ଗୁଣପୁର, ୨।୬(ସଂକେତ ପାତ୍ର): ରାୟଗଡ଼ା ଜିଲାର ମାରିଗୁଡ଼ା ଗ୍ରାମରେ ଚାଲିଥିବା ଚୋରା ରନ୍ଧା ମଦ କାରବାର ଉପରେ ଅବକାରୀ ବିଭାଗ ପକ୍ଷରୁ ବ୍ୟାପକ ଚଢ଼ାଉ କରାଯାଇ ୮ ଜଣଙ୍କୁ ଗିରଫ କରାଯାଇଛି। ଏହି ଅଭିଯାନରେ ମୋଟ ୧୦ଟି ମାମଲା ରୁଜୁ କରାଯାଇଥିବା ବେଳେ ବହୁ ପରିମାଣର ଚୋରା ମଦ ଓ ମହୁଲ ପେଚ ନଷ୍ଟ କରାଯାଇଛି।
ରାୟଗଡ଼ା ଜିଲା ଅବକାରୀ ଅଧିକ୍ଷକ ସନ୍ତୋଷ କୁମାର ଧଳସାମନ୍ତକଙ୍କ ନିର୍ଦ୍ଦେଶକ୍ରମେ ଡିଏସଇ ଗୁଣପୁର ସଞ୍ଜିବ କୁମାର ବାର୍ଲି, ଅବକାରୀ ନିରୀକ୍ଷକ ବେଣୁଧର ସାମଲ ଓ ଗୁଣପୁର ପୋଲିସ ଦଳର ଉପସ୍ଥିତିରେ ଏହି ଚଢ଼ାଉ କରାଯାଇଥିଲା। ଗୁଣପୁର ଅବକାରୀ ଉପନିରୀକ୍ଷକ ପି. ବିଶେଶ୍ୱର ରାଓ, ଉପନିରୀକ୍ଷକ ଲକ୍ଷ୍ମୀ ଦେବୀ ଏବଂ ଅବକାରୀ କର୍ମଚାରୀମାନେ ମିଳି ମାରିଗୁଡ଼ା ଗ୍ରାମରେ ଚୋରା ମଦ ରନ୍ଧା ହେଉଥିବା ସ୍ଥାନରେ ଅଚାନକ ଚଢ଼ାଉ କରିଥିଲେ।
ଚଢ଼ାଉ ସମୟରେ ୮,୦୦୦ ଲିଟର ଗୁଡ଼ ମିଶ୍ରିତ ମହୁଲ ପେଚ ଏବଂ ୧,୦୦୦ ଲିଟର ଚୋରା ରନ୍ଧା ମଦ ଜବତ କରି ନଷ୍ଟ କରାଯାଇଥିଲା। ଜବତ ସାମଗ୍ରୀର ଆନୁମାନିକ ମୂଲ୍ୟ ପ୍ରାୟ ୬ ଲକ୍ଷ ଟଙ୍କା ହେବ ବୋଲି ଅବକାରୀ ବିଭାଗ ସୂଚନା ଦେଇଛି।
ଏଥିସହ ଚୋରା ମଦ ପ୍ରସ୍ତୁତିରେ ବ୍ୟବହୃତ ବିଭିନ୍ନ ଆସବାବପତ୍ର ଓ ସରଞ୍ଜାମ ଜବତ କରାଯାଇ ଘଟଣାସ୍ଥଳରେ ନଷ୍ଟ କରାଯାଇଥିଲା। ଅବକାରୀ ବିଭାଗ ପକ୍ଷରୁ ଆଗାମୀ ଦିନରେ ଏଭଳି ଚୋରା ମଦ କାରବାର ବିରୋଧରେ ଅଧିକ କଡ଼ା ପଦକ୍ଷେପ ଜାରି ରହିବ ବୋଲି କୁହାଯାଇଛି।
