ମହାକାଳପଡ଼ା,୧୫ା୭ (ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ସମୁଦ୍ର ଓ ସଂଲଗ୍ନ ନଦୀରେ ଲଘୁଚାପ ପ୍ରଭାବ ଯୋଗୁ ୨ ଦିନ ହେଲା ଇଲିଶି ମାଛ ବହୁଳ ମାତ୍ରାରେ ମତ୍ସ୍ୟଜୀବୀଙ୍କ ଜାଲରେ ପଡୁଛନ୍ତି। ଇଲିଶି ମାଛର ଚାହିଦା ଥିବାରୁ ଏହାର ଦର ଆକାଶଛୁଆଁ ହୋଇଛି। ୫୦୦ ଗ୍ରାମର ଇଲିଶି ମୂଲ୍ୟ ୧ ହଜାର, ୧ କେଜିର ଦାମ ୧୫୦୦, ୨କେଜିର ମୂଲ୍ୟ ୨ରୁ ୩ ହଜାର ଟଙ୍କା ରହିଛି। ଇଲିଶି ମାଛ ଉଠିଥିବାରୁ ମତ୍ସ୍ୟଜୀବୀମାନେ ଖୁସିବ୍ୟକ୍ତ କରିଛନ୍ତି। ବଙ୍ଗୋପସାଗରରେ ଲଘୁଚାପ ପ୍ରଭାବରେ ପୂର୍ବଦିଗରୁ ପବନ ବହିବାରୁ ଗଭୀର ସମୁଦ୍ର ମଧ୍ୟରେ ଥିବା ଇଲିଶି ମାଛ ଏବେ କୂଳମୁହାଁହୋଇଛନ୍ତି। ସ୍ଥାନୀୟ ମତ୍ସ୍ୟଜୀବୀମାନେ ବୋଟ ନେଇ ସମୁଦ୍ର ମଧ୍ୟରେ ଜାଲ ଘେରା ଦେଇ ଇଲିଶି ମାରୁଥିବା ଜଣେ ବୋଟ୍ ମାଲିକ ସୂଚନା ଦେଇଛନ୍ତି। ମୁଖ୍ୟତଃ ପୂର୍ବ ଦିଗରୁ ପବନ ବୋହିବା ସହ ଜୁଲାଇ, ଅଗଷ୍ଟ ଓ ସେପ୍ଟେମ୍ବରରେ ବନ୍ୟା ଜଳ ନଦୀ ଦେଇ ସମୁଦ୍ରରେ ମିଶିବା ସମୟରେ ଏମାନେ କୂଳମୁହାଁ ହୋଇଥାନ୍ତି। ଏମାନେ ମଧୁର ଜଳରେ ଅଣ୍ଡା ଦେବାକୁ ଆସୁଥିବା ପରିବେଶବିତ୍ମାନେ ମତପୋଷଣ କରିଛନ୍ତି।
ଚଳିତବର୍ଷ ଇଲିଶି ଉତ୍ପାଦନ ବେଶ୍ ଅନୁକୂଳ ହେବ ବୋଲି ବ୍ଲକର ଖରିନାଶି, ବତିଘର ଓ ଜମ୍ବୁ ଅଞ୍ଚଳର ମତ୍ସ୍ୟଜୀବୀ ତାରକା ନାଥ ସେନା, ମୃତ୍ୟୁଞ୍ଜୟ ମଣ୍ଡଳ, ବିଜୟ ମଣ୍ଡଳ, ନରେଶ ମଣ୍ଡଳ ଓ ଜୟଦେବ ଦାସ କହିଛନ୍ତି। ଇଲିଶି ଦର ଭଲ ଥିବାରୁ ବେଶ୍ ଦୁଇ ପଇସା ରୋଜଗାର ହେବ ବୋଲି ମତ୍ସ୍ୟଜୀବୀ ଆଶା ରଖିଛନ୍ତି। ଗୋଟେ ଗୋଟେ ଛୋଟ ଡଙ୍ଗାରେ ୫୦ କିଲୋରୁ ୨ରୁ ୩ କୁଇଣ୍ଟାଲ ଇଲିଶି ଜାଲରେ ପଡୁଛନ୍ତି। ପାରାଦୀପର ଇଲିଶି ମାଛ ବାଲି ପ୍ଲଟରେ ନିଲାମ ହେଉଛି ବୋଲି ମତ୍ସ୍ୟଜୀବୀ କହିଛନ୍ତି। ପୂର୍ବରୁ ଶତାଧିକ କୁଇଣ୍ଟାଲ ଇଲିଶି ପଡୁଥିବା ବେଳେ ଟ୍ରକ ଯୋଗେ ରାଜ୍ୟ ଓ ରାଜ୍ୟ ବାହାର କୋଲକାତା, ରାୟପୁର, ଆନ୍ଧ୍ରପ୍ରଦେଶକୁ ରପ୍ତାନି ହେଉଥିଲା। ଜଳବାୟୁ ପରିବର୍ତ୍ତନ ଓ ଦକ୍ଷିଣ ପଶ୍ଚିମ ମୌସୁମୀ ବାୟୁର ଅନିୟମିତତା ଯୋଗୁ ବର୍ଷା ପରିମାଣ ହ୍ରାସ ପାଇବାରୁ ଇଲିଶି ଉତ୍ପାଦନ ଯଥେଷ୍ଟ ପରିମାଣରେ କମ୍ ହେଉଥିଲା। ହେଲେ ଏବେ ଇଲିଶି ମାଛ ଜାଲରେ ବହୁଳ ମାତ୍ରାରେ ପଡୁଛନ୍ତିି। ଏ ସମ୍ପର୍କରେ ମହାକାଳପଡ଼ା ସହକାରୀ ମତ୍ସ୍ୟ ଅଧିକାରୀ ଦୀପକ କୁମାର ମଲ୍ଲିକଙ୍କୁ ପଚାରିବାରେ ମୌସୁମୀ ପ୍ରଥମ ବର୍ଷାରେ ବନ୍ୟା ଜଳରେ ଇଲିଶି ପ୍ରଜନନ ବା ଅଣ୍ଡାଦାନ ପାଇଁ କୂଳ ଅଭିମୁଖେ ଅଗ୍ରସର ହୋଇଥାନ୍ତି ବୋଲି ସେ କହିଛନ୍ତି।
,
