ଭୁବନେଶ୍ୱର, ୨୪।୧୨ (ବ୍ୟୁରୋ): ପାହାଳ ଥାନାସ୍ଥିତ କିଆ ମୋଟର୍ସ ଶୋ’ରୁମ୍ର ୱେବ୍ସାଇଟ୍ରୁ ଡାଟା ଚୋରି ଘଟଣାରେ ଭୁବନେଶ୍ୱର ସାଇବର କ୍ରାଇମ୍ ଓ ଅର୍ଥନୈତିକ ଅପରାଧ ଥାନା ପୋଲିସ ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରିଛି। ସେ ହେଲେ ପୁରୁଣା ଭୁବନେଶ୍ୱର ଅଞ୍ଚଳର ସୁଭାଶିଷ ମହାନ୍ତି। ସେ ଏହି ଶୋରୁମ୍ରେ ପୂର୍ବତନ କର୍ମଚାରୀ ଥିଲେ। ଗତ ଅକ୍ଟୋବରରେ କିଆ ମୋଟର୍ସରୁ ଚାକିରି ଛାଡ଼ି ଗଜପତି ନଗରସ୍ଥିତ ଅନ୍ୟଏକ କାର୍ ଶୋ’ରୁମ୍ରେ କାମ କରୁଛନ୍ତି। ସେଠାରେ କିଆ ମୋଟର୍ସର ୟୁଜର୍ ଆଇଡି ଓ ପାସ୍ୱାର୍ଡ୍ ବ୍ୟବହାର କରି କଷ୍ଟମର ଡାଟା ଆକାଉଣ୍ଟକୁ ଲଗିନ୍ କରୁଥିଲେ। ସେ ଏକାଧିକଥର ବିଭିନ୍ନ ଗ୍ରାହକଙ୍କ ଡାଟା ଚୋରି କରି ନେଇଯାଇଥିବା ଶୋ’ରୁମ୍ କର୍ତ୍ତୃପକ୍ଷ ଜାଣିବାକୁ ପାଇଥିଲେ। ଘଟଣା ସଂକ୍ରାନ୍ତରେ ଶୋ’ରୁମ୍ର ଜେନେରାଲ ମ୍ୟାନେଜର ଦୀପକ କୁମାର ଡିସେମ୍ବର ୬ରେ ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା (ନଂ.୫୦/୨୦୨୨) ରୁଜୁ କରି ତଦନ୍ତ କରିବା ପରେ ଆଇପି ଆଡ୍ରେସ୍ରୁ ସୁଭାଶିଷ ହିଁ ଏଭଳି କରୁଥିବା ଜାଣିବାକୁ ପାଇଥିଲା। ବୁଧବାର ପୋଲିସ ତାଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। କୋର୍ଟରୁ ସେ ଜାମିନରେ ମୁକୁଳିଥିବା ପୋଲିସ ପକ୍ଷରୁ ସୂଚନା ଦିଆଯାଇଛି। ତେବେ ଏହି ମାମଲାରେ ଆଉ କେତେଜଣଙ୍କ ହାତ ଥିବା ସନ୍ଦେହ କରି ପୋଲିସ ଅଧିକ ତଦନ୍ତ ଜାରି ରଖିଛି।
