ଓ୍ବାଶିଂଟନ,୧୦।୧ : ଟେସଲାର ଶେୟାରରେ ଏକ ବଡ଼ ଧରଣର ହ୍ରାସ ପରେ ଏହାର ମୁଖ୍ୟ ଏଲନ ମସ୍କଙ୍କ ସମ୍ପତ୍ତି କମିବାରେ ଲାଗିଛି। ଟେସଲାର ଷ୍ଟକରେ ଏହି ପତନ ପରେ ଏଲନ ମସ୍କ ବ୍ୟକ୍ତିଗତ ସମ୍ପତ୍ତି ହରାଇବା ଦୃଷ୍ଟିରୁ ଏକ ବିଶ୍ୱ ରେକର୍ଡ ସୃଷ୍ଟି କରିଛନ୍ତି। ତାଙ୍କ ନାମ ଗିନିଜ ୱାଲର୍ଡ ରେକର୍ଡରେ ସ୍ଥାନ ପାଇଛି। ଗତ ଏକ ବର୍ଷ ମଧ୍ୟରେ ଏଲନ ମସ୍କ ୧୮୦ ବିଲିୟନ ଡଲାର ସମ୍ପତ୍ତି ହରାଇଛନ୍ତି। ଫୋର୍ବସ ପତ୍ରିକା ଅନୁଯାୟୀ, ୨୦୨୧ ମସିହାରେ ଏଲନ ମସ୍କଙ୍କ ସମ୍ପତ୍ତି ୩୨୦ ବିଲିୟନ ଡ଼ଲାର ଥିଲା। ଯାହା ଜାନୁଆରୀ୨୦୨୩ ରେ କମି ୧୩୮ ବିଲିୟନ ଡ଼ଲାରରେ ପହଞ୍ଚିଛି।
ଏଲନ ମସ୍କ ଏତେ କମ ସମୟ ମଧ୍ୟରେ ସମ୍ପତ୍ତି ହରାଇବା ଦୃଷ୍ଟିରୁ ୨୨ ବର୍ଷ ପୁରୁଣା ରେକର୍ଡ ଭାଙ୍ଗିଛନ୍ତି। ବର୍ତ୍ତମାନ ପର୍ଯ୍ୟନ୍ତ ଏହି ରେକର୍ଡ ଜାପାନର ଟେକ ନିବେଶକ ମାସାୟୋଶୀ ସୋନଙ୍କ ନାମରେ ଥିଲା, ଯିଏ ୨୦୦୦ ରେ ୫୮.୬ ବିଲିୟନ ଡଲାର ହରାଇଥିଲେ। କିନ୍ତୁ ବର୍ତ୍ତମାନ ଏଲନ ମସ୍କ ତାଙ୍କ ନାମରେ ଏହି ରେକର୍ଡ ସୃଷ୍ଟି କରିଛନ୍ତି।
ଏଲନ ମସ୍କଙ୍କର ସମ୍ପତ୍ତିରେ ହ୍ରାସ ଘଟିବା ସହିତ ସେ ଦୁନିଆର ସବୁଠାରୁ ଧନୀ ବ୍ୟକ୍ତି ହେବାର ମାନ୍ୟତା ମଧ୍ୟ ହରାଇଥିଲେ। ଫ୍ରାନ୍ସର ବିଳାସପୂର୍ଣ୍ଣ ବ୍ରାଣ୍ଡ ଲୁଇ ଭ୍ୟୁଟନ୍ର ପ୍ରମୋଟର ବର୍ନାର୍ଡ ଆର୍ନାଲ୍ଟ ମସ୍କଙ୍କୁ ଥଟ୍ଟା କରିଥିଲେ। ବର୍ନାର୍ଡ ଆର୍ନାଲ୍ଟଙ୍କ ସମ୍ପତ୍ତି ହେଉଛି ୧୯୦ ବିଲିୟନ ଡଲାର। ଦୁନିଆର ସବୁଠାରୁ ଧନୀ ତାଲିକାରେ ଏଲୋନ ମସ୍କ ଦ୍ୱିତୀୟ ସ୍ଥାନରେ ରହିଛନ୍ତି।
ମସ୍କ ମଧ୍ୟ ଦୁନିଆର ଦ୍ୱିତୀୟ ଧନୀ ହେବାର ଟାଇଟଲ ହରାଇବାକୁ ଯାଉଛନ୍ତି। ଭାରତର ଗୌତମ ଆଦାନୀ ମସ୍କଙ୍କୁ ଯେକୌଣସି ସମୟରେ ପଛରେ ପକାଇ ପାରିବେ ବୋଲି ଚର୍ଚ୍ଚା ହେଉଛି। ଆଦାନୀଙ୍କ ସମ୍ପତ୍ତି ୧୨୦ ବିଲିୟନ ଡ଼ଲା ରହିଛି।
ଯେହେତୁ ମସ୍କ ଟୁଇଟର କିଣିଛନ୍ତି, ଟେସଲାର ଶେୟାରରେ କ୍ରମାଗତ ହ୍ରାସ ଘଟିଛି । ବଜାର ତାଙ୍କ ନିଷ୍ପତ୍ତିକୁ ପସନ୍ଦ କରୁ ନ ଥିଲା। ବଜାର ଅନୁଭବ କରୁଛି ଯେ ଟୁଇଟର ଚଳାଇବା ପାଇଁ ମସ୍କ ଅଧିକ ଟେସଲା ଶେୟାର ବିକ୍ରି କରିବାର ସମ୍ଭାବନା ରହିଛି।
