯାଇଛି । ମଦ ପ୍ରସ୍ତୁତି ଓ ଚୋରା ଚାଲାଣ ଅଭିଯୋଗରେ ପାଟପୁର ଥାନା ଖଣ୍ଡଦୋଳି ଗ୍ରାମର ପ୍ରଫୁଲ୍ଲ ବିଷୋୟୀ(୫୭),ପ୍ରମିଳା ବିଷୋୟୀ(୪୫) ଏବଂ ରାଜନାପଲ୍ଲୀ ଗ୍ରାମର ରମେଶ ବଳିୟାରସିଂ(୫୦) ଙ୍କୁ ଗିରଫ କରାଯାଇଥିଲା।
ଅଭିଯୁକ୍ତ ପ୍ରଫୁଲ୍ଲଙ୍କ ଠାରୁ ୬୦ ଲିଟର, ପ୍ରମିଳାଙ୍କ ଠାରୁ ୧୦ ଲିଟର ଏବଂ ରମେଶଙ୍କ ଠାରୁ ୧୩ ଲିଟର ବେଆଇନ ରନ୍ଧା ଦେଶୀମଦ ଜବତ କରାଯାଇଛି । ଦିଗପହଣ୍ଡି ଅବକାରୀ ଥାନା ମାମଲା ନଂ.୮୭/୨୬-୨୬,୮୮/୨୬-୨୭ ଏବଂ ୮୯/୨୬-୨୭ ଅନୁଯାୟୀ ୩ ଟି ମାମଲାରେ ଅଭିଯୁକ୍ତମାନଙ୍କୁ ସାନଖେମୁଣ୍ଡି ଗ୍ରାମ୍ୟ ନ୍ୟାୟାଳୟ କୋର୍ଟକୁ ଚାଲାଣ କରାଯାଇଛି । ଅଭିଯୁକ୍ତ ପ୍ରଫୁଲ୍ଲ ଏବଂ ରମେଶ ଙ୍କ ଜାମିନ ଆବେଦନ ନାମଞ୍ଜୁର ହେବାରୁ ଅଭିଯୁକ୍ତ ଦ୍ବୟଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି । ଅପରପକ୍ଷରେ ଅଭିଯୁକ୍ତା ପ୍ରମିଳାଙ୍କ ଜାମିନ ଆବେଦନ ମଞ୍ଜୁର ହୋଇଥିବାରୁ ତାଙ୍କୁ ଛାଡ଼ି ଦିଆଯାଇଛି । ଏହି ଚଢାଉ ଧରପଗଡରେ ଦିଗପହଣ୍ଡି ଅବକାରୀ ଥାନା ଓଆଇସି ସସ୍ମିତା ମଲ୍ଲିକ, ଏଏସଆଇ ଏନ୍.ତ୍ରିପତି, କନଷ୍ଟେବଳ ରାଜେଶ ଜେନା, ବଳରାମ ପାତ୍ର, ଏସ.କେ.ରାଜେଶ ଉଦ୍ଦିନ୍, ଆଲଫ ଲତା ସାହୁ, ଚିକିଟି ଅବକାରୀ ଥାନା ଓଆଇସି ସଞ୍ଜୟ ଭୁକ୍ତା, ଏଏସଆଇ ସୁଶାନ୍ତ କଅଁର, କନେଷ୍ଟବଳ ଗୋବିନ୍ଦ ବେହେରା, ପ୍ରଫୁଲ୍ଲ ବେହେରା, ସୂର୍ଯ୍ୟ ଜେନା ଏବଂ ଦିବ୍ୟ କଅଁର ସାମିଲ ଥିଲେ।
ଦୀର୍ଘଦିନ ହେଲା ସମ୍ପୃକ୍ତ ଦୁର୍ଗମ ଜଙ୍ଗଲରେ ମଦ ମାଫିଆମାନେ ଚୋରାରେ ବେଆଇନ ରନ୍ଧା ଦେଶୀମଦ ପ୍ରସ୍ତୁତ କରି ବିଭିନ୍ନ ସହରାଞ୍ଚଳ ଓ ଗ୍ରାମାଞ୍ଚଳମାନଙ୍କୁ ଚାଲାଣ କରୁଥିବା ଜଣାପଡିଛି ।ଗୋଇନ୍ଦା ସୂଚନାକୁ ଭିତ୍ତିକରିଅବକାରୀ ବିଭାଗ ପକ୍ଷରୁ ଅତର୍କିତ ଭାବେ ଏହି ଚୋରା ମଦ କାରଖାନା ଉପରେ ଚଢାଉ କରାଯାଇଥିବା ଦିଗପହଣ୍ଡି ଅବକାରୀ ଓଆଇସି କହିଛନ୍ତି ।
