ମୁମ୍ବାଇ,୨୮।୧: ଆଇପିଏଲ୍ର ପରବର୍ତ୍ତୀ ସଂସ୍କରଣର ଶେଷ ଆଡ଼କୁ ଇଂଲଣ୍ଡ ଟେଷ୍ଟ ଖେଳାଳିଙ୍କୁ ସ୍ବଦେଶ ଫେରିବାକୁ ପଡ଼ିପାରେ। କାରଣ ସେହି ସମୟରେ ନ୍ୟୁଜିଲାଣ୍ଡ ବିପକ୍ଷ ୩ ମ୍ୟାଚ୍ ବିଶିଷ୍ଟ ସିରିଜ୍ ହେବାର ଅଛି। ସିରିଜ୍ର ପ୍ରଥମ ଟେଷ୍ଟ ଜୁନ ୨ ତାରିଖରୁ ଲଡର୍ସଠାରେ ଖେଳାଯିବାର ଅଛି। ଯଦି ଓ ଏପର୍ଯ୍ୟନ୍ତ ଆଇପିଏଲ ଆୟୋଜନର ତାରିଖ ଘୋଷଣା କରାଯାଇ ନାହିଁ, ତେବେ ମାର୍ଚ୍ଚ ୨୭ରୁ ସମ୍ଭବତଃ ଟୁର୍ନାମେଣ୍ଟ ଆରମ୍ଭ ହୋଇ ମେ’ ଶେଷ ପର୍ଯ୍ୟନ୍ତ ଚାଲିବ। ଏହାର କିଛି ଦିନ ପରେ ଟେଷ୍ଟ ସିରିଜ୍ ଆରମ୍ଭ ହେବ।
ଯଦି ଇଂଲଣ୍ଡ ଖେଳାଳି ପୂରା ଆଇପିଏଲ ପାଇଁ ଉପଲବ୍ଧ ରୁହନ୍ତି, ତେବେ ସେମାନେ ବିଶ୍ୱ ଟେଷ୍ଟ ଚାମ୍ପିୟନଶିପ୍ ସିରିଜ୍ ପୂର୍ବରୁ ଅଭ୍ୟାସ କରିବାକୁ ସମୟ ମିଳିବ ନାହିଁ। କିନ୍ତୁ ଇଂଲଣ୍ଡ ଖେଳାଳିମାନେ ଆଇପିଏଲ ଦଳ ସହ ସେମାନଙ୍କ ଉପଲବ୍ଧତା ନେଇ କୌଣସି ଯୋଗାଯୋଗ ହୋଇ ନାହିଁ।
କିନ୍ତୁ ଟେଷ୍ଟ ସିରିଜ୍ର ପ୍ରସ୍ତୁତି ଯୋଗୁ କେତେ ଖେଳାଳି ପ୍ରଭାବିତ ହେବେ, ତାହା ଆସନ୍ତା ମାସରେ ହେବାକୁ ଥିବା ମେଗା ଅକ୍ଶନରେ ଜଣାପଡ଼ିବ। କେବେ ସେମାନଙ୍କୁ ସ୍ବଦେଶ ଫେରିବାକୁ କୁହାଯିବ। ନ୍ୟୁଜିଲାଣ୍ଡ ସିରିଜ୍ ପୂର୍ବରୁ ଖେଳାଳିମାନେ ଚାମ୍ପିୟନଶିପ୍ ମ୍ୟାଚ୍ ଖେଳନ୍ତୁ ବୋଲି ଯଦି ଇଂଲଣ୍ଡର ମ୍ୟାନେଜମେଣ୍ଟ ଚାହେଁ, ତେବେ ସେମାନଙ୍କୁ ମେ’ ୧୯ ପୂର୍ବରୁ ସ୍ବଦେଶକୁ ଫେରିବାକୁ ପଡ଼ିବ। ମୋଟ ଉପରେ ୨୨ ଜଣ ଖେଳାଳି ଆଇପିଏଲ ଅକ୍ଶନ ପାଇଁ ନାମ ପଞ୍ଜୀକୃତ କରାଇଥିବା ବେଳେ ଜୋସ ବଟଲରଙ୍କୁ ରାଜସ୍ଥାନ ରୟାଲ୍ସ ରିଟେନ କରାଯାଇଛି।
