କଟକ ଅଫିସ, ୨୦।୫: କଟକ ସହରରେ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। କରୋନା କବଳରୁ ରକ୍ଷା ପାଇବା ପାଇଁ ଟିକା ନେବାକୁ ଲୋକଙ୍କ ମଧ୍ୟରେ ଆଗ୍ରହ ବଢିବାରେ ଲାଗିଛି। ବର୍ତ୍ତମାନ ସହରର ୧୯ଟି ଟିକାକରଣ କେନ୍ଦ୍ରରେ ଟିକାଦାନ ଚାଲିଛି। ସେଥିମଧ୍ୟରୁ କେତେକ କେନ୍ଦ୍ରରେ ଟିକାକରଣ ବ୍ୟବସ୍ଥିତ ଭାବେ ଚାଲିଥିବାବେଳେ ଅନ୍ୟ କେନ୍ଦ୍ରଗୁଡିକରେ ଅବ୍ୟବସ୍ଥା ଦେଖିବାକୁ ମିଳିଛି। ବିଭିନ୍ନ କେନ୍ଦ୍ରରେ ଟିକା ନେବା ପାଇଁ ଗହଳି ଲାଗୁଥିବାବେଳେ ଲୋକମାନେ ସାମାଜିକ ଦୂରତା ରଖୁ ନ ଥିବା ଦେଖିବାକୁ ମିଳୁଛି। ଟିକା ନେବା ପାଇଁ ଅନ୍ଲାଇନ୍ରେ ନାମ ପଞ୍ଜୀକରଣ କରିବା ବାଧ୍ୟତାମୂଳକ ରହିଛି। କେତେକ ସ୍ଥାନରେ ନାମ ପଞ୍ଜୀକରଣ ପାଇଁ ବସ୍ତି ଲୋକଙ୍କ ପାଖରେ ଆଣ୍ଡ୍ରୋଏଡ୍ ମୋବାଇଲ ଫୋନ୍ ନ ଥିବାବେଳେ ଆଉ କେତେକ ସ୍ଥାନରେ ଅନ୍ଲାଇନ୍ ବ୍ୟବସ୍ଥା ସମ୍ପର୍କରେ ଲୋକେ ଜାଣିପାରୁନାହାନ୍ତି। ଏପରି କି ଅନେକ ସ୍ଥାନରେ ନାମ ପଞ୍ଜୀକରଣ କରି ମଧ୍ୟ ଲୋକଙ୍କୁ ଟିକା ମିଳୁ ନ ଥିବା ଅଭିଯୋଗ ହୋଇଛି। ନୂଆବଜାର ସହରାଞ୍ଚଳ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଟିକାକରଣକୁ ନେଇ ବୁଧବାର ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା। ଟିକା ନେବା ପାଇଁ ଲୋକମାନେ ନାମ ପଞ୍ଜୀକରଣ କରିଥିଲେ। ସେମାନଙ୍କ ମୋବାଇଲକୁ ମେସେଜ୍ ଆସିଥିଲେ ମଧ୍ୟ ସେଥିମଧ୍ୟରୁ ଅଧିକାଂଶ ଲୋକଙ୍କୁ ଟିକା ମିଳି ନ ଥିଲା। ଦୀର୍ଘ ସମୟ ଧରି ଛିଡା ହେବା ପରେ ସେମାନଙ୍କୁ ନିରାଶ ହୋଇ ଘରକୁ ଫେରିବାକୁ ପଡିଥିଲା। ଏହାକୁ ନେଇ ସେମାନଙ୍କ ମନରେ ଅସନ୍ତୋଷ ପ୍ରକାଶ ପାଇଛି।
ଚାଉଳିଆଗଞ୍ଜ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଟିକା ନେବା ପାଇଁ ଲୋକଙ୍କ ଭିଡ ଲାଗିଥିଲା। ବର୍ତ୍ତମାନ ବେସରକାରୀ ଟିକାକେନ୍ଦ୍ରରେ ଟିକାଦାନ ବନ୍ଦ ରହିଛି। ହେଲେ ପଞ୍ଜୀକରଣ କରୁଥିବା ଲୋକମାନଙ୍କୁ ବେସରକାରୀ ଟିକାକେନ୍ଦ୍ରରେ ଟିକା ନେବା ପାଇଁ ମେସେଜ ଆସୁଛି। ଏଭଳି ଭାବେ ଲୋକମାନେ ଅସୁବିଧାର ସମ୍ମୁଖୀନ ହେଉଛନ୍ତି। ତେବେ ଏବାବଦରେ କୋଭିଡ୍ ନୋଡାଲ ଅଧିକାରୀଙ୍କ କୌଣସି ପ୍ରତିକ୍ରିୟା ମିଳିପାରିନାହିଁ।
ସିଟି ହସ୍ପିଟାଲରେ ଲୋକମାନେ କରୋନା ଗାଇଡ୍ଲାଇନ୍କୁ ଉଲ୍ଲଂଘନ କରିଥିବା ଦେଖିବାକୁ ମିଳିଥିଲା। ସେଠାରେ ଲୋକମାନେ ସାମାଜିକ ଦୂରତା ରକ୍ଷା ନ କରି ଏକତ୍ରିତ ଛିଡା ହୋଇଥିଲେ। ଏପରି କି କେତେଜଣ ହାତରେ ମାସ୍କ ଧରି ଛିଡା ହୋଇଥିବା ଦେଖିବାକୁ ମିଳିଥିଲା। ଟିକାକେନ୍ଦ୍ରରେ ଏଭଳି ଅବ୍ୟବସ୍ଥା ଦେଖାଦେଇଥିଲେ ମଧ୍ୟ ହସ୍ପିଟାଲରେ କୌଣସି ଅଧିକାରୀଙ୍କ ଦେଖା ମିଳି ନ ଥିଲା। ଏପରିକି ସିକ୍ୟୁରିଟି ଗାର୍ଡ କିମ୍ବା ପୋଲିସକୁ ମେଡିକାଲ ପକ୍ଷରୁ କୌଣସି ସୂଚନା ଦିଆଯାଇ ନ ଥିଲା। ଏପରି ସ୍ଥଳେ ଲୋକେ ଟିକା ନେବା ପରିବର୍ତ୍ତେ କରୋନାରେ ଆକ୍ରାନ୍ତ ହେବାର ସମ୍ଭାବନା ରହିଛି ବୋଲି ସେଠାରେ ଉପସ୍ଥିତ ଥିବା ଲୋକମାନେ ମତପ୍ରକାଶ କରିଛନ୍ତି। ଏ ନେଇ ସିଟି ହସ୍ପିଟାଲ ଅଧୀକ୍ଷକ ସୁଧାଂଶୁ ଗିରିଙ୍କ ପ୍ରତିକ୍ରିୟା ମିଳିପାରିନାହିଁ।
