ବଲାଙ୍ଗୀର, ୧୭।୧୧( ସୁନିଲ କୁମାର ମହାନ୍ତି): ବଲାଙ୍ଗୀର ମ୍ୟୁନିସିପାଲଟି ୧୮ନମ୍ବର ୱାର୍ଡ ତୁଳସୀନଗର ନିବାସୀ ଜଣେ ଗରିବ ବିଧବା ବୟସ୍କା ମହିଳା ସୁମତି ବିଶିଙ୍କୁ ସହାୟତାର ହାତ ବଢ଼ାଇଛନ୍ତି ପୌରାଧ୍ୟକ୍ଷା ଲିକା ସାହୁ ଓ ତୁଲସୀନଗର ପଡାବାସୀ । କିଛିଦିନ ତଳେ ଉକ୍ତ ମହିଳାଙ୍କ ପୁଅ ଅସୁସ୍ଥ ହୋଇ ହସ୍ପିଟାଲରେ ଭର୍ତ୍ତି ହୋଇଥିଲେ । ବଲାଙ୍ଗୀର ଭୀମ ଭୋଇ ମେଡ଼ିକାଲ କଲେଜ ହସ୍ପିଟାଲରେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା। ପୁଅର ମୃତ୍ୟୁରେ ମହିଳା ଜଣକ ଭାଙ୍ଗି ପଡିଥିଲେ। ଏଭଳି ଆର୍ଥିକ ଅଭାବରୁ ପୁଅର ଶୁଦ୍ଧିକ୍ରିୟା କରିବାକୁ ଅସମର୍ଥ ହୋଇପଡ଼ିଥିଲେ । ଏଭଳି ପରିସ୍ଥିତିରେ ଶୁଦ୍ଧିକ୍ରିୟା ଓ କାର୍ଯ୍ୟ ତୁଲାଇବା ପାଇଁ ତୁଲସୀନଗରର କିଛି ସହୃଦୟ ଲୋକ ସହଯୋଗର ହାତ ବଢ଼ାଇଥିଲେ । ଏହା ଜାଣିବା ପରେ ବଲାଙ୍ଗୀର ପୌରଧ୍ୟକ୍ଷା ଲିକା ସାହୁ ଓ ସ୍ଥାନୀୟ କାଉନସିଲର ଗଙ୍ଗାଧର ଚାନ୍ଦ ତାଙ୍କ ଘରକୁ ଯାଇ ସହଯୋଗର ହାତ ବଢ଼ାଇଛନ୍ତି। କୌଣସି ଗରିବ ପରିବାରର କାହାର ମୃତ୍ୟୁ ହେଲେ ବଲାଙ୍ଗୀର ମ୍ୟୁନିସିପାଲଟି ପକ୍ଷରୁ ହରିଶ୍ଚନ୍ଦ୍ର ଯୋଜନାରେ ୩ ହଜାର ଯୋଗାଇ ଦିଆଯାଉଥିଲା। ସରକାର ଏହି ସ୍କିମକୁ ବନ୍ଦ କରିଦେବା ପରେ ଗରିବ ପରିବାର ଆର୍ଥିକ ସାହାଯ୍ୟ ପାଇବାରୁ ବଞ୍ଚିତ ହୋଇଛନ୍ତି । ଯାହା ଫଳରେ ଗରିବ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ଅନ୍ୟପଟେ ଗରିବ ପରିବାରଙ୍କୁ ଅର୍ନ୍ତଦୋୟ କାର୍ଡ ମାଧ୍ୟମରେ ସରକାର ମାଗଣା ୩୫କେଜି ଚାଉଳ ଯୋଗାଇ ଦିଆଯାଉଥିବା ସ୍କିମକୁ ମଧ୍ୟ ସରକାର ବନ୍ଦ କରିଦେଇଛନ୍ତି l ଯାହା ଫଳରେ ଗରିବ ଲୋକଟିଏ ମାଗଣା ଚାଉଳ ପାଇବାରୁ ବଞ୍ଚିତ ହେଉଛନ୍ତି । ମ୍ୟୁନିସିପାଲଟି ପୌରଧ୍ୟକ୍ଷା ମ୍ୟୁନିସିପାଲଟି ଓନ ଫଣ୍ଡରୁ ସୋମବାର ୪ ହଜାର ଟଙ୍କା ଚେକ ଆକାରରେ ସୁମତି ବିଶିଙ୍କ ଘରକୁ ଆସି ପ୍ରଦାନ କରିଛନ୍ତି । ତ’ା ସହିତ ଚାଉଳ ଅନ୍ୟାନ୍ୟ ଜିନିଷ ପ୍ରଦାନ କରିଛନ୍ତି । ତାଙ୍କ ପାଇଁ ଆଉ କଣ ବ୍ୟବସ୍ଥା କରାଯାଇପାରିବ ମ୍ୟୁନିସିପାଲଟି ପକ୍ଷରୁ କରାଯିବ ବୋଲି ପୌରଧ୍ୟକ୍ଷା ସାହୁ କହିଛନ୍ତି । ଅନ୍ୟ ପଟେ ସୁମତି ବିଶି ପୌରଧ୍ୟକ୍ଷା ସାହୁଙ୍କୁ ସରକାର ଯୋଗାଉଥିବା ୩୦ ରୁ ୩୫ କେଜି ମାଗଣା ଚାଉଳ କାର୍ଡ ଖଣ୍ଡେ ତାଙ୍କ ପାଇଁ କରିଦେବାକୁ ଗୁହାରୀ କରିଛନ୍ତି ।
