କମିଛି ଅସହ୍ୟ ତାତି। ପରିବେଶରେ ଶୀତଳତା ଭରିଛି ମୌସୁମୀ ବର୍ଷା। ଏହା ଯେ କେବଳ ମଣିଷଙ୍କ ପାଇଁ ଆଶ୍ୱସ୍ତି ଆଣିନାହିଁ, ଅଧିକନ୍ତୁ ଗରମରେ ସନ୍ତୁଳି ହେଉଥିବା ବନ୍ୟପ୍ରାଣୀଙ୍କ ମଧ୍ୟରେ ଭରିଦେଇଛି ଅସୀମ ଖୁସି। ଢେଙ୍କାନାଳ ଜିଲାର କପିଳାସ ପ୍ରାଣୀ ଉଦ୍ୟାନର ହାତୀ ରେସ୍କ୍ୟୁ ସେଣ୍ଟରରେ ରହୁଥିବା ହାତୀ ଛୁଆଙ୍କ କାଦୁଅ ସ୍ନାନରୁ ଏହା ସ୍ପଷ୍ଟ ପରିଲକ୍ଷିତ ହୋଇଛି।
ଢେଙ୍କାନାଳ,୧୬।୭(ରତନ ନାୟାର)କିଏ କାଦୁଅରେ ଲେସି ହୋଇଯାଉଥିଲା ତ ଆଉ କିଏ ଗଡ଼ିଯାଉଥିଲା ଓଦା ଓଦା ମାଟିରେ। ବର୍ଷାଭିଜା ଅପରାହ୍ନରେ ଛୁଆ ହାତୀଙ୍କ ଏଭଳି କୌତୁକିଆ କ୍ରୀଡ଼ା କପିଳାସ ପ୍ରାଣୀ ଉଦ୍ୟାନ ପରିଭ୍ରମଣ କରିବାକୁ ଆସିଥିବା ପର୍ଯ୍ୟଟକଙ୍କୁ କେବଳ ଆମୋଦିତ କରିନାହିଁ, ବରଂ ଦିନଟିକୁ ସ୍ମରଣୀୟ କରିଦେଇଛି।
ପରିତ୍ୟକ୍ତ, ଅସୁସ୍ଥ ହାତୀଙ୍କ ସୁରକ୍ଷିତ ଆଶ୍ରୟସ୍ଥଳ ପାଲଟିଛି ଢେଙ୍କାନାଳ ଜିଲା କପିଳାସ ପ୍ରାଣୀ ଉଦ୍ୟାନ। ହାତୀ-ମାହୁନ୍ତଙ୍କ ମଧ୍ୟରେ ରହିଥିବା ଅନାବିଳ ସମ୍ପର୍କ ଦେଖିବା ଲାଗି ଏଠାକୁ ଦୂରଦୂରାନ୍ତରୁ ଧାଇଁ ଆସୁଛନ୍ତି ପର୍ଯ୍ୟଟକ। ତେବେ ଶନିବାର ଅପରାହ୍ନରେ ଜୁ’ ପରିସରରେ ଦେଖିବାକୁ ମିଳିଥିଲା ନିଆରା ଦୃଶ୍ୟ। ଝିପିଝିପି ବର୍ଷାରେ କ୍ରୀଡ଼ା କୌତୁକରେ ମାତିଥିବା ୩ ଛୁଆ ହାତୀ ପଦ୍ମା, ଶିବା ଓ ଶ୍ୟାମା ଆଗନ୍ତୁକଙ୍କୁ ଭରପୂର ମନୋରଞ୍ଜନର ଖୋରାକ ଯୋଗାଇଥିଲେ। ସମ୍ପୃକ୍ତ ଛୁଆ ହାତୀ ପ୍ରାଣୀଉଦ୍ୟାନ ପରିସରରେ ମାଟିକାଦୁଅରେ ଦୀର୍ଘ ସମୟ ଖେଳିବା ସହ ପର୍ଯ୍ୟଟକଙ୍କ ପାଖରୁ ବାରମ୍ବାର ଦୌଡ଼ି ଯାଉଥିଲେ, ଯାହାକୁ କ୍ୟାମେରା ଲେନ୍ସରେ ତୋଳି ଧରିଥିଲେ ବାଲେଶ୍ୱର ଏବଂ ଭଦ୍ରକ ଅଞ୍ଚଳରୁ ଆସିଥିବା ପର୍ଯ୍ୟଟକ।
ପଲରୁ ପରିତ୍ୟକ୍ତ ହେବାପରେ ସମ୍ପୃକ୍ତ ହାତୀ ଛୁଆ ଉଦ୍ଧାର ହୋଇ କପିଳାସ ଜୁ’ସ୍ଥିତ ହାତୀ ରେସ୍କ୍ୟୁ ସେଣ୍ଟରକୁ ଆସିଛନ୍ତି। ସେମାନଙ୍କ ଯତ୍ନ ନେବାକୁ ତାଲିମପ୍ରାପ୍ତ ମାହୁନ୍ତଙ୍କୁ ନିୟୋଜିତ କରାଯାଇଛି। ନିୟମିତ ପ୍ରଶିକ୍ଷଣ ପରେ ସେମାନେ ମଣିଷଙ୍କ ନିକଟତର ହେଉଥିବା ଦେଖିବାକୁ ମିଳିଛି।
ଏ ସଂକ୍ରାନ୍ତରେ କପିଳାସ ରେଞ୍ଜର ତରୁଣ କୁମାର ମହାନ୍ତି କୁହନ୍ତି, ଚଳିତବର୍ଷ ମାତ୍ରାଧିକ ଗ୍ରୀଷ୍ମପ୍ରବାହ ହୋଇଥିଲା। ଏବେ ବର୍ଷା ଆରମ୍ଭ ହେବା ପରେ ଛୁଆ ହାତୀମାନେ ଶରୀରକୁ ଶୀତଳ କରିବା ପାଇଁ କାଦୁଅରେ ଘଷି ହେଉଛନ୍ତି। ମନ ଖୁସିଥିଲେ ସେମାନେ ଦୀର୍ଘ ସମୟ ଧରି ମାଟିକାଦୁଅରେ ଖେଳିବାକୁ ଭଲ ପାଆନ୍ତି। ଏହାପରେ ତାଙ୍କୁ ଗାଧୋଇ ଦିଆଯାଏ। ବର୍ଷାରେ ବେଶି ଭିଜିଥିଲେ ପାଣି ଭିଜା କପଡ଼ାରେ ଶରୀରକୁ ପୋଛି ଦିଆଯାଇଥାଏ ବୋଲି ସେ ସୂଚନା ଦେଇଛନ୍ତି।
ସୂଚନାଯୋଗ୍ୟ, ଏଲିଫ୍ୟାଣ୍ଟ ରେସ୍କ୍ୟୁ ସେଣ୍ଟରରେ ୮ ହାତୀ ଅଛନ୍ତି। ଏଥିସହ ତାଳଚେର ଅଞ୍ଚଳରୁ ଉଦ୍ଧାର ହୋଇ ଆସିଥିବା ନରହନ୍ତା ଦନ୍ତା ‘ରାକେଶ’କୁ ରେସ୍କ୍ୟୁ ସେଣ୍ଟରଠାରୁ ଦୂରରେ ସ୍ବତନ୍ତ୍ର ଭାବେ ରଖାଯାଇଛି। ୨୦୨୦ରେ ବ୍ରହ୍ମପୁର ବନାଞ୍ଚଳରୁ ମାଈ ହାତୀ ଛୁଆ ପଦ୍ମା, ୨୦୨୧ରେ କେନ୍ଦୁଝର ଚମ୍ପୁଆରୁ ମାଈ ହାତୀ ଛୁଆ ଶ୍ୟାମା ଏବଂ ସେହିବର୍ଷ ଅନୁଗୋଳରୁ ଅଣ୍ଡିରା ହାତୀ ଛୁଆ ଶିବା ଉଦ୍ଧାର ହୋଇ ଆସିଥିଲେ।
