ନୂଆଦିଲ୍ଲୀ,୨୮ା୪:ଆମ୍ ଆଦ୍ମୀ ପାର୍ଟି (ଆପ୍)ର ଲୋକ ସଭା ପ୍ରଚାର ଗୀତ ଉପରେ ନିର୍ବାଚନ କମିଶନ (ଇସି) ପ୍ରତିବନ୍ଧ ଲଗାଇଛି। ଆପ୍ ଗୀତ ‘ଜେଲ କେ ଜବାବ ମେ ହମ୍ ଭୋଟ ଦେଙ୍ଗେ’ ଶାସକ ଭାଜପା ଏବଂ କେନ୍ଦ୍ରୀୟ ତଦନ୍ତକାରୀ ସଂସ୍ଥା ବିରୋଧରେ ଯାଉଥିବାରୁ ଏହାକୁ ଇସି ବନ୍ଦ କରିଥିବା ଦଳ ପକ୍ଷରୁ ଅଭିଯୋଗ ହୋଇଛି। ତେବେ ଇସି ଏହା ଉପରେ କୌଣସି ପ୍ରତିକ୍ରିୟା ଦେଇନାହିଁ।
ଆପ୍ର ବରିଷ୍ଠ ନେତ୍ରୀ ଆତିଶୀ ରବିବାର ଏକ ଖବରଦାତା ସମ୍ମିଳନୀକୁ ସମ୍ବୋଧିତ କରି କହିଛନ୍ତି, ବୋଧହୁଏ ପ୍ରଥମ ଥର ପାଇଁ ନିର୍ବାଚନ କମିଶନ କୌଣସି ଦଳର ପ୍ରଚାର ଗୀତ ଉପରେ ନିଷେଧାଦେଶ ଲଗାଇଛନ୍ତି। ଉକ୍ତ ଗୀତରେ ଭାଜପା ବିଷୟ ଉଲ୍ଲେଖ ନାହିଁ କି ଏହା ଆଦର୍ଶ ନିର୍ବାଚନ ଆଚରଣ ବିଧିର ଉଲ୍ଲଂଘନ କରୁନାହିଁ। ଏଥିରେ ତଥ୍ୟଗତ ଭିଡିଓ ଓ ଘଟଣାବଳୀ ସାମିଲ ହୋଇଥିଲା। ଭାଜପା ଆଦର୍ଶ ଆଚରଣ ବିଧି ଉଲ୍ଲଂଘନ କରୁଥିଲେ ମଧ୍ୟ ନିର୍ବାଚନ କମିଶନ ଏହା ବିରୋଧରେ କାର୍ଯ୍ୟାନୁଷ୍ଠାନ ନେଉ ନ ଥିବା ଆତିଶୀ ଅଭିଯୋଗ କରିଛନ୍ତି। ଯଦି ଭାଜପା ଏକଚ୍ଛତ୍ରବାଦ କରେ ତେବେ ଠିକ୍ ଏବଂ ଅନ୍ୟ କିଏ ଏହାକୁ ନେଇ ଯଦି ପ୍ରଶ୍ନ ଉଠାଇଲେ ତେବେ ଭୁଲ୍। ଏଥିରୁ ଜଣାପଡ଼ୁଛି ଗଣତନ୍ତ୍ର ବିପଦରେ ରହିଛି। ଭାଜପାର ନିର୍ବାଚନ ଆଚରଣ ବିଧି ଉଲ୍ଲଂଘନ ବିରୋଧରେ ଇସି କାର୍ଯ୍ୟାନୁଷ୍ଠାନ ନିଅନ୍ତୁ ଏବଂ ବିରୋଧୀ ଦଳଗୁଡ଼ିକର ପ୍ରଚାର ବନ୍ଦ କରନ୍ତୁ ନାହିଁ ବୋଲି ଦିଲ୍ଲୀ ମନ୍ତ୍ରୀ ଆତିଶୀ କହିଛନ୍ତି। ସୂଚନାଯୋଗ୍ୟ, ଆପ୍ର ୨ ମିନିଟ୍ର ପ୍ରଚାର ଗୀତକୁ ଦଳୀୟ ନେତା ଦିଲୀପ ପାଣ୍ଡେ ଲେଖିବା ସହ ଗାଇଥିବାବେଳେ ଗୁରୁବାର ଦଳର ମୁଖ୍ୟାଳୟରେ ଏହାକୁ ଉନ୍ମୋଚନ କରାଯାଇଥିଲା।
