ରାୟଗଡ଼ା ଅଫିସ,୧୯ା୧୧: ଗୋଟିଏ ପଟେ ଚାଷୀ ଚାଷକାମରୁ ଦୂରେଇ ଚାକିରି ପାଇଁ ରାଜ୍ୟ ବାହାରକୁ ଯାଉଥିବାବେଳେ ଅନ୍ୟପଟେ ଯୁବଗୋଷ୍ଠୀ ଚାକିରି ଛାଡ଼ି ଚାଷକୁ ଆପଣାଉଛନ୍ତି। ଆଧୁନିକ ପ୍ରଣାଳୀରେ ଚାଷ କରି ନିଜେ ସ୍ବାବଲମ୍ବୀ ହେବା ସହ ଅନ୍ୟମାନଙ୍କୁ ରୋଜଗାର ଯୋଗାଇବାକୁ ଇଚ୍ଛାପ୍ରକାଶ କରୁଛନ୍ତି। ଏଭଳି ଜଣେ ଯୁବ ଚାଷୀ ହେଲେ ରାୟଗଡ଼ା ଜିଲା କୋଲନରା ବ୍ଲକ ପେଣ୍ଟା ପଞ୍ଚାୟତ ଅନ୍ତର୍ଗତ ଅମ୍ଳାଭଟା ଗ୍ରାମର ସତ୍ୟ ପ୍ରବୀଣ (୩୫)। ଇଲେକ୍ଟ୍ରୋନିକ୍ସ ଆଣ୍ଡ ଟେଲି କମ୍ୟୁନିକେସନରେ ବି. ଟେକ୍ କରି ସେ ବିଭିନ୍ନ ବଡ଼ କମ୍ପାନୀରେ କାମ କରିଛନ୍ତି। ମାଲେସିଆର ଏକ ଘରୋଇ କମ୍ପାନୀରେ କାମ କରି ଭଲ ଦରମା ମଧ୍ୟ ପାଉଥିଲେ। ହେଲେ ଦେଶ ବାହାରେ କାମ କରିବା ବଦଳରେ ଗାଁରେ ଚାଷ କରି ନିଜେ ରୋଜଗାରକ୍ଷମ ହେବା ସହ ଅନ୍ୟ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିବା ପାଇଁ ସେ ଚିନ୍ତା କରି ଗାଁକୁ ଫେରିଥିଲେ। ଏବେ ସତ୍ୟ ପ୍ରବୀଣ ଆତ୍ମନିର୍ଭର ହେବା ସହ ୪୦ ଜଣଙ୍କୁ କାମ ଯୋଗାଇ ଅନ୍ୟପାଇଁ ଉଦାହରଣ ପାଲଟିଛନ୍ତି।
ପାରମ୍ପରିକ ଚାଷ ବଦଳରେ ସତ୍ୟ ପ୍ରବୀଣ ଆଧୁନିକ ଚାଷ ପ୍ରଣାଳୀକୁ ଆପଣାଇ ସଫଳତା ପାଇଛନ୍ତି। ସତ୍ୟ ପ୍ରବୀଣଙ୍କ ବାପା କପା ଏବଂ ପାମ୍ ଅଏଲ ଚାଷ କରି ସତ୍ୟ ପ୍ରବୀଣଙ୍କ ସମେତ ଅନ୍ୟ ୨ ପୁଅଙ୍କୁ ଉଚ୍ଚ ଶିକ୍ଷିତ କରାଇଛନ୍ତି। ଏବେ ସତ୍ୟ ପ୍ରବୀଣ ମଧ୍ୟ ବାପାଙ୍କ ପଥକୁ ଅନୁସରଣ କରିଛନ୍ତି। ଚାକିରି ଛାଡ଼ି ଚାଷ କରିବା ନିଷ୍ପତ୍ତିକୁ ପ୍ରଥମେ ପରିବାର ଲୋକ ଗ୍ରହଣ କରି ନ ଥିଲେ ମଧ୍ୟ ନିଜ ଇଚ୍ଛାଶକ୍ତି ଏବଂ ନିଷ୍ଠା ବଳରେ ସତ୍ୟ ପ୍ରବୀଣ ସଫଳତା ପାଇ ମସସ୍ତଙ୍କୁ ଚକିତ କରିଛନ୍ତି। ୧୦ ମାସ ହେଲା ସେ ଚାଷ ଆରମ୍ଭ କରିଛନ୍ତି। ଲିଜ୍ରେ ଜମି ନେଇ ସେ ଫୁଲକୋବି, ଟମାଟ, ଲେମନ୍ ଗ୍ରାସ୍ ଆଦି ଚାଷ କରୁଛନ୍ତି। ତେବେ ପାରମ୍ପରିକ ଭାବେ ବର୍ଷା ଉପରେ ନିର୍ଭର ନ କରି ସତ୍ୟ ପ୍ରବୀଣ ଡ୍ରିପ୍ ଜଳସେଚନ ମାଧ୍ୟରେ ଚାଷ କରୁଛନ୍ତି। ବୋର୍ଓ୍ବେଲରୁ ପାଇପ ଦ୍ୱାରା ସିଧାସଳଖ ବୁନ୍ଦା ଜଳସେଚନ କରୁଛନ୍ତି। ଏହାଦ୍ୱାରା ବାଟରେ ପାଣି ଅପଚୟ ମଧ୍ୟ ହେଉନାହିଁ। ୧୦ ଏକର ଜମିରେ ଫୁଲକୋବି, ୬ ଏକର ଜମିରେ ଲେମନ ଗ୍ରାସ୍, ସାଢ଼େ ୩ ଏକରରେ ଟମାଟୋ ଲଗାଇଛନ୍ତି। ତାଙ୍କ ଦ୍ୱାରା ଉତ୍ପାଦିତ ପରିବା ଗଞ୍ଜାମ ଜିଲାର ବ୍ରହ୍ମପୁର, ହିଞ୍ଜିଳିକାଟୁ ସମେତ ରାୟଗଡ଼ା, ଜେକେପୁର, ଥେରୁବାଲି ଏପରି ବିଭିନ୍ନ ଅଞ୍ଚଳକୁ ଯାଇଥାଏ। ଏ ନେଇ ସହାୟକ ଉନୟନ ଉଦ୍ୟାନ କୃଷି ବିଭଗ ଅଧିକାରୀ ରାକେଶ ମିଶ୍ର କହିଛନ୍ତି, ବିଭାଗ ତରଫରୁ କୃଷି କାର୍ଯ୍ୟରେ ସବ୍ସିଡି ପ୍ରଦାନ କରାଯାଉଛି। ଡ୍ରିପ୍ ଉପାୟରେ କୃଷି ବହୁତ ଉପଯୋଗୀ ହେଉଛି। ତେଣୁ ଚାଷ ପାଇଁ ଆସୁଥିବା ଯୁବଗୋଷ୍ଠୀଙ୍କୁ ଉତ୍ସାହିତ କରାଯାଉଛି ବୋଲି ସେ କହିଛନ୍ତି।
