କୋଲକାତା,୨୪।୬ : ପଶ୍ଚିମବଙ୍ଗରେ ନିର୍ବାଚନୀ ହିଂସା ବଢ଼ିବାରେ ଲାଗିଛି। ହିଂସା ମାଧ୍ୟମରେ କ୍ଷମତା ହାସଲ କରିବା ବଙ୍ଗଳାର ପରମ୍ପରା ପାଲଟିଛି ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। ଏହା ନୁହେଁ ଯେ ବର୍ତ୍ତମାନର ମୁଖ୍ୟନ୍ତ୍ରୀ ମମତା ବାନାର୍ଜୀଙ୍କ ସରକାର ସମୟରେ ହିଂସା ଘଟୁଛି। ଯେତେବେଳେ ବାମପନ୍ଥୀ (ସିପିଏମ) ସରକାର କ୍ଷମତାରେ ଥିଲେ, ସେତେବେଳେ ମଧ୍ୟ ରାଜ୍ୟରେ ନିର୍ବାଚନୀ ରକ୍ତପାତ ହୋଇଥିଲା। ଏବେ ପଞ୍ଚାୟତ ନିର୍ବାଚନ ଘୋଷଣା ହେବା ମାତ୍ରେ ହିଂସାକାଣ୍ଡ ଆରମ୍ଭ ହୋଇଛି, ଯାହା ବର୍ତ୍ତମାନ ସୁଦ୍ଧା କମିନାହିଁ। ଏହି ହିଂସା ମଧ୍ୟରେ ପଞ୍ଚାୟତ ନିର୍ବାଚନ ପାଇଁ ନାମାଙ୍କନ ଏବଂ ଯାଞ୍ଚ ପ୍ରକ୍ରିୟା ଶେଷ ହୋଇଛି ଏବଂ ନିର୍ବାଚନ ଆୟୋଗ ପ୍ରାର୍ଥୀଙ୍କ ଚୂଡାନ୍ତ ତାଲିକା ପ୍ରକାଶ କରିଛନ୍ତି।
ଏହି ତାଲିକା ଅନୁଯାୟୀ, ଆସନ ଦୃଷ୍ଟିରୁ ଦକ୍ଷିଣ ୨୪ ପରଗଣା ଶୀର୍ଷରେ ରହିଛି। ଗ୍ରାମ ପଞ୍ଚାୟତ ଠାରୁ ଆରମ୍ଭ କରି ପଞ୍ଚାୟତ ସମିତି ଏବଂ ଦକ୍ଷିଣ ୨୪ ପରଗଣା ଜିଲାର ଜିଲା ପରିଷଦ ନିର୍ବାଚନ ପର୍ଯ୍ୟନ୍ତ ଶାସକ ଟିଏମସି ପ୍ରାର୍ଥୀମାନେ ରେକର୍ଡ ସଂଖ୍ୟକ ନିର୍ବିରୋଧ ବିଜୟ ହାସଲ କରିଛନ୍ତି। ଏସବୁ ଜିଲାରେ ନାମାଙ୍କନ ପତ୍ର ଦାଖଲ ସମୟରେ ସର୍ବାଧିକ ହିଂସା ଦେଖିବାକୁ ମିଳିଥିଲା ।
ଉଲ୍ଲେଖଯୋଗ୍ୟ, ପଞ୍ଚାୟତ ନିର୍ବାଚନରେ କ୍ଷମତାରେ ଥିବା ଦଳ ବ୍ୟତୀତ କୌଣସି ବିରୋଧୀ ଦଳ ଗ୍ରାମସଭା ଏବଂ ପଞ୍ଚାୟତ ସମିତିରେ ଶତପ୍ରତିଶତ ଆସନରେ ନିଜ ପ୍ରାର୍ଥୀ ଦେବାରେ ସକ୍ଷମ ହୋଇ ନାହାଁନ୍ତି। ରାଜନୈତିକ ବିଶେଷଜ୍ଞମାନଙ୍କ ଅନୁସାରେ ଏହା ପଛର କାରଣ ହେଉଛି ହିଂସା ଏବଂ ବିଭିନ୍ନ ପ୍ରକାରର ଭୟ, ଓ ବିରୋଧୀଙ୍କ ସାଂଗଠନିକ ଦୁର୍ବଳତା ମଧ୍ୟ ଏକ ମୁଖ୍ୟ କାରଣ। ନିର୍ବାଚନ ଆୟୋଗଙ୍କର ତଥ୍ୟ ଅନୁଯାୟୀ, ଦକ୍ଷିଣ ୨୪ ପରଜଣାରେ ମୋଟ ଗ୍ରାମପଞ୍ଚାୟତ ସଂଖ୍ୟ ୬୩୮୩ ଅଟେ। ସେଥିମଧ୍ୟରୁ ୧୭୬୭ ଟି ଆସନ ମମତା ବାନାର୍ଜୀଙ୍କ ପାର୍ଟି ଟିଏମସି ନିର୍ବିରୋଧରେ ଜିତିଛି। ଏହି ଜିଲାର ମୋଟ ପଞ୍ଚାୟତ ସମିତି ଆସନ ସଂଖ୍ୟା ୯୨୬, ସେଥିମଧ୍ୟରୁ ୨୩୩ ଟି ସିଟ ଟିଏମସି ଆକାଉଣ୍ଟକୁ ନିର୍ବିରୋଧରେ ଯାଇଛିି। ଏଥି ସହିତ ଟିଏମସି ୮୫ଟି ଜିଲା ପରିଷଦ ମଧ୍ୟରୁ ୮ ଟିରେ ନିର୍ବିରୋଧରେ ବିଜୟ ହୋଇଛି।
