ମୁମ୍ବାଇ: ଅଭିନେତା ଅର୍ଜୁନ କପୁର ନିକଟରେ ତାଙ୍କ ଫିଲ୍ମ ‘ସିଙ୍ଘମ ଏଗେନ୍’ରେ ଖଳନାୟକ ଭୂମିକାରେ ନଜର ଆସି ଦର୍ଶକଙ୍କ ବହୁ ପ୍ରଶଂସା ସାଉଁଟିଛନ୍ତି। ତେବେ ସେ ଗତ କିଛି ଦିନ ହେବ ହାସିମୋଟୋ ଥାଇରଏଡିଟିସ୍ ନାମକ ଏକ ରୋଗରେ ପୀଡ଼ିତ ଅଛନ୍ତି ବୋଲି ଶନିବାର ଏକ ସାକ୍ଷାତ୍କାରରେ କହିଛନ୍ତି। ଅର୍ଜୁନ କହିଛନ୍ତି, ନିକଟରେ ତାଙ୍କ ଜୀବନରେ ଏପରି ଏକ ସମୟ ଆସିଥିଲା, ଯେତେବେଳେ ସେ ନିଜକୁ ଏକୁଟିଆ ଅନୁଭବ କରୁଥିଲେ। ଗତ କିଛି ଦିନ ହେବ ସେ ଅନେକ ଶାରୀରିକ ସମସ୍ୟା ଦେଇ ଗତି କରିଛନ୍ତି। ଅପେକ୍ଷାକୃତ ମୋଟା ଥିବା ଭାବି ସେ ଅନେକ ବର୍ଷ ଧରି ମାନସିକ ଚାପରେ ରହୁଥିଲେ। ଏହି କାରଣରୁ ସେ ନିଜ ଖାଦ୍ୟ ପ୍ରତି ଠିକ୍ ଭାବେ ଧ୍ୟାନ ଦେବାକୁ ସକ୍ଷମ ହୋଇ ନ ଥିଲେ ଏବଂ ଶରୀରର ଯତ୍ନ ମଧ୍ୟ ଠିକ୍ସେ ନେଇପାରି ନ ଥିଲେ। ଏକ ଅଟୋଇମ୍ୟୁନ ବ୍ୟାଧି କାରଣରୁ ତାଙ୍କୁ ଏସବୁକୁ ସାମ୍ନା କରିବାକୁ ପଡ଼ିଥିଲା ବୋଲି ଅର୍ଜୁନ କହିଛନ୍ତି। ସେ କହିଛନ୍ତି, ତାଙ୍କଠାରେ ହାସିମୋଟୋ ଥାଇରଏଡିଟିସ୍ ନାମକ ଏକ ରୋଗର ଲକ୍ଷଣ ରହିଛି। ଏହି ରୋଗ ଯୋଗୁ ଶରୀରରେ ଥିବା ଆଣ୍ଟିବଡି ନିଜ ବିରୋଧରେ ଲଢ଼ିଥାଏ। ତାଙ୍କ ମା’ ଓ ଭଉଣୀଙ୍କର ମଧ୍ୟ ସମାନ ରୋଗ ଥିଲା ବୋଲି ଅର୍ଜୁନ କହିଛନ୍ତି। ସେ ଏବେ ଡାକ୍ତରଙ୍କ ପରାମର୍ଶ ଅନୁଯାୟୀ, ଏହି ରୋଗର ଚିକିତ୍ସା ଚଳାଇଛନ୍ତି।
ହାସିମୋଟୋ ଥାଇରଏଡିଟିସ୍ ହେଉଛି ଏକ ଅଟୋଇମ୍ୟୁନ ଡିସ୍ଅର୍ଡର, ଯେଉଁଥିରେ ପ୍ରତିରକ୍ଷା ପ୍ରଣାଳୀ ଥାଇରଏଡ ଗ୍ରନ୍ଥି ଉପରେ ଆକ୍ରମଣ କରିଥାଏ ଏବଂ ସେଗୁଡ଼ିକୁ କ୍ଷତି ପହଞ୍ଚାଇଥାଏ। ତେବେ ଚିହ୍ନଟ ହେବା ପରେ ଏହି ରୋଗର ଚିକିତ୍ସା ସମ୍ଭବ।
