ବ୍ରହ୍ମପୁର ୪ା୯(ସୁବାସ ଚନ୍ଦ୍ର ପାଢ଼ୀ): ଦକ୍ଷିଣ ଓଡ଼ିଶାର ସ୍ବାସ୍ଥ୍ୟସେବା କ୍ଷେତ୍ରରେ ପ୍ରାଣକେନ୍ଦ୍ର ହେଉଛି ମହାରାଜା କୃଷ୍ଣଚନ୍ଦ୍ର ଗଜପତି (ଏମକେସିଜି) ଭେଷଜ ମହାବିଦ୍ୟାଳୟ ଓ ଚିକିତ୍ସାଳୟ। ରୋଗୀଙ୍କ ଚିକିତ୍ସା ସେବା ନିମନ୍ତେ ରାଜ୍ୟ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ଏହାସତ୍ତ୍ୱେ ମଧ୍ୟ ରୋଗୀଙ୍କ ଚିକିତ୍ସା କ୍ଷେତ୍ରରେ ଏମ୍କେସିଜିରେ ଅବହେଳା ପରିଲକ୍ଷିତ ହୋଇଛି। ଏହି ହସ୍ପିଟାଲରେ ଏଣ୍ଡୋସ୍କୋପି ପରୀକ୍ଷା ବିଭିନ୍ନ କାରଣରୁ ବନ୍ଦ ରହିଛି। ଉକ୍ତ ପରୀକ୍ଷାରେ ବ୍ୟବହାର ହେଉଥିବା ମେଶିନ ବାରମ୍ବାର ଯାନ୍ତ୍ରିକ ତ୍ରୁଟି ନିମନ୍ତେ ଏହି ପରୀକ୍ଷା ବନ୍ଦ ରହିଥିବା ସୂଚନା ମିଳିଛି। ଯାହାଫଳରେ ଦୂର ଦୂରାନ୍ତରୁ ମେଡିକାଲ ଆସୁଥିବା ରୋଗୀମାନେ ଘରୋଇ ହସପିଟାଲ ମୁହାଁ ହେଉଥିବା ଦେଖିବାକୁ ମିଳିଛି। ଏହି ଗରିବ ରୋଗୀମାନଙ୍କୁ ଡାଇଗ୍ନୋଷ୍ଟିକ ସେଣ୍ଟରଗୁଡ଼ିକ ଆର୍ଥିକ ଶୋଷଣ କରୁଥିବା ଅଭିଯୋଗ ହେଉଛି। କୌଣସି ଉପାୟ ନପାଇ ବାଧ୍ୟବାଧକତାରେ ଗରିବ ରୋଗୀମାନେ ହଜାର ହଜାର ଟଙ୍କା ପରୀକ୍ଷା ନିମନ୍ତେ ଖର୍ଚ୍ଚ କରୁଛନ୍ତି। ଏମକେସିଜି ଉପରେ ୧୦ରୁ ଊର୍ଦ୍ଧ୍ୱ ଜିଲା ସମେତ ପଡୋଶୀ ରାଜ୍ୟ ଆନ୍ଧ୍ରପ୍ରଦେଶର ଅନେକ ରୋଗୀ ନିର୍ଭର କରନ୍ତି। ପ୍ରତ୍ୟେକ ଦିନ ମେଡ଼ିକାଲରେ ଥିବା ବିଭିନ୍ନ ବିଭାଗକୁ ଚିକିତ୍ସା ନିମନ୍ତେ ହଜାର ହଜାର ରୋଗୀ ଆସିଥାନ୍ତି। ସେହିପରି କର୍କଟ ରୋଗ ଚିହ୍ନଟ, ଖାଦ୍ୟ ନଳୀ ସମ୍ବନ୍ଧୀୟ ରୋଗର ପରୀକ୍ଷା, ପାକସ୍ଥଳୀ ଘା’ ସମ୍ବନ୍ଧିତ ଚିକିତ୍ସା କିମ୍ବା ପରୀକ୍ଷା ନିମନ୍ତେ ମେଡ଼ିକାଲକୁ ରୋଗୀ ଆସିଥାନ୍ତି। ଉପରୋକ୍ତ ରୋଗର ଚିହ୍ନଟ ନିମନ୍ତେ ଡାକ୍ତର ସର୍ଜରି ବିଭାଗ ଅଧୀନରେ ଥିବା ଏଣ୍ଡୋସ୍କୋପି ପରୀକ୍ଷା ନିମନ୍ତେ ରୋଗୀଙ୍କୁ ପରାମର୍ଶ କରିଥାନ୍ତି। ସେହିଭଳି ରୋଗୀଙ୍କ ନିମନ୍ତେ ଏହି ପରୀକ୍ଷା ଅତି ଗୁରୁତ୍ୱପୂର୍ଣ୍ଣ ହୋଇଥିବା ବେଳେ ଏଣ୍ଡୋସ୍କୋପି ପରୀକ୍ଷା ମେଶିନ ଅଚଳ ହୋଇରହିଛି। ୨୦୦୬ରେ ଉକ୍ତ ମେଶିନ ସ୍ଥାପନ ହୋଇଥିଲା। ଏହା ଅତି ପୁରୁଣା ହୋଇଥିବାରୁ ବାରମ୍ବାର ଯାନ୍ତ୍ରିକ ତ୍ରୁଟି ରହୁଥିବା ବେଳେ ରୋଗୀଙ୍କ ପରୀକ୍ଷା ବନ୍ଦ ରହିଛି। ପୂର୍ବରୁ ପ୍ରତ୍ୟେକ ଦିନ ଏମକେସିଜିରେ ଏଭଳି ପରୀକ୍ଷା ୨୦ରୁ ୨୫ ହେଉଥିବା ବେଳେ ଗତ ବର୍ଷ ନଭେମ୍ବର ମାସରୁ ଏହି ପରୀକ୍ଷା ବନ୍ଦ ରହିଥିଲା। ପରେ ଏକ ନୂଆ ମେଶିନ ଆସିଛି। ବିଭିନ୍ନ କାରଣରୁ ତାହା ଏବେ ଖରାପ ହୋଇପଡିଛି। ଫଳରେ ଉକ୍ତ ପରୀକ୍ଷା ନିମନ୍ତେ ରୋଗୀମାନେ ସହରରେ ଥିବା ଘରୋଇ ଡାଇଗ୍ନୋଷ୍ଟିକ ସେଣ୍ଟର୍ ଉପରେ ନିର୍ଭର କରିଥାନ୍ତି। ଏହାର ସୁଯୋଗ ନେଇ ଡାଇଗ୍ନୋଷ୍ଟିକ ସେଣ୍ଟର୍ଗୁଡ଼ିକ ରୋଗୀଙ୍କ ଠାରୁ ପରୀକ୍ଷା ବାବଦରେ ୨୦୦୦ରୁ ୨୫୦୦ ଟଙ୍କା ନେଇଥାନ୍ତି। ଏମକେସିଜିର ହିଁ କିଛି ଡାକ୍ତର ଉକ୍ତ ଘରୋଇ ଡାଇଗ୍ନୋଷ୍ଟିକ ସେଣ୍ଟରକୁ ଯାଇ ଏହି ପରୀକ୍ଷା କରିଥାନ୍ତି। ଏନେଇ ଏମକେସିଜି ଅଧୀକ୍ଷକ ଡା. ସୁଚିତ୍ରା ଦାଶ କହିଛନ୍ତି ଯେ, ଏଣ୍ଡୋସ୍କୋପି ମେଶିନ ବର୍ତ୍ତମାନ ଖରାପ ରହିଛି। ଏହାର ମରାମତି ପାଇଁ ଭୁବନେଶ୍ୱର ପଠାଯାଇଛି। ଖୁବଶୀଘ୍ର ଏହା କାର୍ଯ୍ୟକ୍ଷମ କରାଯିବ ବୋଲି ସେ କହିଛନ୍ତି।
