ରସୁଲପୁର,୭ା୩(ରଞ୍ଜିତ ରାଉତ):ସାଧାରଣ ନିର୍ବାଚନ ପାଖେଇ ଆସିଲେ ବିଜେଡିର ନେତା ଓ କର୍ମୀଙ୍କ ମିଶାଣ ଫେଡ଼ାଣକୁ ନେଇ ଦଳ ବେଶୀ ଚର୍ଚ୍ଚାରେ ରହିଥାଏ। ଯାଜପୁର ଜିଲାରେ ନିର୍ବାଚନ ପୂର୍ବରୁ ବିଜେଡି ଛାଡ଼ିଥିବା ଛାମୁଆ ନେତାଙ୍କୁ ଫେରାଇ ଆଣିବା ପାଇଁ ଦଳ ସମାନ ରଣନୀତି ଆପଣାଉଥିବା ଲକ୍ଷ୍ୟ କରାଯାଉଛି। ୨୦୧୯ ସାଧାରଣ ନିର୍ବାଚନ ପୂର୍ବରୁ ଯାଜପୁର ଜିଲା ପରିଷଦ ପୂର୍ବତନ ଉପସଭାପତି ଅଶୋକ ବଳଙ୍କୁ ଫେରାଇ ଆଣିବାକୁ ଦଳ ଯେଉଁ ରଣନୀତି ଆପଣେଇ ଥିଲା, ସମାନ ରଣନୀତି ୨୦୨୪ ନିର୍ବାଚନ ପୂର୍ବରୁ ଯାଜପୁର ଜିଲାପରିଷଦ ପୂର୍ବତନ ସଭାପତି ନରେଶ ଚନ୍ଦ୍ର ମହାନ୍ତି(ବୁଲୁ ଭାଇ)ଙ୍କୁ ଫେରାଇ ଆଣିବା ଦିଗରେ ଆପଣାଇଛି। ସେତେବେଳେ ଭାଜପାରୁ ବଳଙ୍କୁ ଦଳରେ ସାମିଲ କରିବା ପରେ ଦଳ କୋରେଇ ବିଧାୟକ ଆସନରେ ବସାଇଛି। ଏବେ ପୂର୍ବତନ ସଭାପତି ମହାନ୍ତିଙ୍କୁ କେଉଁ ପ୍ରତିଶ୍ରୁତି ଦେଇ ଦଳରେ ସାମିଲ କରାଯାଇଛି ତାହା ଏଯାଏଁ ସ୍ପଷ୍ଟ ହୋଇପାରିନାହିଁ। ହେଲେ ଦଳର ରାଜ୍ୟସ୍ତରୀୟ ନେତୃତ୍ୱଙ୍କ ସହ ଆଲୋଚନା ପରେ ମହାନ୍ତି ଭାଜପା ଛାଡ଼ି ବିଜେଡିରେ ସାମିଲ ହୋଇଛନ୍ତି ବୋଲି ଜଣାଯାଇଛି।
୨୦୧୭ରୁ ୨୦୨୨ ପର୍ଯ୍ୟନ୍ତ ବୁଲୁ ଯାଜପୁର ଜିଲାପରିଷଦ ସଭାପତି ଦାୟିତ୍ୱରେ ଥିଲେ। ସେ ରସୁଲପୁର ବ୍ଲକର ୩୫ନମ୍ବର ଜୋନରୁ ନିର୍ବାଚିତ ହୋଇଥିଲେ। ତାଙ୍କୁ ବିଜେଡି ଏହି ପଦରେ ବସାଇଥିଲା। ତାଙ୍କ ଘର ଧର୍ମଶାଳା ନିର୍ବାଚନମଣ୍ଡଳୀରେ। ସେ ପୂର୍ବତନ ମନ୍ତ୍ରୀ ସ୍ବର୍ଗତ କଳ୍ପତରୁ ଦାସଙ୍କ ନିକଟତମ ବ୍ୟକ୍ତି ଭାବରେ ପରିଚିତ ଥିଲେ। ତାଙ୍କ ପୁତ୍ର ପ୍ରଣବ ବଳବନ୍ତରାୟ ଧର୍ମଶାଳା ବିଧାୟକ ହେବାପରେ ବୁଲୁଙ୍କ ସହ ତାଙ୍କର ସମ୍ପର୍କରେ ତିକ୍ତତା ଦେଖାଦେଇଥିଲା। ପରେ ବୁଲୁ ଦଳ ବିରୋଧୀ କାର୍ଯ୍ୟ କରୁଛନ୍ତି ବୋଲି ଦର୍ଶାଇ ତାଙ୍କୁ ବିଜେଡିରୁ ବହିଷ୍କାର କରାଯାଇଥିଲା। ଅଢ଼େଇ ମାସ ତଳେ ସେ ଭାଜପାରେ ସାମିଲ ହୋଇଥିଲେ। ଏହି ଦଳରେ ସାମିଲ ବେଳେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନୀତି ଆଦର୍ଶ ଓ କାର୍ଯ୍ୟଧାରାରେ ଅନୁପ୍ରାଣିତ ହୋଇଛନ୍ତି ବୋଲି ଗଣମାଧ୍ୟମ ଆଗରେ ମତ ରଖିଥିଲେ। ଅନୁରୂପ ଭାବରେ ବିଜେଡି ଓ ଧର୍ମଶାଳାର ବିଧାୟକଙ୍କ କାର୍ଯ୍ୟଧାରାକୁ ସମାଲୋଚନା କରିଥିଲେ। ଏବେ ଏମିତି କ’ଣ ଘଟିଲା ଯେ ଦଳ ତାଙ୍କୁ ଫେରାଇ ନେବାକୁ ପ୍ରୟାସ କଲା। ଦଳ ବିରୋଧରେ ବିଷୋଦ୍ଗାର କରୁଥିବା ନେତା ପୁଣି ଦଳକୁ ଫେରି ଆସିଲେ। ତାହାକୁ ନେଇ ଜିଲାର ରାଜନୈତିକ ମହଲରେ ଚର୍ଚ୍ଚା ଆରମ୍ଭ ହୋଇଯାଇଛି।
ସୂଚନାଥାଉ କି, ୨୦୧୭ ପଞ୍ଚାୟତ ନିର୍ବାଚନ ପୂର୍ବରୁ ଯାଜପୁର ଜିଲା ପରିଷଦର ପୂର୍ବତନ ଉପସଭାପତି ବଳ ବିଜେଡି ଛାଡି ଭାଜପାରେ ସାମିଲ ହୋଇଥିଲେ। ସେହି ନିର୍ବାଚନରେ ଭାଜପା ଉନ୍ନତ ପ୍ରଦର୍ଶନ କରିଥିଲା। ୨୦୧୯ ସାଧାରଣ ନିର୍ବାଚନ ପୂର୍ବରୁ ବିଜେଡି ତାଙ୍କୁ ଦଳକୁ ଫେରାଇ ନେଇଥିଲା। ଶେଷ ମୁହୂର୍ତ୍ତରେ ଆକାଶ ଦାସନାୟକଙ୍କୁ ଦଳୀୟ ଟିକେଟରୁ ବାଦ ଦିଆଯାଇ ଅଶୋକଙ୍କୁ ଟିକେଟ ଦିଆଯାଇଥିଲା। ଏଠାରେ ଘର ବାହୁଡ଼ା ନେତା ବୁଲୁଙ୍କ ସହ ଦଳର ସେମିତି କିଛି ଚୁକ୍ତି ଆଲୋଚନା ହୋଇନାହିଁ ତ ତା’କୁ ନେଇ ସାଧାରଣରେ ନାନା ପ୍ରଶ୍ନ ଉଙ୍କି ମାରୁଛି।
ଏ ସମ୍ପର୍କରେ ବୁଲୁଙ୍କୁ ପଚାରିବାରୁ ସେ କହିଛନ୍ତି, ଧର୍ମଶାଳା ବିଧାୟକଙ୍କ ସହ ତାଙ୍କର ମତାନ୍ତର ଘଟିଥିଲା। ସେଥିସକାଶେ ତାଙ୍କୁ ଦଳରୁ ବହିଷ୍କାର କରାଯାଇଥିଲା। ସେହି ମାନ ଅଭିମାନ ଓ କ୍ଷୋଭକୁ ସମ୍ବରଣ କରି ନ ପାରି ସେ ଭାଜପାରେ ସାମିଲ ହୋଇଥିଲେ। ମାତ୍ର ଅଢେଇ ମାସ ଭିତରେ ସେ ଦଳରେ ନିଜକୁ ସହଜ ମଣୁ ନ ଥିଲେ। ଏବେ ସେ ପୁଣି ତାଙ୍କ ଘରକୁ ଫେରି ଆସିଛନ୍ତି। ତୃତୀୟ ମହଲାର ଜଣେ କ୍ଷମତାଶାଳୀ ନେତା ଓ ଯାଜପୁର ଜିଲାର ଜଣେ ପ୍ରଭାବଶାଳୀ ନେତାଙ୍କ ସହ ଆଲୋଚନା ପରେ ସେ ଦଳକୁ ଫେରିଛନ୍ତି। ମାତ୍ର ତାଙ୍କ ସହ ତୃତୀୟ ମହଲାର ନେତା କ’ଣ ଆଲୋଚନା କରିଛନ୍ତି ସେ ଦିଗରେ ବୁଲୁ ପ୍ରକାଶ କରିନାହାନ୍ତି।
