ନୂଆଦିଲ୍ଲୀ, ୮।୧୦: କରୋନା ମହାମାରୀ ସଙ୍କଟ ସମୟରେ ହେଉଥିବା ବିଧାନସଭା ନିର୍ବାଚନକୁ ଦୃଷ୍ଟିରେ ରଖି କେନ୍ଦ୍ରୀୟ ନିର୍ବାଚନ କମିଶନ ନୂଆ ମାର୍ଗଦର୍ଶିକା ଜାରି କରିଛନ୍ତି। ଏଥିରେ ରାଜନୈତିକ ଦଳଗୁଡ଼ିକର ଷ୍ଟାର ପ୍ରଚାରକଙ୍କ ସଂଖ୍ୟାକୁ ୨୫ ପ୍ରତିଶତ କମାଇ ଦିଆଯାଇଛି। ନିର୍ବାଚନ ପ୍ରଚାର କରିବାର ୪୮ ଘଣ୍ଟା ଅର୍ଥାତ୍ ୨ ଦିନ ପୂର୍ବରୁ ଷ୍ଟାର ପ୍ରଚାରକଙ୍କ ନାମ ତାଲିକା ଜିଲା ପ୍ରଶାସନଙ୍କୁ ଦେବା ଲାଗି ନିର୍ବାଚନ କମିଶନଙ୍କ ପକ୍ଷରୁ ନିର୍ଦ୍ଦେଶ ଦିଆଯାଇଛି। ଏଥିପାଇଁ ପୂବର୍’ରୁଧାର୍ଯ୍ୟ ସମୟ ସୀମା ୧୦ ଦିନ ଥିଲା। ମାତ୍ର କରୋନା ମହାମାରୀ ସଙ୍କଟକୁ ଦୃଷ୍ଟିରେ ରଖି ଏଭଳି ପଦକ୍ଷେପ ଗ୍ରହଣ କରାଯାଇଛି। ପୂର୍ବରୁ ନିର୍ବାଚନରେ ଜାତୀୟସ୍ତରୀୟ ରାଜନୈତିକ ଦଳଗୁଡ଼ିକର ଷ୍ଟାର ପ୍ରଚାରକଙ୍କ ସଂଖ୍ୟା ୪୦ ଥିଲା। ତେବେ ଏବେ ଏହାକୁ ୩୦କୁ କମାଇ ଦିଆଯାଇଛି। ଏହାଠାରୁ ଅଧିକ ପ୍ରଚାରକ ନିର୍ବାଚନ ରାଲି ଅବା ସଭାରେ ଯୋଗଦେଇ ପାରିବେ ନାହିଁ। ସେହିପରି ରାଜ୍ୟ ସ୍ତରୀୟ ରାଜନୈତିକ ଦଳର ନିର୍ବାଚନ ପ୍ରଚାରରେ ୨୦ ଷ୍ଟାର ପ୍ରଚାରକ ଯୋଗଦେଉଥିବାବେଳେ ଏବେ ଏହି ସଂଖ୍ୟା ୧୫ରେ ସୀମିତ ରହିବ। କରୋନା ମହାମାରୀ ମାର୍ଗଦର୍ଶିକାକୁ ନିର୍ବାଚନ ପ୍ରଚାରରେ ପାଳନ କରାଯିବା ଲାଗି ନିର୍ବାଚନ କମିଶନଙ୍କ ପକ୍ଷରୁ କଡ଼ା ନିର୍ଦ୍ଦେଶ ଜାରି ହୋଇଛି।
