ଡେରାବିଶ, ୨୮।୧୦(ସ୍ବ.ପ୍ର.): ଡେରାବିଶ ବ୍ଲକ ଅଞ୍ଚଳରେ ବୁଧବାର ଏକ ବଣୁଆ ହାତୀ ଆତଙ୍କ ସୃଷ୍ଟି କରିଥିଲା। ସକାଳେ ହାତୀଟି ଲକ୍ଷ୍ମୀନାରାୟଣପୁର ପଞ୍ଚାୟତ ବଳଭଦ୍ରପୁର ଗ୍ରାମ ଦେଇ ହରିଦାସପୁର-ପାରାଦ୍ୱୀପ ରେଳପଥ ନିକଟରେ ବୁଲୁଥିବା ଦେଖିବାକୁ ମିଳିଥିଲା। ଏହି ସମୟରେ ଏକ ମାଲ୍ ବୋଝେଇ ଟ୍ରେନ ଗତି କରିବାରୁ ହାତୀଟି ରେଳପଥରୁ ତଳକୁ ଓହ୍ଲାଇ ନୂଆହାଟ ପାଟରେ ପଶିଯାଇଥିଲା। ଖବର ପାଇ ବନବିଭାଗ କର୍ମଚାରୀମାନେ ବାଣଫୁଟାଇ ହାତୀକୁ ଘଉଡାଇବାକୁ ଚେଷ୍ଟା କରିଥିଲେ। ମାତ୍ର ହାତୀଟି ମାଧ୍ୟାହ୍ନରେ ୫୩ନଂ. ଜାତୀୟ ରାଜପଥର ଲକ୍ଷ୍ମୀନାରାୟଣପୁର ଛକ ନିକଟରେ ରାସ୍ତା ଅତିକ୍ରମ କରି ଜନବସତି ଆଡକୁ ମୁହଁାଇଥିଲା। ବନ ବିଭାଗ କର୍ମଚାରୀ ଓ ଡେରାବିଶ ଥାନା ପୋଲିସ ସମେତ ଜନସାଧାରଣଙ୍କ ହୋହାଲ୍ଲା ଯୋଗୁ ହାତୀଟି ପୁନର୍ବାର ନରୁଆ ପାଟ ଭିତରେ ପଶି ଡେରାବିଶ ବଜାର ଅଭିମୁଖେ ଯିବାକୁ ଉଦ୍ୟମ କରିଥିଲା। ପରେ ହାତୀଟି ଗତିପଥ ବଦଳାଇ ପ୍ରଥମେ ବାଲିଆ, ମୁଲଣାପାଟଣା ପାଟରେ ଥିବା ଧାନକ୍ଷେତରେ ପଶି ବାଲିଆ ପଞ୍ଚାୟତ ଅଧୀନ ଓଉଖଣ୍ଡ ଓ ଅରିଓ ପାଟ ଭିତରେ ପ୍ରବେଶ କରିଥିଲା। ସେଠାରେ ହାତୀକୁ ଘଉଡାଇବା ଫଳରେ ଅପରାହ୍ନରେ ହାତୀଟି ମାହାଙ୍ଗା ନିର୍ବାଚନ ମଣ୍ଡଳୀ ଅଧୀନ ବନ୍ତଳା ଓ ରାମରାଙ୍ଗ ଅଞ୍ଚଳକୁ ପ୍ରବେଶ କରିଥିଲା। ହାତୀଟି ବ୍ୟାପକ ଧାନ ଫସଲ ନଷ୍ଟ କରିଥିବା ଖବର ମିଳିଛି। କ୍ଷତିଗସ୍ତ ଚାଷୀଙ୍କୁ କ୍ଷତିପୂରଣ ଦେବାକୁ ସାମାଜିକ କର୍ମୀ ମହେନ୍ଦ୍ର କୁମାର ସିଂହ ଓ ସାହାଜାହାନ ଖାଁ ଦାବି କରିଛନ୍ତି।
