ସିଡ୍ନୀ/ଡୁନେଡିନ୍/ ଆଡିଲେଡ୍, ୨୯ା୭: ଚଳିତ ଫିଫା ମହିଳା ଫୁଟବଲ ବିଶ୍ୱକପ୍ରେ ଶୁକ୍ରବାର ଇଂଲଣ୍ଡ ଓ ଚାଇନା ସେମାନଙ୍କ ମ୍ୟାଚରେ ବିଜୟ ଲାଭ କରିଥିବା ବେଳେ ଆର୍ଜେଣ୍ଟିନା ଓ ଦକ୍ଷିଣ ଆଫ୍ରିକା ମଧ୍ୟାରେ ଅନୁଷ୍ଠିତ ମ୍ୟାଚ ଡ୍ର’ ଭାବେ ଶେଷ ହୋଇଛି। ସିଡ୍ନୀଠାରେ ଗ୍ରୁପ୍ ‘ଡି’ର ଖେଳାଯାଇଥିବା ଏକ ମ୍ୟାଚରେ ୟୁରୋପିଆନ ଚାମ୍ପିୟନ ଇଂଲଣ୍ଡ ୧-୦ ଗୋଲ୍ରେ ଡେନମାର୍କକୁ ପରାସ୍ତ କରିଛି। ଏହି ଗୋଲ୍ଟିକୁ ଲରେନ ଜେମ୍ସ ଖେଳର ୬ଷ୍ଠ ମିନିଟ୍ରେ ସ୍କୋର କରିଥିଲେ। ଦଳ କ୍ରମାଗତ ଦ୍ୱିତୀୟ ବିଜୟ ସହ ଗ୍ରୁପ୍ ଷ୍ଟାଣ୍ଡିଂରେ ପ୍ରଥମ ସ୍ଥାନ ଅଧିକାର କରଛି। ଇଂଲଣ୍ଡ ଏହାର ପରବର୍ତ୍ତୀ ମ୍ୟାଚ ମଙ୍ଗଳବାର ଚାଇନା ବିପକ୍ଷରେ ଖେଳିବାକୁ ଥିବା ବେଳେ ଡେନମାର୍କ ପର୍ଥଠାରେ ହାଇତିକୁ ଭେଟିବ।
ଅଷ୍ଟ୍ରେଲିଆର ଆଡେଲିଡ୍ଠାରେ ଚାଇନା ୧-୦ ଗୋଲ୍ରେ ହାଇତିଙ୍କୁ ପରାସ୍ତ କରିବା ସହ ପରବର୍ତ୍ତୀ ରାଉଣ୍ଡ ପାଇଁ ଏହାର ସମ୍ଭାବନାକୁ ଉଜ୍ଜୀବିତ ରଖିଛି। ଫରଓ୍ବାର୍ଡ ଓ୍ବାଙ୍ଗ୍ ଶୁଆଙ୍ଗ ୭୪ତମ ମିନିଟ୍ରେ ଏକ ପେନାଲ୍ଟିକୁ ଗୋଲ୍ରେ ରୂପାନ୍ତରିତ କରିଥିଲେ। ବିଶ୍ୱକପ୍ରେ ଏହା ହେଉଛି ତାଙ୍କର ପ୍ରଥମ ଗୋଲ୍। ୨୯ତମ ମିନିଟ୍ରେ ଚାଇନାର ଝାଙ୍ଗ ରୁଇଙ୍କୁ ରେଡ୍କାର୍ଡ ହୋଇଥିଲା। ଫଳରେ ଦଳକୁ ୧୦ ଖେଳାଳି ନେଇ ଖେଳିବାକୁ ହୋଇଥିଲା। ୧୦ ଖେଳାଳିଙ୍କୁ ନେଇ ଏକ ମ୍ୟାଚ ଜିତିବା ମହିଳା ବିଶ୍ୱକପ୍ରେ ଏହା ହେଉଛି ଦ୍ୱିତୀୟ ଦୃ୍ଷ୍ଟାନ୍ତ। ପୂର୍ବରୁ ଏହା ୨୦୧୧ରେ ଦେଖିବାକୁ ମିଳିଥିଲା।
ଡୁନେଡିନଠାରେ ଆର୍ଜେଣ୍ଟିନା ଓ ଦକ୍ଷିଣ ଆଫ୍ରିକା ମଧ୍ୟରେ ଅନୁଷ୍ଠିତ ଗ୍ରୁପ୍ ‘ଜି’ର ଏକ ମ୍ୟାଚ ୨-୨ ଗୋଲରେ ଅମୀମାଂସିତ ଭାବେ ଶେଷ ହୋଇଛି। ମ୍ୟାଚରେ ଦକ୍ଷିଣ ଆଫ୍ରିକା ଲିଣ୍ଡା ମୋତ୍ଲାଲୋ (୩୦ତମ ମିନିଟ) ଓ ଥେମ୍ବି କିଗାଟଲାନା (୬୬ତମ)ଙ୍କ ଗୋଲ୍ ସହାୟତାରେ ପ୍ରଥମେ ୨-୦ରେ ଅଗ୍ରଣୀ ଲାଭ କରିଥିଲା। ମାତ୍ର ଦ୍ୱିତୀୟାର୍ଦ୍ଧରେ ଆର୍ଜେଣ୍ଟିନା ଚମତ୍କାର ପ୍ରତ୍ୟାବର୍ତ୍ତନ କରିଥିଲା। ସୋଫିଆ ବ୍ରାଉନ୍ (୭୪ତମ) ଓ ରୋମିନା ନୁନେଜ (୭୯ତମ)ଙ୍କ ଗୋଲ୍ ଯୋଗୁ ମ୍ୟାଚ ୨-୨ରେ ଡ୍ର’ ଭାବେ ଶେଷ ହୋଇଥିଲା। ଫଳରେ ଉଭୟ ଦଳ ଗୋଟିଏ ଲେଖାଏଁ ପଏଣ୍ଟ ପାଇଛନ୍ତି। ସୁଇଡେନ ଓ ଇଟାଲୀ ସମାନ ୩ ପଏଣ୍ଟ ଲେଖାଏଁ ଅର୍ଜନ କରି ଗ୍ରୁପ୍ର ଶୀର୍ଷରେ ରହିଛନ୍ତି।
