ବରୁଇପୁର,୨୧।୧୧ : ଦିଲ୍ଲୀର ଶ୍ରଦ୍ଧା ଓ୍ବାଲ୍କର ବୀଭତ୍ସ ହତ୍ୟାକାଣ୍ଡ ଅନୁରୂପ ଅପରାଧ ପଶ୍ଚିମବଙ୍ଗରେ ସାମ୍ନାକୁ ଆସିଛି। ଶ୍ରଦ୍ଧାଙ୍କୁ ତାଙ୍କ ଲିଭ୍-ଇନ ପାର୍ଟନର ହତ୍ୟା କରିବା ପରେ ଶରୀରକୁ ୩୫ ଖଣ୍ଡ କରି ବିଭିନ୍ନ ସ୍ଥାନରେ ଫିଙ୍ଗିଥିଲେ। ଦକ୍ଷିଣ ୨୪ ପ୍ରଗଣାର ବାରୁଇପୁର ଥାନା ଅଞ୍ଚଳରେ ଜଣେ ପୂର୍ବତନ ନୌସେନା ଅଧିକାରୀଙ୍କୁ ତାଙ୍କ ସ୍ତ୍ରୀ ଓ ପୁଅ ହତ୍ୟା କରିବା ପରେ ମୃତଦେହକୁ ୬ ଖଣ୍ଡ କରି ବିଭିନ୍ନ ସ୍ଥାନରେ ଫିଙ୍ଗିଦେଇଛନ୍ତି।
ପୋଲିସ ଶନିବାର ମୃତକଙ୍କ ସ୍ତ୍ରୀ ଓ ପୁଅଙ୍କୁ ଗିରଫ କରିଛି। ନୌସେନା ଅଧିକାରୀ ଉଜ୍ଜ୍ୱଳ ଚକ୍ରବର୍ତ୍ତୀଙ୍କୁ ଗତ ୧୨ ତାରିଖରେ ତାଙ୍କ ପୁଅ ଠେଲିଦେବାରୁ ତାଙ୍କ ମୁଣ୍ଡ ମାଡ଼ ହୋଇଥିଲା। ପଲିଟେକ୍ନିକ୍ରେ କାର୍ପେଣ୍ଟ୍ରି ପଢ଼ୁଥିବା ପୁଅ ତାଙ୍କ ଗଳା ଚିପି ହତ୍ୟା କରିଥିଲେ। ୫୫ ବର୍ଷୀୟ ଚକ୍ରବର୍ତ୍ତୀଙ୍କୁ ହତ୍ୟା କରିବା ପରେ ତାଙ୍କ ମୃତଦେହକୁ ସ୍ତ୍ରୀ ଓ ପୁଅ ବାଥ୍ରୁମ୍କୁ ନେଇ ସେଠାରେ କରତ ସାହାଯ୍ୟରେ ୬ ଖଣ୍ଡ କରିଥିଲେ।
ପୁଅ ମୃତଦେହ ଖଣ୍ଡଗୁଡ଼ିକୁ ପ୍ଲାଷ୍ଟିକରେ ଗୁଡ଼ାଇ ସାଇକେଲ୍ରେ ୬ ଥରରେ ନେଇ ଘରଠାରୁ ୫୦୦ ମିଟର ଦୂରରେ ବିଭିନ୍ନ ସ୍ଥାନରେ ଫିଙ୍ଗିଦେଇଥିଲେ। ଚକ୍ରବର୍ତ୍ତୀଙ୍କ ଦୁଇଟି ଗୋଡ଼ ଅଳିଆ ଗଦାରୁ ଏବଂ ପାକସ୍ଥଳୀ ଏକ ପୋଖରୀରୁ ମିଳିଛି। ଅନ୍ୟ ଖଣ୍ଡଗୁଡ଼ିକୁ ପୋଲିସ ଖୋଜୁଛି। ଗତ ୧୫ ତାରିଖ ଭୋର ସମୟରେ ମାଆ-ପୁଅ ବାରୁଇପୁର ଥାନାରେ ପହଞ୍ଚତ୍ ବାପା ନିଖୋଜ ଥିବା ଅଭିଯୋଗ କରିବାରୁ ପୋଲିସର ସନ୍ଦେହ ହୋଇଥିଲା। ଜେରାବେଳେ ପୁଅ ଦୋଷ ମାନିଛନ୍ତି
